៧. ធម្មចក្កកថា

១. សច្ចវារោ

៣៩. ឯកំ សមយំ ភគវា ពារាណសិយំ វិហរតិ…បេ… ឥតិ ហិទំ អាយស្មតោ កោណ្ឌញ្ញស្ស ‘‘អញ្ញាសិកោណ្ឌញ្ញោ’’ ត្វេវ នាមំ អហោសិ.

[ក] ‘‘ឥទំ ទុក្ខំ អរិយសច្ច’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ.

ចក្ខុំ ឧទបាទីតិ – កេនដ្ឋេន? ញាណំ ឧទបាទីតិ – កេនដ្ឋេន? បញ្ញា ឧទបាទីតិ – កេនដ្ឋេន? វិជ្ជា ឧទបាទីតិ – កេនដ្ឋេន? អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន. ញាណំ ឧទបាទីតិ – ញាតដ្ឋេន. បញ្ញា ឧទបាទីតិ – បជាននដ្ឋេន. វិជ្ជា ឧទបាទីតិ – បដិវេធដ្ឋេន. អាលោកោ ឧទបាទីតិ – ឱភាសដ្ឋេន.

ចក្ខុំ ធម្មោ, ទស្សនដ្ឋោ អត្ថោ. ញាណំ ធម្មោ, ញាតដ្ឋោ អត្ថោ. បញ្ញា ធម្មោ, បជាននដ្ឋោ អត្ថោ. វិជ្ជា ធម្មោ, បដិវេធដ្ឋោ អត្ថោ. អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា ទុក្ខវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា.

៤០. ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ. ចក្កញ្ច បវត្តេតិ ធម្មញ្ចាតិ – ធម្មចក្កំ. ធម្មេន បវត្តេតីតិ – ធម្មចក្កំ. ធម្មចរិយាយ បវត្តេតីតិ – ធម្មចក្កំ. ធម្មេ ឋិតោ បវត្តេតីតិ – ធម្មចក្កំ. ធម្មេ បតិដ្ឋិតោ បវត្តេតីតិ – ធម្មចក្កំ. ធម្មេ បតិដ្ឋាបេន្តោ បវត្តេតីតិ – ធម្មចក្កំ. ធម្មេ វសិប្បត្តោ បវត្តេតីតិ – ធម្មចក្កំ. ធម្មេ វសិំ បាបេន្តោ បវត្តេតីតិ – ធម្មចក្កំ. ធម្មេ បារមិប្បត្តោ បវត្តេតីតិ – ធម្មចក្កំ. ធម្មេ បារមិំ បាបេន្តោ បវត្តេតីតិ – ធម្មចក្កំ. ធម្មេ វេសារជ្ជប្បត្តោ បវត្តេតីតិ – ធម្មចក្កំ. ធម្មេ វេសារជ្ជំ បាបេន្តោ បវត្តេតីតិ – ធម្មចក្កំ. ធម្មំ សក្ករោន្តោ បវត្តេតីតិ – ធម្មចក្កំ. ធម្មំ គរុំ ករោន្តោ [គរុករោន្តោ (ស្យា.)] បវត្តេតីតិ – ធម្មចក្កំ. ធម្មំ មានេន្តោ បវត្តេតីតិ – ធម្មចក្កំ. ធម្មំ បូជេន្តោ បវត្តេតីតិ – ធម្មចក្កំ. ធម្មំ អបចាយមានោ បវត្តេតីតិ – ធម្មចក្កំ. ធម្មទ្ធជោ បវត្តេតីតិ – ធម្មចក្កំ. ធម្មកេតុ បវត្តេតីតិ – ធម្មចក្កំ. ធម្មាធិបតេយ្យោ បវត្តេតីតិ – ធម្មចក្កំ. តំ ខោ បន ធម្មចក្កំ អប្បដិវត្តិយំ សមណេន វា ព្រាហ្មណេន វា ទេវេន វា មារេន វា ព្រហ្មុនា វា កេនចិ វា លោកស្មិន្តិ – ធម្មចក្កំ.

សទ្ធិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. វីរិយិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. សតិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. សមាធិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. បញ្ញិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. សទ្ធាពលំ ធម្មោ. តំ ធម្មំ បវត្តេតីតិ – ធម្មចក្កំ. វីរិយពលំ ធម្មោ. តំ ធម្មំ បវត្តេតីតិ – ធម្មចក្កំ. សតិពលំ ធម្មោ. តំ ធម្មំ បវត្តេតីតិ – ធម្មចក្កំ. សមាធិពលំ ធម្មោ. តំ ធម្មំ បវត្តេតីតិ – ធម្មចក្កំ. បញ្ញាពលំ ធម្មោ. តំ ធម្មំ បវត្តេតីតិ – ធម្មចក្កំ. សតិសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. ធម្មវិចយសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. វីរិយសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. បីតិសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. បស្សទ្ធិសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. សមាធិសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. ឧបេក្ខាសម្ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. សម្មាទិដ្ឋិ ធម្មោ. តំ ធម្មំ បវត្តេតីតិ – ធម្មចក្កំ. សម្មាសង្កប្បោ ធម្មោ. តំ ធម្មំ បវត្តេតីតិ – ធម្មចក្កំ. សម្មាវាចា ធម្មោ. តំ ធម្មំ បវត្តេតីតិ – ធម្មចក្កំ. សម្មាកម្មន្តោ ធម្មោ. តំ ធម្មំ បវត្តេតីតិ – ធម្មចក្កំ. សម្មាអាជីវោ ធម្មោ. តំ ធម្មំ បវត្តេតីតិ – ធម្មចក្កំ. សម្មាវាយាមោ ធម្មោ. តំ ធម្មំ បវត្តេតីតិ – ធម្មចក្កំ. សម្មាសតិ ធម្មោ. តំ ធម្មំ បវត្តេតីតិ – ធម្មចក្កំ. សម្មាសមាធិ ធម្មោ. តំ ធម្មំ បវត្តេតីតិ – ធម្មចក្កំ.

អាធិបតេយ្យដ្ឋេន ឥន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ. អកម្បិយដ្ឋេន ពលំ ធម្មោ. តំ ធម្មំ បវត្តេតីតិ – ធម្មចក្កំ. និយ្យានិកដ្ឋេន ពោជ្ឈង្គោ ធម្មោ. តំ ធម្មំ បវត្តេតីតិ – ធម្មចក្កំ. ហេតុដ្ឋេន មគ្គោ ធម្មោ. តំ ធម្មំ បវត្តេតីតិ – ធម្មចក្កំ. ឧបដ្ឋានដ្ឋេន សតិបដ្ឋានា ធម្មោ. តំ ធម្មំ បវត្តេតីតិ – ធម្មចក្កំ. បទហនដ្ឋេន សម្មប្បធានា ធម្មោ. តំ ធម្មំ បវត្តេតីតិ – ធម្មចក្កំ. ឥជ្ឈនដ្ឋេន ឥទ្ធិបាទា ធម្មោ. តំ ធម្មំ បវត្តេតីតិ – ធម្មចក្កំ. តថដ្ឋេន សច្ចា ធម្មោ. តំ ធម្មំ បវត្តេតីតិ – ធម្មចក្កំ. អវិក្ខេបដ្ឋេន សមថោ ធម្មោ. តំ ធម្មំ បវត្តេតីតិ – ធម្មចក្កំ. អនុបស្សនដ្ឋេន វិបស្សនា ធម្មោ. តំ ធម្មំ បវត្តេតីតិ – ធម្មចក្កំ. ឯករសដ្ឋេន សមថវិបស្សនា ធម្មោ. តំ ធម្មំ បវត្តេតីតិ – ធម្មចក្កំ. អនតិវត្តនដ្ឋេន យុគនទ្ធំ ធម្មោ. តំ ធម្មំ បវត្តេតីតិ – ធម្មចក្កំ. សំវរដ្ឋេន សីលវិសុទ្ធិ ធម្មោ. តំ ធម្មំ បវត្តេតីតិ – ធម្មចក្កំ. អវិក្ខេបដ្ឋេន ចិត្តវិសុទ្ធិ ធម្មោ. តំ ធម្មំ បវត្តេតីតិ – ធម្មចក្កំ. ទស្សនដ្ឋេន ទិដ្ឋិវិសុទ្ធិ ធម្មោ. តំ ធម្មំ បវត្តេតីតិ – ធម្មចក្កំ. មុត្តដ្ឋេន វិមោក្ខោ ធម្មោ. តំ ធម្មំ បវត្តេតីតិ – ធម្មចក្កំ. បដិវេធដ្ឋេន វិជ្ជា ធម្មោ. តំ ធម្មំ បវត្តេតីតិ – ធម្មចក្កំ. បរិច្ចាគដ្ឋេន វិមុត្តិ ធម្មោ. តំ ធម្មំ បវត្តេតីតិ – ធម្មចក្កំ. សមុច្ឆេទដ្ឋេន ខយេ ញាណំ ធម្មោ. តំ ធម្មំ បវត្តេតីតិ – ធម្មចក្កំ. បដិប្បស្សទ្ធដ្ឋេន អនុប្បាទេ ញាណំ ធម្មោ. តំ ធម្មំ បវត្តេតីតិ – ធម្មចក្កំ. ឆន្ទោ មូលដ្ឋេន ធម្មោ. តំ ធម្មោ បវត្តេតីតិ – ធម្មចក្កំ. មនសិការោ សមុដ្ឋានដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. ផស្សោ សមោធានដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. វេទនា សមោសរណដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. សមាធិ បមុខដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. សតិ អាធិបតេយ្យដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. បញ្ញា តតុត្តរដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. វិមុត្តិ សារដ្ឋេន ធម្មោ. តំ ធម្មំ បវត្តេតីតិ – ធម្មចក្កំ. អមតោគធំ និព្ពានំ បរិយោសានដ្ឋេន ធម្មោ. តំ ធម្មំ បវត្តេតីតិ – ធម្មចក្កំ.

‘‘តំ ខោ បនិទំ ទុក្ខំ អរិយសច្ចំ បរិញ្ញេយ្យ’’ន្តិ…បេ… បរិញ្ញាតន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

ចក្ខុំ ឧទបាទីតិ – កេនដ្ឋេន…បេ… អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន…បេ… អាលោកោ ឧទបាទីតិ – ឱភាសដ្ឋេន. ចក្ខុំ ធម្មោ, ទស្សនដ្ឋោ អត្ថោ…បេ… អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា ទុក្ខវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា.

ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ. ចក្កញ្ច បវត្តេតិ ធម្មញ្ចាតិ – ធម្មចក្កំ. ធម្មេន បវត្តេតីតិ – ធម្មចក្កំ. ធម្មបរិយាយ បវត្តេតីតិ – ធម្មចក្កំ. ធម្មេ ឋិតោ បវត្តេតីតិ – ធម្មចក្កំ. ធម្មេ បតិដ្ឋិតោ បវត្តេតីតិ – ធម្មចក្កំ…បេ… អមតោគធំ និព្ពានំ បរិយោសានដ្ឋេន ធម្មោ តំ ធម្មំ បវត្តេតីតិ – ធម្មចក្កំ.

[ខ-ឃ] ‘‘ឥទំ ទុក្ខសមុទយំ អរិយសច្ច’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… ‘‘តំ ខោ បនិទំ ទុក្ខសមុទយំ អរិយសច្ចំ បហាតព្ព’’ន្តិ…បេ… ‘‘បហីន’’ន្តិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

ចក្ខុំ ឧទបាទីតិ – កេនដ្ឋេន…បេ… អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន…បេ… អាលោកោ ឧទបាទីតិ – ឱភាសដ្ឋេន.

ចក្ខុំ ធម្មោ, ទស្សនដ្ឋោ អត្ថោ…បេ… អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា សមុទយវត្ថុកា សច្ចវត្ថុកា…បេ… និរោធវត្ថុកា សច្ចវត្ថុកា…បេ… មគ្គវត្ថុកា សច្ចវត្ថុកា សច្ចារម្មណា សច្ចគោចរា សច្ចសង្គហិតា សច្ចបរិយាបន្នា សច្ចេ សមុទាគតា សច្ចេ ឋិតា សច្ចេ បតិដ្ឋិតា.

២. សតិបដ្ឋានវារោ

៤១. ‘‘‘អយំ កាយេ កាយានុបស្សនា’តិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. សា ខោ បនាយំ កាយេ កាយានុបស្សនា ភាវេតព្ពាតិ មេ, ភិក្ខវេ,…បេ… ភាវិតាតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ’’.

‘‘អយំ វេទនាសុ…បេ… អយំ ចិត្តេ… អយំ ធម្មេសុ ធម្មានុបស្សនាតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. សា ខោ បនាយំ ធម្មេសុ ធម្មានុបស្សនា ភាវេតព្ពាតិ មេ, ភិក្ខវេ…បេ… ភាវិតាតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ’’.

អយំ កាយេ កាយានុបស្សនាតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… សា ខោ បនាយំ កាយេ កាយានុបស្សនា ភាវេតព្ពាតិ…បេ… ភាវិតាតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

ចក្ខុំ ធម្មោ, ទស្សនដ្ឋោ អត្ថោ…បេ… អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា កាយវត្ថុកា សតិបដ្ឋានវត្ថុកា…បេ… វេទនាវត្ថុកា សតិបដ្ឋានវត្ថុកា… ចិត្តវត្ថុកា សតិបដ្ឋានវត្ថុកា… ធម្មវត្ថុកា សតិបដ្ឋានវត្ថុកា សតិបដ្ឋានារម្មណា សតិបដ្ឋានគោចរា សតិបដ្ឋានសង្គហិតា សតិបដ្ឋានបរិយាបន្នា សតិបដ្ឋានេ សមុទាគតា សតិបដ្ឋានេ ឋិតា សតិបដ្ឋានេ បតិដ្ឋិតា.

៣. ឥទ្ធិបាទវារោ

៤២. ‘‘‘អយំ ឆន្ទសមាធិបធានសង្ខារសមន្នាគតោ ឥទ្ធិបាទោ’តិ មេ, ភិក្ខវេ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. ‘សោ ខោ បនាយំ ឆន្ទសមាធិបធានសង្ខារសមន្នាគតោ ឥទ្ធិបាទោ ភាវេតព្ពោ’តិ មេ, ភិក្ខវេ…បេ… ភាវិតោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

‘‘អយំ វីរិយសមាធិ…បេ… អយំ ចិត្តសមាធិ…បេ… អយំ វីមំសាសមាធិបធានសង្ខារសមន្នាគតោ ឥទ្ធិបាទោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ. សោ ខោ បនាយំ វីមំសាសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ មេ, ភិក្ខវេ…បេ… ភាវិតោតិ មេ, ភិក្ខវេ, បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ’’.

អយំ ឆន្ទសមាធិបធានសង្ខារសមន្នាគតោ ឥទ្ធិបាទោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… សោ ខោ បនាយំ ឆន្ទសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ…បេ… ភាវិតោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ.

ចក្ខុំ ឧទបាទីតិ – កេនដ្ឋេន? ញាណំ ឧទបាទីតិ – កេនដ្ឋេន? បញ្ញា ឧទបាទីតិ – កេនដ្ឋេន? វិជ្ជា ឧទបាទីតិ – កេនដ្ឋេន? អាលោកោ ឧទបាទីតិ – កេនដ្ឋេន? ចក្ខុំ ឧទបាទីតិ – ទស្សនដ្ឋេន. ញាណំ ឧទបាទីតិ – ញាតដ្ឋេន. បញ្ញា ឧទបាទីតិ – បជាននដ្ឋេន. វិជ្ជា ឧទបាទីតិ – បដិវេធដ្ឋេន. អាលោកោ ឧទបាទីតិ – ឱភាសដ្ឋេន.

ចក្ខុំ ធម្មោ, ទស្សនដ្ឋោ អត្ថោ. ញាណំ ធម្មោ, ញាតដ្ឋោ អត្ថោ. បញ្ញា ធម្មោ, បជាននដ្ឋោ អត្ថោ. វិជ្ជា ធម្មោ, បដិវេធដ្ឋោ អត្ថោ. អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា ឆន្ទវត្ថុកា ឥទ្ធិបាទវត្ថុកា ឥទ្ធិបាទារម្មណា ឥទ្ធិបាទគោចរា ឥទ្ធិបាទសង្គហិតា ឥទ្ធិបាទបរិយាបន្នា ឥទ្ធិបាទេ សមុទាគតា ឥទ្ធិបាទេ ឋិតា ឥទ្ធិបាទេ បតិដ្ឋិតា.

ធម្មចក្កន្តិ កេនដ្ឋេន ធម្មចក្កំ? ធម្មញ្ច បវត្តេតិ ចក្កញ្ចាតិ – ធម្មចក្កំ. ចក្កញ្ច បវត្តេតិ ធម្មញ្ចាតិ – ធម្មចក្កំ. ធម្មេន បវត្តេតីតិ – ធម្មចក្កំ. ធម្មចរិយាយ បវត្តេតីតិ – ធម្មចក្កំ. ធម្មេ ឋិតោ បវត្តេតីតិ – ធម្មចក្កំ. ធម្មេ បតិដ្ឋិតោ បវត្តេតីតិ – ធម្មចក្កំ. ធម្មេ បតិដ្ឋាបេន្តោ បវត្តេតីតិ – ធម្មចក្កំ. ធម្មេ វសិប្បត្តោ បវត្តេតីតិ – ធម្មចក្កំ. ធម្មេ វសិំ បាបេន្តោ បវត្តេតីតិ – ធម្មចក្កំ. ធម្មេ បារមិប្បត្តោ បវត្តេតីតិ – ធម្មចក្កំ. ធម្មេ បារមិំ បាបេន្តោ បវត្តេតីតិ – ធម្មចក្កំ…បេ… ធម្មំ អបចាយមានោ បវត្តេតីតិ – ធម្មចក្កំ. ធម្មទ្ធជោ បវត្តេតីតិ – ធម្មចក្កំ. ធម្មកេតុ បវត្តេតីតិ – ធម្មចក្កំ. ធម្មាធិបតេយ្យោ បវត្តេតីតិ – ធម្មចក្កំ. តំ ខោ បន ធម្មចក្កំ អប្បដិវត្តិយំ សមណេន វា ព្រាហ្មណេន វា ទេវេន វា មារេន វា ព្រហ្មុនា វា កេនចិ វា លោកស្មិន្តិ – ធម្មចក្កំ.

សទ្ធិន្ទ្រិយំ ធម្មោ. តំ ធម្មំ បវត្តេតីតិ – ធម្មចក្កំ…បេ… អមតោគធំ និព្ពានំ បរិយោសានដ្ឋេន ធម្មោ. តំ ធម្មំ បវត្តេតីតិ – ធម្មចក្កំ.

អយំ វីរិយសមាធិបធានសង្ខារសមន្នាគតោ ឥទ្ធិបាទោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ…បេ… សោ ខោ បនាយំ វីរិយសមាធិបធានសង្ខារសមន្នាគតោ ឥទ្ធិបាទោ ភាវេតព្ពោតិ…បេ… ភាវិតោតិ បុព្ពេ អននុស្សុតេសុ ធម្មេសុ ចក្ខុំ ឧទបាទិ…បេ… អាលោកោ ឧទបាទិ.

ចក្ខុំ ធម្មោ, ទស្សនដ្ឋោ អត្ថោ…បេ… អាលោកោ ធម្មោ, ឱភាសដ្ឋោ អត្ថោ. ឥមេ បញ្ច ធម្មា បញ្ច អត្ថា វីរិយវត្ថុកា ឥទ្ធិបាទវត្ថុកា…បេ… ចិត្តវត្ថុកា ឥទ្ធិបាទវត្ថុកា… វីមំសាវត្ថុកា ឥទ្ធិបាទវត្ថុកា ឥទ្ធិបាទារម្មណា ឥទ្ធិបាទគោចរា ឥទ្ធិបាទសង្គហិតា ឥទ្ធិបាទបរិយាបន្នា ឥទ្ធិបាទេ សមុទាគតា ឥទ្ធិបាទេ ឋិតា ឥទ្ធិបាទេ បតិដ្ឋិតា.

ធម្មចក្កកថា និដ្ឋិតា.