២. បុគ្គលវិសេសនិទ្ទេសោ

៨. ទ្វេ បុគ្គលា បដិសម្ភិទប្បត្តា – ឯកោ បុព្ពយោគសម្បន្នោ, ឯកោ ន បុព្ពយោគសម្បន្នោ. យោ បុព្ពយោគសម្បន្នោ សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា – ឯកោ ពហុស្សុតោ, ឯកោ ន ពហុស្សុតោ. យោ ពហុស្សុតោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា – ឯកោ ទេសនាពហុលោ, ឯកោ ន ទេសនាពហុលោ. យោ ទេសនាពហុលោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា – ឯកោ គរូបនិស្សិតោ, ឯកោ ន គរូបនិស្សិតោ. យោ គរូបនិស្សិតោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា, ទ្វេបិ គរូបនិស្សិតា – ឯកោ វិហារពហុលោ, ឯកោ ន វិហារពហុលោ. យោ វិហារពហុលោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា, ទ្វេបិ គរូបនិស្សិតា, ទ្វេបិ វិហារពហុលា – ឯកោ បច្ចវេក្ខណាពហុលោ, ឯកោ ន បច្ចវេក្ខណាពហុលោ. យោ បច្ចវេក្ខណាពហុលោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា, ទ្វេបិ គរូបនិស្សិតា, ទ្វេបិ វិហារពហុលា, ទ្វេបិ បច្ចវេក្ខណាពហុលា – ឯកោ សេខបដិសម្ភិទប្បត្តោ, ឯកោ អសេខបដិសម្ភិទប្បត្តោ. យោ អសេខបដិសម្ភិទប្បត្តោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា, ទ្វេបិ គរូបនិស្សិតា, ទ្វេបិ វិហារពហុលា, ទ្វេបិ បច្ចវេក្ខណាពហុលា, ទ្វេបិ អសេខបដិសម្ភិទប្បត្តា – ឯកោ សាវកបារមិប្បត្តោ, ឯកោ ន សាវកបារមិប្បត្តោ. យោ សាវកបារមិប្បត្តោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

ទ្វេ បុគ្គលា បដិសម្ភិទប្បត្តា, ទ្វេបិ បុព្ពយោគសម្បន្នា, ទ្វេបិ ពហុស្សុតា, ទ្វេបិ ទេសនាពហុលា, ទ្វេបិ គរូបនិស្សិតា, ទ្វេបិ វិហារពហុលា, ទ្វេបិ បច្ចវេក្ខណាពហុលា, ទ្វេបិ អសេខបដិសម្ភិទប្បត្តា – ឯកោ សាវកបារមិប្បត្តោ, ឯកោ បច្ចេកសម្ពុទ្ធោ. យោ បច្ចេកសម្ពុទ្ធោ, សោ តេន អតិរេកោ ហោតិ, អធិកោ ហោតិ, វិសេសោ ហោតិ. តស្ស ញាណំ បភិជ្ជតិ.

បច្ចេកពុទ្ធញ្ច សទេវកញ្ច លោកំ ឧបាទាយ តថាគតោ អរហំ សម្មាសម្ពុទ្ធោ អគ្គោ បដិសម្ភិទប្បត្តោ បញ្ញាបភេទកុសលោ បភិន្នញាណោ អធិគតបដិសម្ភិទោ ចតុវេសារជ្ជប្បត្តោ ទសពលធារី បុរិសាសភោ បុរិសសីហោ…បេ… យេបិ តេ ខត្តិយបណ្ឌិតា ព្រាហ្មណបណ្ឌិតា គហបតិបណ្ឌិតា សមណបណ្ឌិតា និបុណា កតបរប្បវាទា វាលវេធិរូបា វោភិន្ទន្តា មញ្ញេ ចរន្តិ បញ្ញាគតេន ទិដ្ឋិគតានិ, តេ បញ្ហំ អភិសង្ខរិត្វា អភិសង្ខរិត្វា តថាគតំ ឧបសង្កមិត្វា បុច្ឆន្តិ គូឡ្ហានិ ច បដិច្ឆន្នានិ ច. កថិតា វិសជ្ជិតា ច តេ បញ្ហា ភគវតា ហោន្តិ និទ្ទិដ្ឋការណា, ឧបក្ខិត្តកា ច តេ ភគវតោ សម្បជ្ជន្តិ. អថ ខោ ភគវា តត្ថ អតិរោចតិ, យទិទំ បញ្ញាយាតិ អគ្គោ បដិសម្ភិទប្បត្តោតិ.

មហាបញ្ញាកថា និដ្ឋិតា.