៩. ពលកថា

៤៤. សាវត្ថិនិទានំ [សំ. និ. ៥.៧០៥-៧១៦ បស្សិតព្ពា]. ‘‘បញ្ចិមានិ, ភិក្ខវេ, ពលានិ. កតមានិ បញ្ច? សទ្ធាពលំ, វីរិយពលំ, សតិពលំ, សមាធិពលំ, បញ្ញាពលំ – ឥមានិ ខោ, ភិក្ខវេ, បញ្ច ពលានិ.

‘‘អបិ ច, អដ្ឋសដ្ឋិ ពលានិ – សទ្ធាពលំ, វីរិយពលំ, សតិពលំ, សមាធិពលំ, បញ្ញាពលំ, ហិរិពលំ, ឱត្តប្បពលំ, បដិសង្ខានពលំ, ភាវនាពលំ, អនវជ្ជពលំ, សង្គហពលំ, ខន្តិពលំ, បញ្ញត្តិពលំ, និជ្ឈត្តិពលំ, ឥស្សរិយពលំ, អធិដ្ឋានពលំ, សមថពលំ, វិបស្សនាពលំ, ទស សេខពលានិ, ទស អសេខពលានិ, ទស ខីណាសវពលានិ, ទស ឥទ្ធិពលានិ, ទស តថាគតពលានិ’’.

កតមំ សទ្ធាពលំ? អស្សទ្ធិយេ ន កម្បតីតិ – សទ្ធាពលំ. សហជាតានំ ធម្មានំ ឧបត្ថម្ភនដ្ឋេន សទ្ធាពលំ, កិលេសានំ បរិយាទានដ្ឋេន សទ្ធាពលំ, បដិវេធាទិវិសោធនដ្ឋេន សទ្ធាពលំ, ចិត្តស្ស អធិដ្ឋានដ្ឋេន សទ្ធាពលំ, ចិត្តស្ស វោទានដ្ឋេន សទ្ធាពលំ, វិសេសាធិគមដ្ឋេន សទ្ធាពលំ, ឧត្តរិ បដិវេធដ្ឋេន សទ្ធាពលំ, សច្ចាភិសមយដ្ឋេន សទ្ធាពលំ, និរោធេ បតិដ្ឋាបកដ្ឋេន សទ្ធាពលំ. ឥទំ សទ្ធាពលំ.

កតមំ វីរិយពលំ? កោសជ្ជេ ន កម្បតីតិ – វីរិយពលំ. សហជាតានំ ធម្មានំ ឧបត្ថម្ភនដ្ឋេន វីរិយពលំ, កិលេសានំ បរិយាទានដ្ឋេន វីរិយពលំ, បដិវេធាទិវិសោធនដ្ឋេន វីរិយពលំ, ចិត្តស្ស អធិដ្ឋានដ្ឋេន វីរិយពលំ, ចិត្តស្ស វោទានដ្ឋេន វីរិយពលំ, វិសេសាធិគមដ្ឋេន វីរិយពលំ, ឧត្តរិ បដិវេធដ្ឋេន វីរិយពលំ, សច្ចាភិសមយដ្ឋេន វីរិយពលំ, និរោធេ បតិដ្ឋាបកដ្ឋេន វីរិយពលំ. ឥទំ វីរិយពលំ.

កតមំ សតិពលំ? បមាទេ ន កម្បតីតិ – សតិពលំ. សហជាតានំ ធម្មានំ ឧបត្ថម្ភនដ្ឋេន សតិពលំ…បេ… និរោធេ បតិដ្ឋាបកដ្ឋេន សតិពលំ. ឥទំ សតិពលំ.

កតមំ សមាធិពលំ? ឧទ្ធច្ចេ ន កម្បតីតិ – សមាធិពលំ. សហជាតានំ ធម្មានំ ឧបត្ថម្ភនដ្ឋេន សមាធិពលំ…បេ… និរោធេ បតិដ្ឋាបកដ្ឋេន សមាធិពលំ. ឥទំ សមាធិពលំ.

កតមំ បញ្ញាពលំ? អវិជ្ជាយ ន កម្បតីតិ – បញ្ញាពលំ. សហជាតានំ ធម្មានំ ឧបត្ថម្ភនដ្ឋេន បញ្ញាពលំ…បេ… និរោធេ បតិដ្ឋាបកដ្ឋេន បញ្ញាពលំ. ឥទំ បញ្ញាពលំ.

កតមំ ហិរិពលំ? នេក្ខម្មេន កាមច្ឆន្ទំ ហិរីយតីតិ [ហិរិយតីតិ (ស្យា. ក.)] – ហិរិពលំ. អព្យាបាទេន ព្យាបាទំ ហិរីយតីតិ – ហិរិពលំ. អាលោកសញ្ញាយ ថិនមិទ្ធំ ហិរីយតីតិ – ហិរិពលំ. អវិក្ខេបេន ឧទ្ធច្ចំ ហិរីយតីតិ – ហិរិពលំ. ធម្មវវត្ថានេន វិចិកិច្ឆំ ហិរីយតីតិ – ហិរិពលំ. ញាណេន អវិជ្ជំ ហិរីយតីតិ – ហិរិពលំ. បាមោជ្ជេន អរតិំ ហិរីយតីតិ – ហិរិពលំ. បឋមេន ឈានេន នីវរណេ ហិរីយតីតិ – ហិរិពលំ…បេ… អរហត្តមគ្គេន សព្ពកិលេសេ ហិរីយតីតិ – ហិរិពលំ. ឥទំ ហិរិពលំ.

កតមំ ឱត្តប្បពលំ? នេក្ខម្មេន កាមច្ឆន្ទំ ឱត្តប្បតីតិ – ឱត្តប្បពលំ. អព្យាបាទេន ព្យាបាទំ ឱត្តប្បតីតិ – ឱត្តប្បពលំ. អាលោកសញ្ញាយ ថិនមិទ្ធំ ឱត្តប្បតីតិ – ឱត្តប្បពលំ. អវិក្ខេបេន ឧទ្ធច្ចំ ឱត្តប្បតីតិ – ឱត្តប្បពលំ. ធម្មវវត្ថានេន វិចិកិច្ឆំ ឱត្តប្បតីតិ – ឱត្តប្បពលំ. ញាណេន អវិជ្ជំ ឱត្តប្បតីតិ – ឱត្តប្បពលំ. បាមោជ្ជេន អរតិំ ឱត្តប្បតីតិ – ឱត្តប្បពលំ. បឋមេន ឈានេន នីវរណេ ឱត្តប្បតីតិ – ឱត្តប្បពលំ…បេ… អរហត្តមគ្គេន សព្ពកិលេសេ ឱត្តប្បតីតិ – ឱត្តប្បពលំ. ឥទំ ឱត្តប្បពលំ.

កតមំ បដិសង្ខានពលំ? នេក្ខម្មេន កាមច្ឆន្ទំ បដិសង្ខាតីតិ – បដិសង្ខានពលំ. អព្យាបាទេន ព្យាបាទំ បដិសង្ខាតីតិ – បដិសង្ខានពលំ. អាលោកសញ្ញាយ ថិនមិទ្ធំ បដិសង្ខាតីតិ – បដិសង្ខានពលំ. អវិក្ខេបេន ឧទ្ធច្ចំ បដិសង្ខាតីតិ – បដិសង្ខានពលំ. ធម្មវវត្ថានេន វិចិកិច្ឆំ បដិសង្ខាតីតិ – បដិសង្ខានពលំ. ញាណេន អវិជ្ជំ បដិសង្ខាតីតិ – បដិសង្ខានពលំ. បាមោជ្ជេន អរតិំ បដិសង្ខាតីតិ – បដិសង្ខានពលំ. បឋមេន ឈានេន នីវរណេ បដិសង្ខាតីតិ – បដិសង្ខានពលំ…បេ… អរហត្តមគ្គេន សព្ពកិលេសេ បដិសង្ខាតីតិ – បដិសង្ខានពលំ. ឥទំ បដិសង្ខានពលំ.

កតមំ ភាវនាពលំ? កាមច្ឆន្ទំ បជហន្តោ នេក្ខម្មំ ភាវេតីតិ – ភាវនាពលំ. ព្យាបាទំ បជហន្តោ អព្យាបាទំ ភាវេតីតិ – ភាវនាពលំ. ថិនមិទ្ធំ បជហន្តោ អាលោកសញ្ញំ ភាវេតីតិ – ភាវនាពលំ. ឧទ្ធច្ចំ បជហន្តោ អវិក្ខេបំ ភាវេតីតិ – ភាវនាពលំ. វិចិកិច្ឆំ បជហន្តោ ធម្មវវត្ថានំ ភាវេតីតិ – ភាវនាពលំ. អវិជ្ជំ បជហន្តោ ញាណំ ភាវេតីតិ – ភាវនាពលំ. អរតិំ បជហន្តោ បាមោជ្ជំ ភាវេតីតិ – ភាវនាពលំ. នីវរណេ បជហន្តោ បឋមំ ឈានំ ភាវេតីតិ – ភាវនាពលំ…បេ… សព្ពកិលេសេ បជហន្តោ អរហត្តមគ្គំ ភាវេតីតិ – ភាវនាពលំ. ឥទំ ភាវនាពលំ.

កតមំ អនវជ្ជពលំ? កាមច្ឆន្ទស្ស បហីនត្តា នេក្ខម្មេ នត្ថិ កិញ្ចិ វជ្ជន្តិ – អនវជ្ជពលំ. ព្យាបាទស្ស បហីនត្តា អព្យាបាទេ នត្ថិ កិញ្ចិ វជ្ជន្តិ – អនវជ្ជពលំ. ថិនមិទ្ធស្ស បហីនត្តា អាលោកសញ្ញាយ នត្ថិ កិញ្ចិ វជ្ជន្តិ – អនវជ្ជពលំ. ឧទ្ធច្ចស្ស បហីនត្តា អវិក្ខេបេ នត្ថិ កិញ្ចិ វជ្ជន្តិ – អនវជ្ជពលំ. វិចិកិច្ឆាយ បហីនត្តា ធម្មវវត្ថានេ នត្ថិ កិញ្ចិ វជ្ជន្តិ – អនវជ្ជពលំ. អវិជ្ជាយ បហីនត្តា ញាណេ នត្ថិ កិញ្ចិ វជ្ជន្តិ – អនវជ្ជពលំ. អរតិយា បហីនត្តា បាមោជ្ជេ នត្ថិ កិញ្ចិ វជ្ជន្តិ អនវជ្ជពលំ. នីវរណានំ បហីនត្តា បឋមជ្ឈានេ នត្ថិ កិញ្ចិ វជ្ជន្តិ – អនវជ្ជពលំ…បេ… សព្ពកិលេសានំ បហីនត្តា អរហត្តមគ្គេ នត្ថិ កិញ្ចិ វជ្ជន្តិ – អនវជ្ជពលំ. ឥទំ អនវជ្ជពលំ.

កតមំ សង្គហពលំ? កាមច្ឆន្ទំ បជហន្តោ នេក្ខម្មវសេន ចិត្តំ សង្គណ្ហាតីតិ – សង្គហពលំ. ព្យាបាទំ បជហន្តោ អព្យាបាទវសេន ចិត្តំ សង្គណ្ហាតីតិ – សង្គហពលំ. ថិនមិទ្ធំ បជហន្តោ អាលោកសញ្ញាវសេន ចិត្តំ សង្គណ្ហាតីតិ – សង្គហពលំ…បេ… សព្ពកិលេសេ បជហន្តោ អរហត្តមគ្គវសេន ចិត្តំ សង្គណ្ហាតីតិ – សង្គហពលំ. ឥទំ សង្គហពលំ.

កតមំ ខន្តិពលំ? កាមច្ឆន្ទស្ស បហីនត្តា នេក្ខម្មំ ខមតីតិ – ខន្តិពលំ. ព្យាបាទស្ស បហីនត្តា អព្យាបាទោ ខមតីតិ – ខន្តិពលំ. ថិនមិទ្ធស្ស បហីនត្តា អាលោកសញ្ញា ខមតីតិ – ខន្តិពលំ. ឧទ្ធច្ចស្ស បហីនត្តា អវិក្ខេបោ ខមតីតិ – ខន្តិពលំ. វិចិកិច្ឆាយ បហីនត្តា ធម្មវវត្ថានំ ខមតីតិ – ខន្តិពលំ. អវិជ្ជាយ បហីនត្តា ញាណំ ខមតីតិ – ខន្តិពលំ. អរតិយា បហីនត្តា បាមោជ្ជំ ខមតីតិ – ខន្តិពលំ. នីវរណានំ បហីនត្តា បឋមំ ឈានំ ខមតីតិ – ខន្តិពលំ…បេ… សព្ពកិលេសានំ បហីនត្តា អរហត្តមគ្គោ ខមតីតិ – ខន្តិពលំ. ឥទំ ខន្តិពលំ.

កតមំ បញ្ញត្តិពលំ? កាមច្ឆន្ទំ បជហន្តោ នេក្ខម្មវសេន ចិត្តំ បញ្ញបេតីតិ – បញ្ញត្តិពលំ. ព្យាបាទំ បជហន្តោ អព្យាបាទវសេន ចិត្តំ បញ្ញបេតីតិ – បញ្ញត្តិពលំ. ថិនមិទ្ធំ បជហន្តោ អាលោកសញ្ញាវសេន ចិត្តំ បញ្ញបេតីតិ – បញ្ញត្តិពលំ…បេ… សព្ពកិលេសេ បជហន្តោ អរហត្តមគ្គវសេន ចិត្តំ បញ្ញបេតីតិ – បញ្ញត្តិពលំ. ឥទំ បញ្ញត្តិពលំ.

កតមំ និជ្ឈត្តិពលំ? កាមច្ឆន្ទំ បជហន្តោ នេក្ខម្មវសេន ចិត្តំ និជ្ឈាបេតីតិ – និជ្ឈត្តិពលំ. ព្យាបាទំ បជហន្តោ អព្យាបាទវសេន ចិត្តំ និជ្ឈាបេតីតិ – និជ្ឈត្តិពលំ. ថិនមិទ្ធំ បជហន្តោ អាលោកសញ្ញាវសេន ចិត្តំ និជ្ឈាបេតីតិ – និជ្ឈត្តិពលំ…បេ… សព្ពកិលេសេ បជហន្តោ អរហត្តមគ្គវសេន ចិត្តំ និជ្ឈាបេតីតិ – និជ្ឈត្តិពលំ. ឥទំ និជ្ឈត្តិពលំ.

កតមំ ឥស្សរិយពលំ? កាមច្ឆន្ទំ បជហន្តោ នេក្ខម្មវសេន ចិត្តំ វសំ វត្តេតីតិ – ឥស្សរិយពលំ. ព្យាបាទំ បជហន្តោ អព្យាបាទវសេន ចិត្តំ វសំ វត្តេតីតិ – ឥស្សរិយពលំ. ថិនមិទ្ធំ បជហន្តោ អាលោកសញ្ញាវសេន ចិត្តំ វសំ វត្តេតីតិ – ឥស្សរិយពលំ…បេ… សព្ពកិលេសេ បជហន្តោ អរហត្តមគ្គវសេន ចិត្តំ វសំ វត្តេតីតិ – ឥស្សរិយពលំ. ឥទំ ឥស្សរិយពលំ.

កតមំ អធិដ្ឋានពលំ? កាមច្ឆន្ទំ បជហន្តោ នេក្ខម្មវសេន ចិត្តំ អធិដ្ឋាតីតិ – អធិដ្ឋានពលំ. ព្យាបាទំ បជហន្តោ អព្យាបាទវសេន ចិត្តំ អធិដ្ឋាតីតិ – អធិដ្ឋានពលំ. ថិនមិទ្ធំ បជហន្តោ អាលោកសញ្ញាវសេន ចិត្តំ អធិដ្ឋាតីតិ – អធិដ្ឋានពលំ…បេ… សព្ពកិលេសេ បជហន្តោ អរហត្តមគ្គវសេន ចិត្តំ អធិដ្ឋាតីតិ – អធិដ្ឋានពលំ. ឥទំ អធិដ្ឋានពលំ.

កតមំ សមថពលំ? នេក្ខម្មវសេន ចិត្តស្ស ឯកគ្គតា អវិក្ខេបោ សមថពលំ, អព្យាបាទវសេន ចិត្តស្ស ឯកគ្គតា អវិក្ខេបោ សមថពលំ, អាលោកសញ្ញាវសេន ចិត្តស្ស ឯកគ្គតា អវិក្ខេបោ សមថពលំ…បេ… បដិនិស្សគ្គានុបស្សី អស្សាសវសេន ចិត្តស្ស ឯកគ្គតា អវិក្ខេបោ សមថពលំ, បដិនិស្សគ្គានុបស្សី បស្សាសវសេន ចិត្តស្ស ឯកគ្គតា អវិក្ខេបោ សមថពលំ.

សមថពលន្តិ កេនដ្ឋេន សមថពលំ? បឋមេន ឈានេន នីវរណេ ន កម្បតីតិ – សមថពលំ. ទុតិយេន ឈានេន វិតក្កវិចារេ ន កម្បតីតិ – សមថពលំ. តតិយេន ឈានេន បីតិយា ន កម្បតីតិ – សមថពលំ. ចតុត្ថេន ឈានេន សុខទុក្ខេ ន កម្បតីតិ – សមថពលំ. អាកាសានញ្ចាយតនសមាបត្តិយា រូបសញ្ញាយ បដិឃសញ្ញាយ នានត្តសញ្ញាយ ន កម្បតីតិ – សមថពលំ. វិញ្ញាណញ្ចាយតនសមាបត្តិយា អាកាសានញ្ចាយតនសញ្ញាយ ន កម្បតីតិ – សមថពលំ. អាកិញ្ចញ្ញាយតនសមាបត្តិយា វិញ្ញាណញ្ចាយតនសញ្ញាយ ន កម្បតីតិ – សមថពលំ. នេវសញ្ញានាសញ្ញាយតនសមាបត្តិយា អាកិញ្ចញ្ញាយតនសញ្ញាយ ន កម្បតីតិ – សមថពលំ. ឧទ្ធច្ចេ ច ឧទ្ធច្ចសហគតកិលេសេ ច ខន្ធេ ច ន កម្បតី ន ចលតិ ន វេធតីតិ – សមថពលំ. ឥទំ សមថពលំ.

កតមំ វិបស្សនាពលំ? អនិច្ចានុបស្សនា វិបស្សនាពលំ, ទុក្ខានុបស្សនា វិបស្សនាពលំ…បេ… បដិនិស្សគ្គានុបស្សនា វិបស្សនាពលំ, រូបេ អនិច្ចានុបស្សនា វិបស្សនាពលំ, រូបេ ទុក្ខានុបស្សនា វិបស្សនាពលំ…បេ… រូបេ បដិនស្សគ្គានុបស្សនា វិបស្សនាពលំ, វេទនាយ…បេ… សញ្ញាយ… សង្ខារេសុ… វិញ្ញាណេ… ចក្ខុស្មិំ…បេ… ជរាមរណេ អនិច្ចានុបស្សនា វិបស្សនាពលំ, ជរាមរណេ ទុក្ខានុបស្សនា វិបស្សនាពលំ…បេ… ជរាមរណេ បដិនិស្សគ្គានុបស្សនា វិបស្សនាពលំ. វិបស្សនាពលន្តិ កេនដ្ឋេន វិបស្សនាពលំ? អនិច្ចានុបស្សនាយ និច្ចសញ្ញាយ ន កម្បតីតិ – វិបស្សនាពលំ. ទុក្ខានុបស្សនាយ សុខសញ្ញាយ ន កម្បតីតិ – វិបស្សនាពលំ. អនត្តានុបស្សនាយ អត្តសញ្ញាយ កម្បតីតិ – វិបស្សនាពលំ. និព្ពិទានុបស្សនាយ នន្ទិយា ន កម្បតីតិ – វិបស្សនាពលំ. វិរាគានុបស្សនាយ រាគេ ន កម្បតីតិ – វិបស្សនាពលំ. និរោធានុបស្សនា សមុទយេ ន កម្បតីតិ – វិបស្សនាពលំ. បដិនិស្សគ្គានុបស្សនាយ អាទានេ ន កម្បតីតិ – វិបស្សនាពលំ. អវិជ្ជាយ អវិជ្ជាសហគតកិលេសេ ច ខន្ធេ ច ន កម្បតិ ន ចលតិ ន វេធតីតិ – វិបស្សនាពលំ. ឥទំ វិបស្សនាពលំ.

កតមានិ ទស សេខពលានិ, ទស អសេខពលានិ? សម្មាទិដ្ឋិំ [សម្មាទិដ្ឋិ (ក.) ឯវមីទិសេសុ នវសុ បទេសុ ទុតិយន្តវចនេន. ទី. និ. ៣.៣៤៨ បស្សិតព្ពា] សិក្ខតីតិ – សេខពលំ. តត្ថ សិក្ខិតត្តា អសេខពលំ. សម្មាសង្កប្បំ សិក្ខតីតិ – សេខពលំ. តត្ថ សិក្ខិតត្តា – អសេខពលំ. សម្មាវាចំ…បេ… សម្មាកម្មន្តំ… សម្មាអាជីវំ… សម្មាវាយាមំ… សម្មាសតិំ… សម្មាសមាធិំ… សម្មាញាណំ…បេ… សម្មាវិមុត្តិំ សិក្ខតីតិ – សេខពលំ. តត្ថ សិក្ខិតត្តា – អសេខពលំ. ឥមានិ ទស សេខពលានិ, ទស អសេខពលានិ.

កតមានិ ទស ខីណាសវពលានិ? [អ. និ. ១០.៩០ បស្សិតព្ពា] ឥធ ខីណាសវស្ស ភិក្ខុនោ អនិច្ចតោ សព្ពេ សង្ខារា យថាភូតំ សម្មប្បញ្ញាយ សុទិដ្ឋា ហោន្តិ. យម្បិ ខីណាសវស្ស ភិក្ខុនោ អនិច្ចតោ សព្ពេ សង្ខារា យថាភូតំ សម្មប្បញ្ញាយ សុទិដ្ឋា ហោន្តិ, ឥទម្បិ ខីណាសវស្ស ភិក្ខុនោ ពលំ ហោតិ, យំ ពលំ អាគម្ម ខីណាសវោ ភិក្ខុ អាសវានំ ខយំ បដិជានាតិ – ‘‘ខីណា មេ អាសវា’’តិ.

បុន ចបរំ ខីណាសវស្ស ភិក្ខុនោ អង្គារកាសូបមា កាមា យថាភូតំ សម្មប្បញ្ញាយ សុទិដ្ឋា ហោន្តិ. យម្បិ ខីណាសវស្ស ភិក្ខុនោ អង្គារកាសូបមា កាមា យថាភូតំ សម្មប្បញ្ញាយ សុទិដ្ឋា ហោន្តិ, ឥទម្បិ ខីណាសវស្ស ភិក្ខុនោ ពលំ ហោតិ, យំ ពលំ អាគម្ម ខីណាសវោ ភិក្ខុ អាសវានំ ខយំ បដិជានាតិ – ‘‘ខីណា មេ អាសវា’’តិ.

បុន ចបរំ ខីណាសវស្ស ភិក្ខុនោ វិវេកនិន្នំ ចិត្តំ ហោតិ វិវេកបោណំ វិវេកបព្ភារំ វិវេកដ្ឋំ នេក្ខម្មាភិរតំ ព្យន្តីភូតំ [ព្យន្តិភូតំ (ក.)] សព្ពសោ អាសវដ្ឋានិយេហិ ធម្មេហិ. យម្បិ ខីណាសវស្ស ភិក្ខុនោ វិវេកនិន្នំ ចិត្តំ ហោតិ វិវេកបោណំ វិវេកបព្ភារំ វិវេកដ្ឋំ នេក្ខម្មាភិរតំ ព្យន្តិភូតំ សព្ពសោ អាសវដ្ឋានិយេហិ ធម្មេហិ, ឥទម្បិ ខីណាសវស្ស ភិក្ខុនោ ពលំ ហោតិ, យំ ពលំ អាគម្ម ខីណាសវោ ភិក្ខុ អាសវានំ ខយំ បដិជានាតិ – ‘‘ខីណា មេ អាសវា’’តិ.

បុន ចបរំ ខីណាសវស្ស ភិក្ខុនោ ចត្តារោ សតិបដ្ឋានា ភាវិតា ហោន្តិ សុភាវិតា. យម្បិ ខីណាសវស្ស ភិក្ខុនោ ចត្តារោ សតិបដ្ឋានា ភាវិតា ហោន្តិ សុភាវិតា, ឥទម្បិ ខីណាសវស្ស ភិក្ខុនោ ពលំ ហោតិ, យំ ពលំ អាគម្ម ខីណាសវោ ភិក្ខុ អាសវានំ ខយំ បដិជានាតិ – ‘‘ខីណា មេ អាសវា’’តិ.

បុន ចបរំ ខីណាសវស្ស ភិក្ខុនោ ចត្តារោ សម្មប្បធានា ភាវិតា ហោន្តិ សុភាវិតា…បេ… ចត្តារោ ឥទ្ធិបាទា ភាវិតា ហោន្តិ សុភាវិតា… បញ្ចិន្ទ្រិយានិ ភាវិតានិ ហោន្តិ សុភាវិតានិ… បញ្ច ពលានិ ភាវិតានិ ហោន្តិ សុភាវិតានិ… សត្ត ពោជ្ឈង្គា ភាវិតា ហោន្តិ សុភាវិតា…បេ… អរិយោ អដ្ឋង្គិកោ មគ្គោ ភាវិតោ ហោតិ សុភាវិតោ. យម្បិ ខីណាសវស្ស ភិក្ខុនោ អដ្ឋង្គិកោ មគ្គោ ភាវិតោ ហោតិ សុភាវិតោ, ឥទម្បិ ខីណាសវស្ស ភិក្ខុនោ ពលំ ហោតិ, យំ ពលំ អាគម្ម ខីណាសវោ ភិក្ខុ អាសវានំ ខយំ បដិជានាតិ – ‘‘ខីណា មេ អាសវា’’តិ. ឥមានិ ទស ខីណាសវពលានិ.

កតមានិ ទស ឥទ្ធិពលានិ? អធិដ្ឋានា ឥទ្ធិ, វិកុព្ពនា ឥទ្ធិ, មនោមយា ឥទ្ធិ, ញាណវិប្ផារា ឥទ្ធិ, សមាធិវិប្ផារា ឥទ្ធិ, អរិយា ឥទ្ធិ, កម្មវិបាកជា ឥទ្ធិ, បុញ្ញវតោ ឥទ្ធិ, វិជ្ជាមយា ឥទ្ធិ, តត្ថ តត្ថ សម្មា បយោគប្បច្ចយា ឥជ្ឈនដ្ឋេន ឥទ្ធិ – ឥមានិ ទស ឥទ្ធិពលានិ.

កតមានិ ទស តថាគតពលានិ? ឥធ តថាគតោ ឋានញ្ច ឋានតោ អដ្ឋានញ្ច អដ្ឋានតោ យថាភូតំ បជានាតិ. យម្បិ តថាគតោ ឋានញ្ច ឋានតោ អដ្ឋានញ្ច អដ្ឋានតោ យថាភូតំ បជានាតិ, ឥទម្បិ តថាគតស្ស តថាគតពលំ ហោតិ, យំ ពលំ អាគម្ម តថាគតោ អាសភំ ឋានំ បដិជានាតិ បរិសាសុ សីហនាទំ នទតិ, ព្រហ្មចក្កំ បវត្តេតិ.

បុន ចបរំ តថាគតោ អតីតានាគតបច្ចុប្បន្នានំ កម្មសមាទានានំ ឋានសោ ហេតុសោ វិបាកំ យថាភូតំ បជានាតិ. យម្បិ តថាគតោ អតីតានាគតបច្ចុប្បន្នានំ កម្មសមាទានានំ ឋានសោ ហេតុសោ វិបាកំ យថាភូតំ បជានាតិ, ឥទម្បិ តថាគតស្ស តថាគតពលំ ហោតិ, យំ ពលំ អាគម្ម តថាគតោ អាសភំ ឋានំ បដិជានាតិ, បរិសាសុ សីហនាទំ, នទតិ, ព្រហ្មចក្កំ បវត្តេតិ.

បុន ចបរំ តថាគតោ សព្ពត្ថគាមិនិំ បដិបទំ [សព្ពត្ថគាមិនីបដិបទំ (ស្យា.) ម. និ. ១.១៤៨ បស្សិតព្ពា] យថាភូតំ បជានាតិ. យម្បិ តថាគតោ សព្ពត្ថគាមិនិំ បដិបទំ យថាភូតំ បជានាតិ, ឥទម្បិ តថាគតស្ស តថាគតពលំ ហោតិ, យំ ពលំ អាគម្ម តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

បុន ចបរំ តថាគតោ អនេកធាតុនានាធាតុលោកំ យថាភូតំ បជានាតិ. យម្បិ តថាគតោ អនេកធាតុនានាធាតុលោកំ យថាភូតំ បជានាតិ, ឥទម្បិ តថាគតស្ស…បេ….

បុន ចបរំ តថាគតោ សត្តានំ នានាធិមុត្តិកតំ យថាភូតំ បជានាតិ. យម្បិ តថាគតោ សត្តានំ នានាធិមុត្តិកតំ យថាភូតំ បជានាតិ, ឥទម្បិ តថាគតស្ស…បេ….

បុន ចបរំ តថាគតោ បរសត្តានំ បរបុគ្គលានំ ឥន្ទ្រិយបរោបរិយត្តំ យថាភូតំ បជានាតិ. យម្បិ តថាគតោ បរសត្តានំ បរបុគ្គលានំ ឥន្ទ្រិយបរោបរិយត្តំ យថាភូតំ បជានាតិ, ឥទម្បិ តថាគតស្ស…បេ….

បុន ចបរំ តថាគតោ ឈានវិមោក្ខសមាធិសមាបត្តីនំ សំកិលេសំ វោទានំ វុដ្ឋានំ យថាភូតំ បជានាតិ. យម្បិ តថាគតោ ឈានវិមោក្ខសមាធិសមាបត្តីនំ សំកិលេសំ វោទានំ វុដ្ឋានំ យថាភូតំ បជានាតិ, ឥទម្បិ តថាគតស្ស…បេ….

បុន ចបរំ តថាគតោ អនេកវិហិតំ បុព្ពេនិវាសំ អនុស្សរតិ, សេយ្យថិទំ – ឯកម្បិ ជាតិំ ទ្វេបិ ជាតិយោ…បេ… ឥតិ សាការំ សឧទ្ទេសំ អនេកវិហិតំ បុព្ពេនិវាសំ អនុស្សរតិ. យម្បិ តថាគតោ អនេកវិហិតំ បុព្ពេនិវាសំ អនុស្សរតិ. សេយ្យថិទំ – ឯកម្បិ ជាតិំ ទ្វេបិ ជាតិយោ…បេ… ឥទម្បិ តថាគតស្ស…បេ….

បុន ចបរំ តថាគតោ ទិព្ពេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ…បេ… យម្បិ តថាគតោ ទិព្ពេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ…បេ… ឥទម្បិ តថាគតស្ស…បេ….

បុន ចបរំ តថាគតោ អាសវានំ ខយា អនាសវំ ចេតោវិមុត្តិំ បញ្ញាវិមុត្តិំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ. យម្បិ តថាគតោ អាសវានំ ខយា អនាសវំ ចេតោវិមុត្តិំ បញ្ញាវិមុត្តិំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ, ឥទម្បិ តថាគតស្ស តថាគតពលំ ហោតិ, យំ ពលំ អាគម្ម តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ. ឥមានិ ទស តថាគតពលានិ.

៤៥. កេនដ្ឋេន សទ្ធាពលំ? កេនដ្ឋេន វីរិយពលំ? កេនដ្ឋេន សតិពលំ? កេនដ្ឋេន សមាធិពលំ? កេនដ្ឋេន បញ្ញាពលំ? កេនដ្ឋេន ហិរិពលំ? កេនដ្ឋេន ឱត្តប្បពលំ? កេនដ្ឋេន បដិសង្ខានពលំ…បេ… កេនដ្ឋេន តថាគតពលំ?

អស្សទ្ធិយេ អកម្បិយដ្ឋេន សទ្ធាពលំ. កោសជ្ជេ អកម្បិយដ្ឋេន វីរិយពលំ. បមាទេ អកម្បិយដ្ឋេន សតិពលំ. ឧទ្ធច្ចេ អកម្បិយដ្ឋេន សមាធិពលំ. អវិជ្ជាយ អកម្បិយដ្ឋេន បញ្ញាពលំ. ហិរីយតិ បាបកេ អកុសលេ ធម្មេតិ – ហិរិពលំ. ឱត្តប្បតិ បាបកេ អកុសលេ ធម្មេតិ – ឱត្តប្បពលំ. ញាណេន កិលេសេ បដិសង្ខាតីតិ – បដិសង្ខានពលំ. តត្ថ ជាតា ធម្មា ឯករសា ហោន្តីតិ – ភាវនាពលំ. តត្ថ នត្ថិ កិញ្ចិ វជ្ជន្តិ – អនវជ្ជពលំ. តេន ចិត្តំ សង្គណ្ហាតីតិ – សង្គហពលំ. តំ តស្ស ខមតីតិ – [តំ ខមតីតិ (ក.)] ខន្តិពលំ. តេន ចិត្តំ បញ្ញបេតីតិ – បញ្ញត្តិពលំ. តេន ចិត្តំ និជ្ឈាបេតីតិ – និជ្ឈត្តិពលំ. តេន ចិត្តំ វសំ វត្តេតីតិ – ឥស្សរិយពលំ. តេន ចិត្តំ អធិដ្ឋាតីតិ – អធិដ្ឋានពលំ. តេន ចិត្តំ ឯកគ្គន្តិ – សមថពលំ. តត្ថ ជាតេ ធម្មេ អនុបស្សតីតិ – វិបស្សនាពលំ. តត្ថ សិក្ខតីតិ – សេខពលំ. តត្ថ សិក្ខិតត្តា – អសេខពលំ. តេន អាសវា ខីណាតិ – ខីណាសវពលំ. តស្ស ឥជ្ឈតីតិ – ឥទ្ធិពលំ. អប្បមេយ្យដ្ឋេន តថាគតពលន្តិ.

ពលកថា និដ្ឋិតា.