៤. មគ្គង្គវារោ

២៦. សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា បស្សតិ. សម្មាទិដ្ឋិបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា អភិនិរោបេតិ. សម្មាសង្កប្បបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា បរិគ្គណ្ហាតិ. សម្មាវាចាបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា សមុដ្ឋាបេតិ. សម្មាកម្មន្តបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា វោទាបេតិ. សម្មាអាជីវបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា បគ្គណ្ហាតិ. សម្មាវាយាមបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា ឧបដ្ឋាបេតិ. សម្មាសតិបរិភាវិតា ហោតិ មេត្តាចេតោវិមុត្តិ.

សព្ពេ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា សមាទហតិ. សម្មាសមាធិបរិភាវិតា ហោតិ មេត្តាចេតោវិមុត្តិ.

ឥមេ អដ្ឋ មគ្គង្គា មេត្តាយ ចេតោវិមុត្តិយា អាសេវនា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ អាសេវីយតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា ភាវនា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ ភាវីយតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា ពហុលីកតា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ ពហុលីករីយតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា អលង្ការា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ ស្វាលង្កតា ហោន្តិ. ឥមេ អដ្ឋ មគ្គង្គា មេត្តាយ ចេតោវិមុត្តិយា បរិក្ខារា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ សុបរិក្ខតា ហោតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា បរិវារា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ សុបរិវុតា ហោតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា អាសេវនា ហោន្តិ, ភាវនា ហោន្តិ, ពហុលីកតា ហោន្តិ, អលង្ការា ហោន្តិ, បរិក្ខារា ហោន្តិ, បរិវារា ហោន្តិ, បារិបូរី ហោន្តិ, សហគតា ហោន្តិ, សហជាតា ហោន្តិ, សំសដ្ឋា ហោន្តិ, សម្បយុត្តា ហោន្តិ, បក្ខន្ទនា ហោន្តិ, បសីទនា ហោន្តិ, សន្តិដ្ឋនា ហោន្តិ, វិមុច្ចនា ហោន្តិ, ‘‘ឯតំ សន្ត’’ន្តិ ផស្សនា ហោន្តិ, យានីកតា ហោន្តិ, វត្ថុកតា ហោន្តិ, អនុដ្ឋិតា ហោន្តិ, បរិចិតា ហោន្តិ, សុសមារទ្ធា ហោន្តិ, សុភាវិតា ហោន្តិ, ស្វាធិដ្ឋិតា ហោន្តិ, សុសមុគ្គតា ហោន្តិ, សុវិមុត្តា ហោន្តិ និព្ពត្តេន្តិ ជោតេន្តិ បតាបេន្តិ.

២៧. សព្ពេសំ បាណានំ…បេ… សព្ពេសំ ភូតានំ… សព្ពេសំ បុគ្គលានំ… សព្ពេសំ អត្តភាវបរិយាបន្នានំ… សព្ពាសំ ឥត្ថីនំ… សព្ពេសំ បុរិសានំ… សព្ពេសំ អរិយានំ… សព្ពេសំ អនរិយានំ… សព្ពេសំ ទេវានំ… សព្ពេសំ មនុស្សានំ… សព្ពេសំ វិនិបាតិកានំ បីឡនំ វជ្ជេត្វា អបីឡនាយ, ឧបឃាតំ វជ្ជេត្វា អនុបឃាតេន, សន្តាបំ វជ្ជេត្វា អសន្តាបេន, បរិយាទានំ វជ្ជេត្វា អបរិយាទានេន, វិហេសំ វជ្ជេត្វា អវិហេសាយ, សព្ពេ វិនិបាតិកា អវេរិនោ ហោន្តុ មា វេរិនោ, សុខិនោ ហោន្តុ មា ទុក្ខិនោ, សុខិតត្តា ហោន្តុ មា ទុក្ខិតត្តាតិ – ឥមេហិ អដ្ឋហាការេហិ សព្ពេ វិនិបាតិកេ មេត្តាយតីតិ – មេត្តា. តំ ធម្មំ ចេតយតីតិ – ចេតោ. សព្ពព្យាបាទបរិយុដ្ឋានេហិ វិមុច្ចតីតិ – វិមុត្តិ. មេត្តា ច ចេតោ ច វិមុត្តិ ចាតិ – មេត្តាចេតោវិមុត្តិ.

សព្ពេ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សទ្ធាយ អធិមុច្ចតិ. សទ្ធិន្ទ្រិយបរិភាវិតា ហោតិ មេត្តាចេតោវិមុត្តិ…បេ… និព្ពត្តេន្តិ ជោតេន្តិ បតាបេន្តិ.

សព្ពេសំ បុរត្ថិមាយ ទិសាយ សត្តានំ…បេ… សព្ពេសំ បច្ឆិមាយ ទិសាយ សត្តានំ… សព្ពេសំ ឧត្តរាយ ទិសាយ សត្តានំ… សព្ពេសំ ទក្ខិណាយ ទិសាយ សត្តានំ… សព្ពេសំ បុរត្ថិមាយ អនុទិសាយ សត្តានំ… សព្ពេសំ បច្ឆិមាយ អនុទិសាយ សត្តានំ… សព្ពេសំ ឧត្តរាយ អនុទិសាយ សត្តានំ… សព្ពេសំ ទក្ខិណាយ អនុទិសាយ សត្តានំ… សព្ពេសំ ហេដ្ឋិមាយ ទិសាយ សត្តានំ… សព្ពេសំ ឧបរិមាយ ទិសាយ សត្តានំ បីឡនំ វជ្ជេត្វា អបីឡនាយ, ឧបឃាតំ វជ្ជេត្វា អនុបឃាតេន, សន្តាបំ វជ្ជេត្វា អសន្តាបេន, បរិយាទានំ វជ្ជេត្វា អបរិយាទានេន, វិហេសំ វជ្ជេត្វា អវិហេសាយ, សព្ពេ ឧបរិមាយ ទិសាយ សត្តា អវេរិនោ ហោន្តុ មា វេរិនោ, សុខិនោ ហោន្តុ មា ទុក្ខិនោ, សុខិតត្តា ហោន្តុ មា ទុក្ខិតត្តាតិ – ឥមេហិ អដ្ឋហាការេហិ សព្ពេ ឧបរិមាយ ទិសាយ សត្តេ មេត្តាយតីតិ – មេត្តា. តំ ធម្មំ ចេតយតីតិ – ចេតោ. សព្ពព្យាបាទបរិយុដ្ឋានេហិ វិមុច្ចតីតិ – វិមុត្តិ. មេត្តា ច ចេតោ ច វិមុត្តិ ចាតិ – មេត្តាចេតោវិមុត្តិ.

សព្ពេ ឧបរិមាយ ទិសាយ សត្តា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សទ្ធាយ អធិមុច្ចតិ. សទ្ធិន្ទ្រិយបរិភាវិតា ហោតិ មេត្តាចេតោវិមុត្តិ…បេ… និព្ពត្តេន្តិ ជោតេន្តិ បតាបេន្តិ.

សព្ពេសំ បុរត្ថិមាយ ទិសាយ បាណានំ…បេ… ភូតានំ… បុគ្គលានំ អត្តភាវបរិយាបន្នានំ… សព្ពាសំ ឥត្ថីនំ… សព្ពេសំ បុរិសានំ… សព្ពេសំ អរិយានំ… សព្ពេសំ អនរិយានំ… សព្ពេសំ ទេវានំ… សព្ពេសំ មនុស្សានំ… សព្ពេសំ វិនិបាតិកានំ… សព្ពេសំ បច្ឆិមាយ ទិសាយ វិនិបាតិកានំ… សព្ពេសំ ឧត្តរាយ ទិសាយ វិនិបាតិកានំ… សព្ពេសំ ទក្ខិណាយ ទិសាយ វិនិបាតិកានំ… សព្ពេសំ បុរត្ថិមាយ អនុទិសាយ វិនិបាតិកានំ… សព្ពេសំ បច្ឆិមាយ អនុទិសាយ វិនិបាតិកានំ… សព្ពេសំ ឧត្តរាយ អនុទិសាយ វិនិបាតិកានំ… សព្ពេសំ ទក្ខិណាយ អនុទិសាយ វិនិបាតិកានំ… សព្ពេសំ ហេដ្ឋិមាយ ទិសាយ វិនិបាតិកានំ… សព្ពេសំ ឧបរិមាយ ទិសាយ វិនិបាតិកានំ បីឡនំ វជ្ជេត្វា អបីឡនាយ, ឧបឃាតំ វជ្ជេត្វា អនុបឃាតេន, សន្តាបំ វជ្ជេត្វា អសន្តាបេន, បរិយាទានំ វជ្ជេត្វា អបរិយាទានេន, វិហេសំ វជ្ជេត្វា អវិហេសាយ, សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ មា វេរិនោ, សុខិនោ ហោន្តុ មា ទុក្ខិនោ, សុខិតត្តា ហោន្តុ មា ទុក្ខិតត្តាតិ – ឥមេហិ អដ្ឋហាការេហិ សព្ពេ ឧបរិមាយ ទិសាយ វិនិបាតិកេ មេត្តាយតីតិ – មេត្តា. តំ ធម្មំ ចេតយតីតិ – ចេតោ. សព្ពព្យាបាទបរិយុដ្ឋានេហិ វិមុច្ចតីតិ – វិមុត្តិ. មេត្តា ច ចេតោ ច វិមុត្តិ ចាតិ – មេត្តាចេតោវិមុត្តិ.

សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សទ្ធាយ អធិមុច្ចតិ. សទ្ធិន្ទ្រិយបរិភាវិតា ហោតិ មេត្តាចេតោវិមុត្តិ.

សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – វីរិយំ បគ្គណ្ហាតិ. វីរិយិន្ទ្រិយបរិភាវិតា ហោតិ មេត្តាចេតោវិមុត្តិ.

សតិំ ឧបដ្ឋាបេតិ. សតិន្ទ្រិយបរិភាវិតា ហោតិ មេត្តាចេតោវិមុត្តិ. ចិត្តំ សមាទហតិ. សមាធិន្ទ្រិយបរិភាវិតា ហោតិ មេត្តាចេតោវិមុត្តិ. បញ្ញាយ បជានាតិ. បញ្ញិន្ទ្រិយបរិភាវិតា ហោតិ មេត្តាចេតោវិមុត្តិ.

ឥមានិ បញ្ចិន្ទ្រិយានិ មេត្តាយ ចេតោវិមុត្តិយា អាសេវនា ហោន្តិ. ឥមេហិ បញ្ចហិ ឥន្ទ្រិយេហិ មេត្តាចេតោវិមុត្តិ អាសេវីយតិ…បេ… និព្ពត្តេន្តិ ជោតេន្តិ បតាបេន្តិ.

សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – អស្សទ្ធិយេ ន កម្បតិ. សទ្ធាពលបរិភាវិតា ហោតិ មេត្តាចេតោវិមុត្តិ. កោសជ្ជេ ន កម្បតិ. វីរិយពលបរិភាវិតា ហោតិ មេត្តាចេតោវិមុត្តិ. បមាទេ ន កម្បតិ. សតិពលបរិភាវិតា ហោតិ មេត្តាចេតោវិមុត្តិ. ឧទ្ធច្ចេ ន កម្បតិ. សមាធិពលបរិភាវិតា ហោតិ មេត្តាចេតោវិមុត្តិ. អវិជ្ជាយ ន កម្បតិ. បញ្ញាពលបរិភាវិតា ហោតិ មេត្តាចេតោវិមុត្តិ.

ឥមានិ បញ្ច ពលានិ មេត្តាយ ចេតោវិមុត្តិយា អាសេវនា ហោន្តិ. ឥមេហិ បញ្ចហិ ពលេហិ មេត្តាចេតោវិមុត្តិ អាសេវីយតិ…បេ… និព្ពត្តេន្តិ ជោតេន្តិ បតាបេន្តិ.

សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សតិំ ឧបដ្ឋាបេតិ. សតិសម្ពោជ្ឈង្គបរិភាវិតា ហោតិ មេត្តាចេតោវិមុត្តិ.

បញ្ញាយ បវិចិនាតិ. ធម្មវិចយសម្ពោជ្ឈង្គបរិភាវិតា ហោតិ មេត្តាចេតោវិមុត្តិ. វីរិយំ បគ្គណ្ហាតិ. វីរិយសម្ពោជ្ឈង្គបរិភាវិតា ហោតិ មេត្តាចេតោវិមុត្តិ. បរិឡាហំ បដិប្បស្សម្ភេតិ. បីតិសម្ពោជ្ឈង្គបរិភាវិតា ហោតិ មេត្តាចេតោវិមុត្តិ. ទុដ្ឋុល្លំ បដិប្បស្សម្ភេតិ. បស្សទ្ធិសម្ពោជ្ឈង្គបរិភាវិតា ហោតិ មេត្តាចេតោវិមុត្តិ. ចិត្តំ សមាទហតិ. សមាធិសម្ពោជ្ឈង្គបរិភាវិតា ហោតិ មេត្តាចេតោវិមុត្តិ. ញាណេន កិលេសេ បដិសង្ខាតិ. ឧបេក្ខាសម្ពោជ្ឈង្គបរិភាវិតា ហោតិ មេត្តាចេតោវិមុត្តិ.

ឥមេ សត្ត ពោជ្ឈង្គា មេត្តាយ ចេតោវិមុត្តិយា អាសេវនា ហោន្តិ. ឥមេហិ សត្តហិ ពោជ្ឈង្គេហិ មេត្តាចេតោវិមុត្តិ អាសេវីយតិ…បេ… និព្ពត្តេន្តិ ជោតេន្តិ បតាបេន្តិ.

សព្ពេ ឧបរិមាយ ទិសាយ វិនិបាតិកា អវេរិនោ ហោន្តុ, ខេមិនោ ហោន្តុ, សុខិនោ ហោន្តូតិ – សម្មា បស្សតិ. សម្មាទិដ្ឋិ បរិភាវិតា ហោតិ មេត្តាចេតោវិមុត្តិ. សម្មា អភិនិរោបេតិ. សម្មាសង្កប្បបរិភាវិតា ហោតិ មេត្តាចេតោវិមុត្តិ. សម្មា បរិគ្គណ្ហាតិ. សម្មាវាចាបរិភាវិតា ហោតិ មេត្តាចេតោវិមុត្តិ. សម្មា សមុដ្ឋាបេតិ. សម្មាកម្មន្តបរិភាវិតា ហោតិ មេត្តាចេតោវិមុត្តិ. សម្មា វោទាបេតិ. សម្មា អាជីវបរិភាវិតា ហោតិ មេត្តាចេតោវិមុត្តិ. សម្មា បគ្គណ្ហាតិ. សម្មាវាយាមបរិភាវិតា ហោតិ មេត្តាចេតោវិមុត្តិ. សម្មា ឧបដ្ឋាតិ. សម្មាសតិបរិភាវិតា ហោតិ មេត្តាចេតោវិមុត្តិ. សម្មា សមាទហតិ. សម្មាសមាធិបរិភាវិតា ហោតិ មេត្តាចេតោវិមុត្តិ.

ឥមេ អដ្ឋ មគ្គង្គា មេត្តាយ ចេតោវិមុត្តិយា អាសេវនា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ អាសេវីយតិ…បេ… ឥមេ អដ្ឋ មគ្គង្គា មេត្តាយ ចេតោវិមុត្តិយា បរិភាវិតា ហោន្តិ. ឥមេហិ អដ្ឋហិ មគ្គង្គេហិ មេត្តាចេតោវិមុត្តិ សុបរិវុតា ហោតិ. ឥមេ អដ្ឋ មគ្គង្គា មេត្តាយ ចេតោវិមុត្តិយា អាសេវនា ហោន្តិ, ភាវនា ហោន្តិ, ពហុលីកតា ហោន្តិ, អលង្ការា ហោន្តិ, បរិក្ខារា ហោន្តិ, បរិវារា ហោន្តិ, បារិបូរី ហោន្តិ, សហគតា ហោន្តិ, សហជាតា ហោន្តិ, សំសដ្ឋា ហោន្តិ, សម្បយុត្តា ហោន្តិ, បក្ខន្ទនា ហោន្តិ, បសីទនា ហោន្តិ, សន្តិដ្ឋនា ហោន្តិ, វិមុច្ចនា ហោន្តិ, ‘‘ឯតំ សន្ត’’ន្តិ ផស្សនា ហោន្តិ, យានីកតា ហោន្តិ, វត្ថុកតា ហោន្តិ, អនុដ្ឋិតា ហោន្តិ, បរិចិតា ហោន្តិ, សុសមារទ្ធា ហោន្តិ, សុភាវិតា ហោន្តិ, ស្វាធិដ្ឋិតា ហោន្តិ, សុសមុគ្គតា ហោន្តិ, សុវិមុត្តា ហោន្តិ និព្ពត្តេន្តិ ជោតេន្តិ បតាបេន្តីតិ.

មេត្តាកថា និដ្ឋិតា.