៨. លោកុត្តរកថា

៤៣. កតមេ ធម្មា លោកុត្តរា? ចត្តារោ សតិបដ្ឋានា, ចត្តារោ សម្មប្បធានា, ចត្តារោ ឥទ្ធិបាទា, បញ្ចិន្ទ្រិយានិ, បញ្ច ពលានិ, សត្ត ពោជ្ឈង្គា, អរិយោ អដ្ឋង្គិកោ មគ្គោ, ចត្តារោ អរិយមគ្គា, ចត្តារិ ច សាមញ្ញផលានិ, និព្ពានញ្ច – ឥមេ ធម្មា លោកុត្តរា.

លោកុត្តរាតិ កេនដ្ឋេន លោកុត្តរា? លោកំ តរន្តីតិ – លោកុត្តរា. លោកា ឧត្តរន្តីតិ – លោកុត្តរា. លោកតោ ឧត្តរន្តីតិ – លោកុត្តរា. លោកម្ហា ឧត្តរន្តីតិ – លោកុត្តរា. លោកំ អតិក្កមន្តីតិ – លោកុត្តរា. លោកំ សមតិក្កមន្តីតិ – លោកុត្តរា. លោកំ សមតិក្កន្តាតិ – លោកុត្តរា. លោកេន អតិរេកាតិ – លោកុត្តរា. លោកន្តំ តរន្តីតិ – លោកុត្តរា. លោកា និស្សរន្តីតិ – លោកុត្តរា. លោកតោ និស្សរន្តីតិ – លោកុត្តរា. លោកម្ហា និស្សរន្តីតិ – លោកុត្តរា. លោកា និស្សដាតិ – លោកុត្តរា. លោកេន និស្សដាតិ – លោកុត្តរា. លោកម្ហា និស្សដាតិ – លោកុត្តរា. លោកេ ន តិដ្ឋន្តីតិ – លោកុត្តរា. លោកស្មិំ ន តិដ្ឋន្តីតិ – លោកុត្តរា. លោកេ ន លិម្បន្តីតិ – លោកុត្តរា. លោកេន ន លិម្បន្តីតិ – លោកុត្តរា. លោកេ អសំលិត្តាតិ – លោកុត្តរា. លោកេន អសំលិត្តាតិ – លោកុត្តរា. លោកេ អនុបលិត្តាតិ – លោកុត្តរា. លោកេន អនុបលិត្តាតិ – លោកុត្តរា. លោកេ វិប្បមុត្តាតិ – លោកុត្តរា. លោកេន វិប្បមុត្តាតិ – លោកុត្តរា. លោកា វិប្បមុត្តាតិ – លោកុត្តរា. លោកតោ វិប្បមុត្តាតិ – លោកុត្តរា. លោកម្ហា វិប្បមុត្តាតិ – លោកុត្តរា. លោកេ វិសញ្ញុត្តាតិ – លោកុត្តរា. លោកេន វិសញ្ញុត្តាតិ – លោកុត្តរា. លោកា វិសញ្ញុត្តាតិ – លោកុត្តរា. លោកស្មិំ វិសញ្ញុត្តាតិ – លោកុត្តរា. លោកតោ វិសញ្ញុត្តាតិ – លោកុត្តរា. លោកម្ហា វិសញ្ញុត្តាតិ – លោកុត្តរា. លោកា សុជ្ឈន្តីតិ – លោកុត្តរា. លោកតោ សុជ្ឈន្តីតិ – លោកុត្តរា. លោកម្ហា សុជ្ឈន្តីតិ – លោកុត្តរា. លោកា វិសុជ្ឈន្តីតិ – លោកុត្តរា. លោកតោ វិសុជ្ឈន្តីតិ – លោកុត្តរា. លោកម្ហា វិសុជ្ឈន្តីតិ – លោកុត្តរា. លោកា វុដ្ឋហន្តីតិ [ឧទ្ធរន្តីតិ (ក.), ឧដ្ឋហន្តីតិ (សី. អដ្ឋ.)] – លោកុត្តរា. លោកតោ វុដ្ឋហន្តីតិ – លោកុត្តរា. លោកម្ហា វុដ្ឋហន្តីតិ – លោកុត្តរា. លោកា វិវដ្ដន្តីតិ – លោកុត្តរា. លោកតោ វិវដ្ដន្តីតិ – លោកុត្តរា. លោកម្ហា វិវដ្ដន្តីតិ – លោកុត្តរា. លោកេ ន សជ្ជន្តីតិ – លោកុត្តរា. លោកេ ន គយ្ហន្តីតិ – លោកុត្តរា. លោកេ ន ពជ្ឈន្តីតិ – លោកុត្តរា. លោកំ សមុច្ឆិន្ទន្តីតិ – លោកុត្តរា. លោកំ សមុច្ឆិន្នត្តាតិ – លោកុត្តរា. លោកំ បដិប្បស្សម្ភេន្តីតិ – លោកុត្តរា. លោកំ បដិប្បស្សម្ភិតត្តាតិ – លោកុត្តរា. លោកស្ស អបថាតិ – លោកុត្តរា. លោកស្ស អគតីតិ – លោកុត្តរា. លោកស្ស អវិសយាតិ – លោកុត្តរា. លោកស្ស អសាធារណាតិ – លោកុត្តរា. លោកំ វមន្តីតិ – លោកុត្តរា. លោកំ ន បច្ចាវមន្តីតិ – លោកុត្តរា. លោកំ បជហន្តីតិ – លោកុត្តរា. លោកំ ន ឧបាទិយន្តីតិ – លោកុត្តរា. លោកំ វិសិនេន្តីតិ – លោកុត្តរា. លោកំ ន ឧស្សិនេន្តីតិ – លោកុត្តរា. លោកំ វិធូបេន្តីតិ – លោកុត្តរា. លោកំ ន សំធូបេន្តីតិ – លោកុត្តរា. លោកំ សមតិក្កម្ម អភិភុយ្យ តិដ្ឋន្តីតិ – លោកុត្តរា.

លោកុត្តរកថា និដ្ឋិតា.