១០. ខល្លាដិយបេតិវត្ថុ

៥៨. ‘‘កា នុ អន្តោវិមានស្មិំ, តិដ្ឋន្តី នូបនិក្ខមិ;

ឧបនិក្ខមស្សុ ភទ្ទេ, បស្សាម តំ ពហិដ្ឋិត’’ន្តិ.

៥៩. ‘‘អដ្ដីយាមិ ហរាយាមិ, នគ្គា និក្ខមិតុំ ពហិ;

កេសេហម្ហិ បដិច្ឆន្នា, បុញ្ញំ មេ អប្បកំ កត’’ន្តិ.

៦០. ‘‘ហន្ទុត្តរីយំ ទទាមិ តេ, ឥទំ ទុស្សំ និវាសយ;

ឥទំ ទុស្សំ និវាសេត្វា, ឯហិ និក្ខម សោភនេ;

ឧបនិក្ខមស្សុ ភទ្ទេ, បស្សាម តំ ពហិដ្ឋិត’’ន្តិ.

៦១. ‘‘ហត្ថេន ហត្ថេ តេ ទិន្នំ, ន មយ្ហំ ឧបកប្បតិ;

ឯសេត្ថុបាសកោ សទ្ធោ, សម្មាសម្ពុទ្ធសាវកោ.

៦២. ‘‘ឯតំ អច្ឆាទយិត្វាន, មម ទក្ខិណមាទិស;

តថាហំ [អថាហំ (សី.)] សុខិតា ហេស្សំ, សព្ពកាមសមិទ្ធិនី’’តិ.

៦៣. តញ្ច តេ ន្ហាបយិត្វាន, វិលិម្បេត្វាន វាណិជា;

វត្ថេហច្ឆាទយិត្វាន, តស្សា ទក្ខិណមាទិសុំ.

៦៤. សមនន្តរានុទ្ទិដ្ឋេ [សមនន្តរា អនុទ្ទិដ្ឋេ (ស្យា. ក.)], វិបាកោ ឧទបជ្ជថ [ឧបបជ្ជថ (សី. ស្យា.)];

ភោជនច្ឆាទនបានីយំ [ភោជនច្ឆាទនំ បានីយំ (ស្យា. ក.)], ទក្ខិណាយ ឥទំ ផលំ.

៦៥. តតោ សុទ្ធា សុចិវសនា, កាសិកុត្តមធារិនី;

ហសន្តី វិមានា និក្ខមិ, ‘ទក្ខិណាយ ឥទំ ផល’’’ន្តិ.

៦៦. ‘‘សុចិត្តរូបំ រុចិរំ, វិមានំ តេ បភាសតិ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៧. ‘‘ភិក្ខុនោ ចរមានស្ស, ទោណិនិម្មជ្ជនិំ អហំ;

អទាសិំ ឧជុភូតស្ស, វិប្បសន្នេន ចេតសា.

៦៨. ‘‘តស្ស កម្មស្ស កុសលស្ស, វិបាកំ ទីឃមន្តរំ;

អនុភោមិ វិមានស្មិំ, តញ្ច ទានិ បរិត្តកំ.

៦៩. ‘‘ឧទ្ធំ ចតូហិ មាសេហិ, កាលំកិរិយា [កាលំកិរិយា (ក.)] ភវិស្សតិ;

ឯកន្តកដុកំ ឃោរំ, និរយំ បបតិស្សហំ.

៧០. [ម. និ. ៣.២៥០, ២៦៧; អ. និ. ៣.៣៦; បេ. វ. ២៤០, ៦៩៣] ‘‘ចតុក្កណ្ណំ ចតុទ្វារំ, វិភត្តំ ភាគសោ មិតំ;

អយោបាការបរិយន្តំ, អយសា បដិកុជ្ជិតំ.

៧១. ‘‘តស្ស អយោមយា ភូមិ, ជលិតា តេជសា យុតា;

សមន្តា យោជនសតំ, ផរិត្វា តិដ្ឋតិ សព្ពទា.

៧២. ‘‘តត្ថាហំ ទីឃមទ្ធានំ, ទុក្ខំ វេទិស្ស វេទនំ;

ផលញ្ច បាបកម្មស្ស, តស្មា សោចាមហំ ភុស’’ន្តិ.

ខល្លាដិយបេតិវត្ថុ ទសមំ.