៩. វិបស្សនាកថា

៣៦. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តត្រ ខោ ភគវា ភិក្ខូ អាមន្តេសិ – ‘‘ភិក្ខវោ’’តិ. ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ. ភគវា ឯតទវោច –

‘‘សោ វត, ភិក្ខវេ, ភិក្ខុ កញ្ចិ [កិញ្ចិ (ក.) អ. និ. ៦.៩៩-១០០ បស្សិតព្ពា] សង្ខារំ និច្ចតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – នេតំ ឋានំ វិជ្ជតិ; អនុលោមិកាយ ខន្តិយា អសមន្នាគតោ សម្មត្តនិយាមំ ឱក្កមិស្សតីតិ – នេតំ ឋានំ វិជ្ជតិ; សម្មត្តនិយាមំ អនោក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា [អរហត្តផលំ វា (ស្យា. ក.) អ. និ. ៦.៩៨ បស្សិតព្ពា] សច្ឆិករិស្សតីតិ – នេតំ ឋានំ វិជ្ជតិ.

‘‘សោ វត, ភិក្ខវេ, ភិក្ខុ សព្ពសង្ខារេ អនិច្ចតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – ឋានមេតំ វិជ្ជតិ; អនុលោមិកាយ ខន្តិយា សមន្នាគតោ សម្មត្តនិយាមំ ឱក្កមិស្សតីតិ – ឋានមេតំ វិជ្ជតិ, សម្មត្តនិយាមំ ឱក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – ឋានមេតំ វិជ្ជតិ.

‘‘សោ វត, ភិក្ខវេ, ភិក្ខុ កញ្ចិ សង្ខារំ សុខតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – នេតំ ឋានំ វិជ្ជតិ; អនុលោមិកាយ ខន្តិយា អសមន្នាគតោ សម្មត្តនិយាមំ ឱក្កមិស្សតីតិ – នេតំ ឋានំ វិជ្ជតិ; សម្មត្តនិយាមំ អនោក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – នេតំ ឋានំ វិជ្ជតិ.

‘‘សោ វត, ភិក្ខវេ, ភិក្ខុ សព្ពសង្ខារេ ទុក្ខតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – ឋានមេតំ វិជ្ជតិ; អនុលោមិកាយ ខន្តិយា សមន្នាគតោ សម្មត្តនិយាមំ ឱក្កមិស្សតីតិ – ឋានមេតំ វិជ្ជតិ; សម្មត្តនិយាមំ ឱក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – ឋានមេតំ វិជ្ជតិ.

‘‘សោ វត, ភិក្ខវេ, ភិក្ខុ កញ្ចិ ធម្មំ អត្តតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – នេតំ ឋានំ វិជ្ជតិ; អនុលោមិកាយ ខន្តិយា អសមន្នាគតោ សម្មត្តនិយាមំ ឱក្កមិស្សតីតិ – នេតំ ឋានំ វិជ្ជតិ; សម្មត្តនិយាមំ អនោក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – នេតំ ឋានំ វិជ្ជតិ.

‘‘សោ វត, ភិក្ខវេ, ភិក្ខុ សព្ពធម្មេ [កញ្ចិ ធម្មំ (ស្យា.), កិញ្ចិ ធម្មំ (ក.) អ. និ. ៦.១០០ បស្សិតព្ពា] អនត្តតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – ឋានមេតំ វិជ្ជតិ; អនុលោមិកាយ ខន្តិយា សមន្នាគតោ សម្មត្តនិយាមំ ឱក្កមិស្សតីតិ – ឋានមេតំ វិជ្ជតិ; សម្មត្តនិយាមំ ឱក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – ឋានមេតំ វិជ្ជតិ.

‘‘សោ វត, ភិក្ខវេ, ភិក្ខុ និព្ពានំ ទុក្ខតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – នេតំ ឋានំ វិជ្ជតិ; អនុលោមិកាយ ខន្តិយា អសមន្នាគតោ សម្មត្តនិយាមំ ឱក្កមិស្សតីតិ – នេតំ ឋានំ វិជ្ជតិ; សម្មត្តនិយាមំ អនោក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – នេតំ ឋានំ វិជ្ជតិ.

‘‘សោ វត, ភិក្ខវេ, ភិក្ខុ និព្ពានំ សុខតោ សមនុបស្សន្តោ អនុលោមិកាយ ខន្តិយា សមន្នាគតោ ភវិស្សតីតិ – ឋានមេតំ វិជ្ជតិ; អនុលោមិកាយ ខន្តិយា សមន្នាគតោ សម្មត្តនិយាមំ ឱក្កមិស្សតីតិ – ឋានមេតំ វិជ្ជតិ; សម្មត្តនិយាមំ ឱក្កមមានោ សោតាបត្តិផលំ វា សកទាគាមិផលំ វា អនាគាមិផលំ វា អរហត្តំ វា សច្ឆិករិស្សតីតិ – ឋានមេតំ វិជ្ជតិ’’.

៣៧. កតិហាការេហិ អនុលោមិកំ ខន្តិំ បដិលភតិ, កតិហាការេហិ សម្មត្តនិយាមំ ឱក្កមតិ? ចត្តារីសាយ អាការេហិ អនុលោមិកំ ខន្តិំ បដិលភតិ, ចត្តារីសាយ អាការេហិ សម្មត្តនិយាមំ ឱក្កមតិ.

កតមេហិ ចត្តារីសាយ អាការេហិ អនុលោមិកំ ខន្តិំ បដិលភតិ, កតមហិ ចត្តារីសាយ អាការេហិ សម្មត្តនិយាមំ ឱក្កមតិ? បញ្ចក្ខន្ធេ អនិច្ចតោ ទុក្ខតោ រោគតោ គណ្ឌតោ សល្លតោ អឃតោ អាពាធតោ បរតោ បលោកតោ ឦតិតោ ឧបទ្ទវតោ ភយតោ ឧបសគ្គតោ ចលតោ បភង្គុតោ [បភង្គតោ (ស្យា.)] អទ្ធុវតោ អតាណតោ [អត្តាណតោ (ស្យា.)] អលេណតោ អសរណតោ រិត្តតោ តុច្ឆតោ សុញ្ញតោ អនត្តតោ អាទីនវតោ វិបរិណាមធម្មតោ អសារកតោ អឃមូលតោ វធកតោ វិភវតោ សាសវតោ សង្ខតតោ មារាមិសតោ ជាតិធម្មតោ ជរាធម្មតោ ព្យាធិធម្មតោ មរណធម្មតោ សោកធម្មតោ បរិទេវធម្មតោ ឧបាយាសធម្មតោ សំកិលេសិកធម្មតោ.

៣៨. បញ្ចក្ខន្ធេ អនិច្ចតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ និច្ចំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ទុក្ខតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ សុខំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ រោគតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អារោគ្យំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ គណ្ឌតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អគណ្ឌំ [និគណ្ឌោ (ស្យា.)] និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ សល្លតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ វិសល្លំ [និស្សល្លំ (ស្យា.)] និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ អឃតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនឃោ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អាពាធតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនាពាធោ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ បរតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អបរប្បច្ចយំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ បលោកតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អបលោកធម្មោ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ឦតិតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនីតិកំ និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ ឧបទ្ទវតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនុបទ្ទវំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ភយតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អភយំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ឧបសគ្គតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនុបសគ្គំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ចលតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អចលំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ បភង្គុតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អបភង្គុ [អប្បភង្គំ (ស្យា.)] និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ អទ្ធុវតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ ធុវំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អតាណតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ តាណំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អលេណតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ លេណំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អសរណតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ សរណំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ រិត្តតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អរិត្តំ និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ តុច្ឆតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អតុច្ឆំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ សុញ្ញតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ បរមសុញ្ញំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អនត្តតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ បរមត្ថំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អាទីនវតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនាទីនវំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ វិបរិណាមធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អវិបរិណាមធម្មំ និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ អសារកតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ សារំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ អឃមូលតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនឃមូលំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ វធកតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អវធកំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ វិភវតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អវិភវំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ សាសវតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនាសវំ និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ សង្ខតតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អសង្ខតំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ មារាមិសតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ និរាមិសំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ជាតិធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អជាតំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ជរាធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អជរំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ព្យាធិធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អព្យាធិ [អព្យាធិធម្មំ (ស្យា.)] និព្ពានន្តិ បស្សន្តោ សម្មត្តនិយាមំ ឱក្កមតិ.

បញ្ចក្ខន្ធេ មរណធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អមតំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ សោកធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អសោកំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ បរិទេវធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អបរិទេវំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ ឧបាយាសធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អនុបាយាសំ និព្ពានន្តិ បស្សន្តោ សម្មត្តនិយាមំ ឱក្កមតិ. បញ្ចក្ខន្ធេ សំកិលេសិកធម្មតោ បស្សន្តោ អនុលោមិកំ ខន្តិំ បដិលភតិ. បញ្ចន្នំ ខន្ធានំ និរោធោ អសំកិលិដ្ឋំ និព្ពានន្តិ បស្សន្តោ សម្មត្តនិយាមំ ឱក្កមតិ.

៣៩. អនិច្ចតោតិ, អនិច្ចានុបស្សនា. ទុក្ខតោតិ, ទុក្ខានុបស្សនា. រោគតោតិ, ទុក្ខានុបស្សនា. គណ្ឌតោតិ, ទុក្ខានុបស្សនា. សល្លតោតិ, ទុក្ខានុបស្សនា. អឃតោតិ, ទុក្ខានុបស្សនា. អាពាធតោតិ, ទុក្ខានុបស្សនា. បរតោតិ, អនត្តានុបស្សនា. បលោកតោតិ, អនិច្ចានុបស្សនា. ឦតិតោតិ, ទុក្ខានុបស្សនា.

ឧបទ្ទវតោតិ, ទុក្ខានុបស្សនា. ភយតោតិ, ទុក្ខានុបស្សនា. ឧបសគ្គតោតិ, ទុក្ខានុបស្សនា. ចលតោតិ, អនិច្ចានុបស្សនា. បភង្គុតោតិ, អនិច្ចានុបស្សនា. អទ្ធុវតោតិ, អនិច្ចានុបស្សនា. អតាណតោតិ, ទុក្ខានុបស្សនា. អលេណតោតិ, ទុក្ខានុបស្សនា. អសរណតោតិ, ទុក្ខានុបស្សនា. រិត្តតោតិ, អនត្តានុបស្សនា.

តុច្ឆតោតិ, អនត្តានុបស្សនា. សុញ្ញតោតិ, អនត្តានុបស្សនា. អនត្តតោតិ, អនត្តានុបស្សនា. អាទីនវតោតិ, ទុក្ខានុបស្សនា. វិបរិណាមធម្មតោតិ, អនិច្ចានុបស្សនា. អសារកតោតិ, អនត្តានុបស្សនា. អឃមូលតោតិ, ទុក្ខានុបស្សនា. វធកតោតិ, ទុក្ខានុបស្សនា. វិភវតោតិ, អនិច្ចានុបស្សនា. សាសវតោតិ, ទុក្ខានុបស្សនា.

សង្ខតតោតិ, អនិច្ចានុបស្សនា. មារាមិសតោតិ, ទុក្ខានុបស្សនា. ជាតិធម្មតោតិ, ទុក្ខានុបស្សនា. ជរាធម្មតោតិ, ទុក្ខានុបស្សនា. ព្យាធិធម្មតោតិ, ទុក្ខានុបស្សនា. មរណធម្មតោតិ, អនិច្ចានុបស្សនា. សោកធម្មតោតិ, ទុក្ខានុបស្សនា. បរិទេវធម្មតោតិ, ទុក្ខានុបស្សនា. ឧបាយាសធម្មតោតិ, ទុក្ខានុបស្សនា. សំកិលេសិកធម្មតោតិ, ទុក្ខានុបស្សនា.

ឥមេហិ ចត្តាលីសាយ អាការេហិ អនុលោមិកំ ខន្តិំ បដិលភតិ. ឥមេហិ ចត្តាលីសាយ អាការេហិ សម្មត្តនិយាមំ ឱក្កមតិ.

ឥមេហិ ចត្តាលីសាយ អាការេហិ អនុលោមិកំ ខន្តិំ បដិលភន្តស្ស, ឥមេហិ ចត្តាលីសាយ អាការេហិ សម្មត្តនិយាមំ ឱក្កមន្តស្ស កតិ អនិច្ចានុបស្សនា, កតិ ទុក្ខានុបស្សនា, កតិ អនត្តានុបស្សនា?

បញ្ចវីសតិ អនត្តានុបស្សនា, បញ្ញាស អនិច្ចានុបស្សនា;

សតំ បញ្ចវីសតិ ចេវ, យានិ ទុក្ខេ បវុច្ចរេតិ.

វិបស្សនាកថា និដ្ឋិតា.