៩. ឆពុទ្ធធម្មវារោ

៣៨. ‘‘‘យាវតា ឥន្ទ្រិយបរោបរិយត្តេ ញាណំ, ញាតំ ទិដ្ឋំ វិទិតំ សច្ឆិកតំ ផស្សិតំ បញ្ញាយ. អផស្សិតំ បញ្ញាយ ឥន្ទ្រិយបរោបរិយត្តេ ញាណំ នត្ថី’តិ – ចក្ខុំ ឧទបាទិ…បេ… អាលោកោ ឧទបាទិ’’. ឥន្ទ្រិយបរោបរិយត្តេ ញាណេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ.

‘‘‘យាវតា សត្តានំ អាសយានុសយេ ញាណំ…បេ… យាវតា យមកបាដិហីរេ ញាណំ …បេ… យាវតា មហាករុណាសមាបត្តិយា ញាណំ…បេ… យាវតា សព្ពញ្ញុតញ្ញាណំ…បេ… យាវតា អនាវរណំ ញាណំ, ញាតំ ទិដ្ឋំ វិទិតំ សច្ឆិកតំ ផស្សិតំ បញ្ញាយ. អផស្សិតំ បញ្ញាយ អនាវរណំ ញាណំ នត្ថី’តិ – ចក្ខុំ ឧទបាទិ, ញាណំ ឧទបាទិ, បញ្ញា ឧទបាទិ, វិជ្ជា ឧទបាទិ, អាលោកោ ឧទបាទិ’’. អនាវរណេ ញាណេ បញ្ចវីសតិ ធម្មា, បញ្ចវីសតិ អត្ថា, បញ្ញាស និរុត្តិយោ, សតំ ញាណានិ.

ឆសុ ពុទ្ធធម្មេសុ ទិយឌ្ឍសតំ ធម្មា, ទិយឌ្ឍសតំ អត្ថា, តីណិ និរុត្តិសតានិ, ឆ ញាណសតានិ.

បដិសម្ភិទាធិករណេ [បដិសម្ភិទាបករណេ (ស្យា.)] អឌ្ឍនវធម្មសតានិ [អឌ្ឍនវមានិ ធម្មសតានិ (ស្យា.), អឌ្ឍនវមធម្មសតានិ (ក.)], អឌ្ឍនវអត្ថសតានិ, និរុត្តិសហស្សញ្ច សត្ត ច និរុត្តិសតានិ, តីណិ ច ញាណសហស្សានិ, ចត្តារិ ច ញាណសតានីតិ.

បដិសម្ភិទាកថា និដ្ឋិតា.