២. និទ្ទេសោ

៤៨. កតមំ សុញ្ញសុញ្ញំ? ចក្ខុ សុញ្ញំ អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. សោតំ សុញ្ញំ…បេ… ឃានំ សុញ្ញំ… ជិវ្ហា សុញ្ញា… កាយោ សុញ្ញោ… មនោ សុញ្ញោ អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. ឥទំ សុញ្ញសុញ្ញំ.

កតមំ សង្ខារសុញ្ញំ? តយោ សង្ខារា – បុញ្ញាភិសង្ខារោ, អបុញ្ញាភិសង្ខារោ, អានេញ្ជាភិសង្ខារោ. បុញ្ញាភិសង្ខារោ អបុញ្ញាភិសង្ខារេន ច អានេញ្ជាភិសង្ខារេន ច សុញ្ញោ. អបុញ្ញាភិសង្ខារោ បុញ្ញាភិសង្ខារេន ច អានេញ្ជាភិសង្ខារេន ច សុញ្ញោ. អានេញ្ជាភិសង្ខារោ បុញ្ញាភិសង្ខារេន ច អបុញ្ញាភិសង្ខារេន ច សុញ្ញោ. ឥមេ តយោ សង្ខារា.

អបរេបិ តយោ សង្ខារា – កាយសង្ខារោ, វចីសង្ខារោ, ចិត្តសង្ខារោ. កាយសង្ខារោ វចីសង្ខារេន ច ចិត្តសង្ខារេន ច សុញ្ញោ. វចីសង្ខារោ កាយសង្ខារេន ច ចិត្តសង្ខារេន ច សុញ្ញោ. ចិត្តសង្ខារោ កាយសង្ខារេន ច វចីសង្ខារេន ច សុញ្ញោ. ឥមេ តយោ សង្ខារា.

អបរេបិ តយោ សង្ខារា – អតីតា សង្ខារា, អនាគតា សង្ខារា, បច្ចុប្បន្នា សង្ខារា. អតីតា សង្ខារា អនាគតេហិ ច បច្ចុប្បន្នេហិ ច សង្ខារេហិ សុញ្ញា. អនាគតា សង្ខារា អតីតេហិ ច បច្ចុប្បន្នេហិ ច សង្ខារេហិ សុញ្ញា បច្ចុប្បន្នា សង្ខារា អតីតេហិ ច អនាគតេហិ ច សង្ខារេហិ សុញ្ញា. ឥមេ តយោ សង្ខារា; ឥទំ សង្ខារសុញ្ញំ.

កតមំ វិបរិណាមសុញ្ញំ? ជាតំ រូបំ សភាវេន សុញ្ញំ. វិគតំ រូបំ វិបរិណតញ្ចេវ សុញ្ញញ្ច. ជាតា វេទនា សភាវេន សុញ្ញា. វិគតា វេទនា វិបរិណតា ចេវ សុញ្ញា ច …បេ… ជាតា សញ្ញា… ជាតា សង្ខារា… ជាតំ វិញ្ញាណំ… ជាតំ ចក្ខុ…បេ… ជាតោ ភវោ សភាវេន សុញ្ញោ. វិគតោ ភវោ វិបរិណតោ ចេវ សុញ្ញោ ច. ឥទំ វិបរិណាមសុញ្ញំ.

កតមំ អគ្គសុញ្ញំ? អគ្គមេតំ បទំ សេដ្ឋមេតំ បទំ វិសិដ្ឋមេតំ [វិសេដ្ឋមេតំ (ក.)] បទំ យទិទំ សព្ពសង្ខារសមថោ សព្ពូបធិបដិនិស្សគ្គោ តណ្ហក្ខយោ វិរាគោ និរោធោ និព្ពានំ. ឥទំ អគ្គសុញ្ញំ.

កតមំ លក្ខណសុញ្ញំ? ទ្វេ លក្ខណានិ – ពាលលក្ខណញ្ច បណ្ឌិតលក្ខណញ្ច. ពាលលក្ខណំ បណ្ឌិតលក្ខណេន សុញ្ញំ. បណ្ឌិតលក្ខណំ ពាលលក្ខណេន សុញ្ញំ. តីណិ លក្ខណានិ – ឧប្បាទលក្ខណំ, វយលក្ខណំ, ឋិតញ្ញថត្តលក្ខណំ. ឧប្បាទលក្ខណំ វយលក្ខណេន ច ឋិតញ្ញថត្តលក្ខណេន ច សុញ្ញំ. វយលក្ខណំ ឧប្បាទលក្ខណេន ច ឋិតញ្ញថត្តលក្ខណេន ច សុញ្ញំ, ឋិតញ្ញថត្តលក្ខណំ ឧប្បាទលក្ខណេន ច វយលក្ខណេន ច សុញ្ញំ.

រូបស្ស ឧប្បាទលក្ខណំ វយលក្ខណេន ច ឋិតញ្ញថត្តលក្ខណេន ច សុញ្ញំ. រូបស្ស វយលក្ខណំ ឧប្បាទលក្ខណេន ច ឋិតញ្ញថត្តលក្ខណេន ច សុញ្ញំ. រូបស្ស ឋិតញ្ញថត្តលក្ខណំ ឧប្បាទលក្ខណេន ច វយលក្ខណេន ច សុញ្ញំ. វេទនាយ…បេ… សញ្ញាយ… សង្ខារានំ… វិញ្ញាណស្ស… ចក្ខុស្ស… ជរាមរណស្ស ឧប្បាទលក្ខណំ វយលក្ខណេន ច ឋិតញ្ញថត្តលក្ខណេន ច សុញ្ញំ. ជរាមរណស្ស វយលក្ខណំ ឧប្បាទលក្ខណេន ច ឋិតញ្ញថត្តលក្ខណេន ច សុញ្ញំ. ជរាមរណស្ស ឋិតញ្ញថត្តលក្ខណំ ឧប្បាទលក្ខណេន ច វយលក្ខណេន ច សុញ្ញំ. ឥទំ លក្ខណសុញ្ញំ.

កតមំ វិក្ខម្ភនសុញ្ញំ? នេក្ខម្មេន កាមច្ឆន្ទោ វិក្ខម្ភិតោ ចេវ សុញ្ញោ ច. អព្យាបាទេន ព្យាបាទោ វិក្ខម្ភិតោ ចេវ សុញ្ញោ ច. អាលោកសញ្ញាយ ថិនមិទ្ធំ វិក្ខម្ភិតញ្ចេវ សុញ្ញញ្ច. អវិក្ខេបេន ឧទ្ធច្ចំ វិក្ខម្ភិតញ្ចេវ សុញ្ញញ្ច. ធម្មវវត្ថានេន វិចិកិច្ឆា វិក្ខម្ភិតា ចេវ សុញ្ញា ច. ញាណេន អវិជ្ជា វិក្ខម្ភិតា ចេវ សុញ្ញា ច. បាមោជ្ជេន អរតិ វិក្ខម្ភិតា ចេវ សុញ្ញា ច. បឋមេន ឈានេន នីវរណា វិក្ខម្ភិតា ចេវ សុញ្ញា ច…បេ… អរហត្តមគ្គេន សព្ពកិលេសា វិក្ខម្ភិតា ចេវ សុញ្ញា ច. ឥទំ វិក្ខម្ភនសុញ្ញំ.

កតមំ តទង្គសុញ្ញំ? នេក្ខម្មេន កាមច្ឆន្ទោ តទង្គសុញ្ញោ. អព្យាបាទេន ព្យាបាទោ តទង្គសុញ្ញោ. អាលោកសញ្ញាយ ថិនមិទ្ធំ តទង្គសុញ្ញំ. អវិក្ខេបេន ឧទ្ធច្ចំ តទង្គសុញ្ញំ. ធម្មវវត្ថានេន វិចិកិច្ឆា តទង្គសុញ្ញា. ញាណេន អវិជ្ជា តទង្គសុញ្ញា. បាមោជ្ជេន អរតិ តទង្គសុញ្ញា. បឋមេន ឈានេន នីវរណា តទង្គសុញ្ញា…បេ… វិវដ្ដនានុបស្សនាយ សញ្ញោគាភិនិវេសោ តទង្គសុញ្ញោ. ឥទំ តទង្គសុញ្ញំ.

កតមំ សមុច្ឆេទសុញ្ញំ? នេក្ខម្មេន កាមច្ឆន្ទោ សមុច្ឆិន្នោ ចេវ សុញ្ញោ ច. អព្យាបាទេន ព្យាបាទោ សមុច្ឆិន្នោ ចេវ សុញ្ញោ ច. អាលោកសញ្ញាយ ថិនមិទ្ធំ សមុច្ឆិន្នញ្ចេវ សុញ្ញញ្ច. អវិក្ខេបេន ឧទ្ធច្ចំ សមុច្ឆិន្នញ្ចេវ សុញ្ញញ្ច. ធម្មវវត្ថានេន វិចិកិច្ឆា សមុច្ឆិន្នា ចេវ សុញ្ញា ច. ញាណេន អវិជ្ជា សមុច្ឆិន្នា ចេវ សុញ្ញា ច. បាមោជ្ជេន អរតិ សមុច្ឆិន្នា ចេវ សុញ្ញា ច. បឋមេន ឈានេន នីវរណា សមុច្ឆិន្នា ចេវ សុញ្ញា ច…បេ… អរហត្តមគ្គេន សព្ពកិលេសា សមុច្ឆិន្នា ចេវ សុញ្ញា ច. ឥទំ សមុច្ឆេទសុញ្ញំ.

កតមំ បដិប្បស្សទ្ធិសុញ្ញំ? នេក្ខម្មេន កាមច្ឆន្ទោ បដិប្បស្សទ្ធោ ចេវ សុញ្ញោ ច. អព្យាបាទេន ព្យាបាទោ បដិប្បស្សទ្ធោ ចេវ សុញ្ញោ ច. អាលោកសញ្ញាយ ថិនមិទ្ធំ បដិប្បស្សទ្ធញ្ចេវ សុញ្ញញ្ច. អវិក្ខេបេន ឧទ្ធច្ចំ បដិប្បស្សទ្ធញ្ចេវ សុញ្ញញ្ច. ធម្មវវត្ថានេន វិចិកិច្ឆា បដិប្បស្សទ្ធា ចេវ សុញ្ញា ច. ញាណេន អវិជ្ជា បដិប្បស្សទ្ធា ចេវ សុញ្ញា ច. បាមោជ្ជេន អរតិ បដិប្បស្សទ្ធា ចេវ សុញ្ញា ច. បឋមេន ឈានេន នីវរណា បដិប្បស្សទ្ធា ចេវ សុញ្ញា ច…បេ… អរហត្តមគ្គេន សព្ពកិលេសា បដិប្បស្សទ្ធា ចេវ សុញ្ញា ច. ឥទំ បដិប្បស្សទ្ធិសុញ្ញំ.

កតមំ និស្សរណសុញ្ញំ? នេក្ខម្មេន កាមច្ឆន្ទោ និស្សដោ ចេវ សុញ្ញោ ច. អព្យាបាទេន ព្យាបាទោ និស្សដោ ចេវ សុញ្ញោ ច. អាលោកសញ្ញាយ ថិនមិទ្ធំ និស្សដញ្ចេវ សុញ្ញញ្ច. អវិក្ខេបេន ឧទ្ធច្ចំ និស្សដញ្ចេវ សុញ្ញញ្ច. ធម្មវវត្ថានេន វិចិកិច្ឆា និស្សដា ចេវ សុញ្ញា ច. ញាណេន អវិជ្ជា និស្សដា ចេវ សុញ្ញា ច. បាមោជ្ជេន អរតិ និស្សដា ចេវ សុញ្ញា ច. បឋមេន ឈានេន នីវរណា និស្សដា ចេវ សុញ្ញា ច …បេ… អរហត្តមគ្គេន សព្ពកិលេសា និស្សដា ចេវ សុញ្ញា ច. ឥទំ និស្សរណសុញ្ញំ.

កតមំ អជ្ឈត្តសុញ្ញំ? អជ្ឈត្តំ ចក្ខុំ សុញ្ញំ អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. អជ្ឈត្តំ សោតំ សុញ្ញំ… អជ្ឈត្តំ ឃានំ សុញ្ញំ… អជ្ឈត្តំ ជិវ្ហា សុញ្ញា… អជ្ឈត្តំ កាយោ សុញ្ញោ… អជ្ឈត្តំ មនោ សុញ្ញោ អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. ឥទំ អជ្ឈត្តសុញ្ញំ.

កតមំ ពហិទ្ធាសុញ្ញំ? ពហិទ្ធា រូបា សុញ្ញា…បេ… ពហិទ្ធា ធម្មា សុញ្ញា អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. ឥទំ ពហិទ្ធាសុញ្ញំ.

កតមំ ទុភតោសុញ្ញំ? យញ្ច អជ្ឈត្តំ ចក្ខុ យេ ច ពហិទ្ធា រូបា ឧភយមេតំ សុញ្ញំ [ឧភយតោ តំ សុញ្ញា (ស្យា.)] អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. យញ្ច អជ្ឈត្តំ សោតំ យេ ច ពហិទ្ធា សទ្ទា…បេ… យញ្ច អជ្ឈត្តំ ឃានំ យេ ច ពហិទ្ធា គន្ធា… យា ច អជ្ឈត្តំ ជិវ្ហា យេ ច ពហិទ្ធា រសា… យោ ច អជ្ឈត្តំ កាយោ យេ ច ពហិទ្ធា ផោដ្ឋព្ពា… យោ ច អជ្ឈត្តំ មនោ យេ ច ពហិទ្ធា ធម្មា ឧភយមេតំ សុញ្ញំ អត្តេន វា អត្តនិយេន វា និច្ចេន វា ធុវេន វា សស្សតេន វា អវិបរិណាមធម្មេន វា. ឥទំ ទុភតោសុញ្ញំ.

កតមំ សភាគសុញ្ញំ? ឆ អជ្ឈត្តិកានិ អាយតនានិ សភាគានិ ចេវ សុញ្ញានិ ច. ឆ ពាហិរានិ អាយតនានិ សភាគានិ ចេវ សុញ្ញានិ ច. ឆ វិញ្ញាណកាយា សភាគា ចេវ សុញ្ញា ច. ឆ ផស្សកាយា សភាគា ចេវ សុញ្ញា ច. ឆ វេទនាកាយា សភាគា ចេវ សុញ្ញា ច. ឆ សញ្ញាកាយា សភាគា ចេវ សុញ្ញា ច. ឆ ចេតនាកាយា សភាគា ចេវ សុញ្ញា ច. ឥទំ សភាគសុញ្ញំ.

កតមំ វិសភាគសុញ្ញំ? ឆ អជ្ឈត្តិកានិ អាយតនានិ ឆហិ ពាហិរេហិ អាយតនេហិ វិសភាគានិ ចេវ សុញ្ញានិ ច. ឆ ពាហិរានិ អាយតនានិ ឆហិ វិញ្ញាណកាយេហិ វិសភាគានិ ចេវ សុញ្ញានិ ច. ឆ វិញ្ញាណកាយា ឆហិ ផស្សកាយេហិ វិសភាគា ចេវ សុញ្ញា ច. ឆ ផស្សកាយា ឆហិ វេទនាកាយេហិ វិសភាគា ចេវ សុញ្ញា ច. ឆ វេទនាកាយា ឆហិ សញ្ញាកាយេហិ វិសភាគា ចេវ សុញ្ញា ច. ឆ សញ្ញាកាយា ឆហិ ចេតនាកាយេហិ វិសភាគា ចេវ សុញ្ញា ច. ឥទំ វិសភាគសុញ្ញំ.

កតមំ ឯសនាសុញ្ញំ? នេក្ខម្មេសនា កាមច្ឆន្ទេន សុញ្ញា. អព្យាបាទេសនា ព្យាបាទេន សុញ្ញា. អាលោកសញ្ញេសនា ថិនមិទ្ធេន សុញ្ញា. អវិក្ខេបេសនា ឧទ្ធច្ចេន សុញ្ញា. ធម្មវវត្ថានេសនា វិចិកិច្ឆាយ សុញ្ញា. ញាណេសនា អវិជ្ជាយ សុញ្ញា. បាមោជ្ជេសនា អរតិយា សុញ្ញា. បឋមជ្ឈានេសនា នីវរណេហិ សុញ្ញា…បេ… អរហត្តមគ្គេសនា សព្ពកិលេសេហិ សុញ្ញា. ឥទំ ឯសនាសុញ្ញំ.

កតមំ បរិគ្គហសុញ្ញំ? នេក្ខម្មបរិគ្គហោ កាមច្ឆន្ទេន សុញ្ញោ. អព្យាបាទបរិគ្គហោ ព្យាបាទេន សុញ្ញោ. អាលោកសញ្ញាបរិគ្គហោ ថិនមិទ្ធេន សុញ្ញោ. អវិក្ខេបបរិគ្គហោ ឧទ្ធច្ចេន សុញ្ញោ. ធម្មវវត្ថានបរិគ្គហោ វិចិកិច្ឆាយ សុញ្ញោ. ញាណបរិគ្គហោ អវិជ្ជាយ សុញ្ញោ. បាមោជ្ជបរិគ្គហោ អរតិយា សុញ្ញោ. បឋមជ្ឈានបរិគ្គហោ នីវរណេហិ សុញ្ញោ…បេ… អរហត្តមគ្គបរិគ្គហោ សព្ពកិលេសេហិ សុញ្ញោ. ឥទំ បរិគ្គហសុញ្ញំ.

កតមំ បដិលាភសុញ្ញំ? នេក្ខម្មបដិលាភោ កាមច្ឆន្ទេន សុញ្ញោ. អព្យាបាទបដិលាភោ ព្យាបាទេន សុញ្ញោ. អាលោកសញ្ញាបដិលាភោ ថិនមិទ្ធេន សុញ្ញោ. អវិក្ខេបបដិលាភោ ឧទ្ធច្ចេន សុញ្ញោ. ធម្មវវត្ថានបដិលាភោ វិចិកិច្ឆាយ សុញ្ញោ. ញាណបដិលាភោ អវិជ្ជាយ សុញ្ញោ. បាមោជ្ជបដិលាភោ អរតិយា សុញ្ញោ. បឋមជ្ឈានបដិលាភោ នីវរណេហិ សុញ្ញោ…បេ… អរហត្តមគ្គបដិលាភោ សព្ពកិលេសេហិ សុញ្ញោ. ឥទំ បដិលាភសុញ្ញំ.

កតមំ បដិវេធសុញ្ញំ? នេក្ខម្មប្បដិវេធោ កាមច្ឆន្ទេន សុញ្ញោ. អព្យាបាទប្បដិវេធោ ព្យាបាទេន សុញ្ញោ. អាលោកសញ្ញាប្បដិវេធោ ថិនមិទ្ធេន សុញ្ញោ. អវិក្ខេបប្បដិវេធោ ឧទ្ធច្ចេន សុញ្ញោ. ធម្មវវត្ថានប្បដិវេធោ វិចិកិច្ឆាយ សុញ្ញោ. ញាណប្បដិវេធោ អវិជ្ជាយ សុញ្ញោ. បាមោជ្ជប្បដិវេធោ អរតិយា សុញ្ញោ. បឋមជ្ឈានប្បដិវេធោ នីវរណេហិ សុញ្ញោ…បេ… អរហត្តមគ្គប្បដិវេធោ សព្ពកិលេសេហិ សុញ្ញោ. ឥទំ បដិវេធសុញ្ញំ.

កតមំ ឯកត្តសុញ្ញំ, នានត្តសុញ្ញំ? កាមច្ឆន្ទោ នានត្តំ, នេក្ខម្មំ ឯកត្តំ. នេក្ខម្មេកត្តំ ចេតយតោ កាមច្ឆន្ទេន សុញ្ញំ. ព្យាបាទោ នានត្តំ, អព្យាបាទោ ឯកត្តំ. អព្យាបាទេកត្តំ ចេតយតោ ព្យាបាទេន សុញ្ញំ. ថិនមិទ្ធំ នានត្តំ, អាលោកសញ្ញា ឯកត្តំ. អាលោកសញ្ញេកត្តំ ចេតយតោ ថិនមិទ្ធេន សុញ្ញំ. ឧទ្ធច្ចំ នានត្តំ, អវិក្ខេបោ ឯកត្តំ. អវិក្ខេបេកត្តំ ចេតយតោ ឧទ្ធច្ចេន សុញ្ញំ. វិចិកិច្ឆា នានត្តំ, ធម្មវវត្ថានំ ឯកត្តំ. ធម្មវវត្ថានេកត្តំ ចេតយតោ វិចិកិច្ឆាយ សុញ្ញំ. អវិជ្ជា នានត្តំ, ញាណំ ឯកត្តំ. ញាណេកត្តំ ចេតយតោ អវិជ្ជាយ សុញ្ញំ. អរតិ នានត្តំ, បាមោជ្ជំ ឯកត្តំ. បាមោជ្ជេកត្តំ ចេតយតោ អរតិយា សុញ្ញំ. នីវរណា នានត្តំ, បឋមជ្ឈានំ ឯកត្តំ. បឋមជ្ឈានេកត្តំ ចេតយតោ នីវរណេហិ សុញ្ញំ…បេ… សព្ពកិលេសា នានត្តំ, អរហត្តមគ្គោ ឯកត្តំ. អរហត្តមគ្គេកត្តំ ចេតយតោ សព្ពកិលេសេហិ សុញ្ញំ. ឥទំ ឯកត្តសុញ្ញំ នានត្តសុញ្ញំ.

កតមំ ខន្តិសុញ្ញំ? នេក្ខម្មខន្តិ កាមច្ឆន្ទេន សុញ្ញា. អព្យាបាទខន្តិ ព្យាបាទេន សុញ្ញា. អាលោកសញ្ញាខន្តិ ថិនមិទ្ធេន សុញ្ញា. អវិក្ខេបខន្តិ ឧទ្ធច្ចេន សុញ្ញា. ធម្មវវត្ថានខន្តិ វិចិកិច្ឆាយ សុញ្ញា. ញាណខន្តិ អវិជ្ជាយ សុញ្ញា. បាមោជ្ជខន្តិ អរតិយា សុញ្ញា. បឋមជ្ឈានខន្តិ នីវរណេហិ សុញ្ញា…បេ… អរហត្តមគ្គខន្តិ សព្ពកិលេសេហិ សុញ្ញា. ឥទំ ខន្តិសុញ្ញំ.

កតមំ អធិដ្ឋានសុញ្ញំ? នេក្ខម្មាធិដ្ឋានំ កាមច្ឆន្ទេន សុញ្ញំ. អព្យាបាទាធិដ្ឋានំ ព្យាបាទេន សុញ្ញំ. អាលោកសញ្ញាធិដ្ឋានំ ថិនមិទ្ធេន សុញ្ញំ. អវិក្ខេបាធិដ្ឋានំ ឧទ្ធច្ចេន សុញ្ញំ. ធម្មវវត្ថានាធិដ្ឋានំ វិចិកិច្ឆាយ សុញ្ញំ. ញាណាធិដ្ឋានំ អវិជ្ជាយ សុញ្ញំ. បាមោជ្ជាធិដ្ឋានំ អរតិយា សុញ្ញំ. បឋមជ្ឈានាធិដ្ឋានំ នីវរណេហិ សុញ្ញំ…បេ… អរហត្តមគ្គាធិដ្ឋានំ សព្ពកិលេសេហិ សុញ្ញំ. ឥទំ អធិដ្ឋានសុញ្ញំ.

កតមំ បរិយោគាហណសុញ្ញំ? នេក្ខម្មបរិយោគាហណំ កាមច្ឆន្ទេន សុញ្ញំ. អព្យាបាទបរិយោគាហណំ ព្យាបាទេន សុញ្ញំ. អាលោកសញ្ញាបរិយោគាហណំ ថិនមិទ្ធេន សុញ្ញំ. អវិក្ខេបបរិយោគាហណំ ឧទ្ធច្ចេន សុញ្ញំ. ធម្មវវត្ថានបរិយោគាហណំ វិចិកិច្ឆាយ សុញ្ញំ. ញាណបរិយោគាហណំ អវិជ្ជាយ សុញ្ញំ. បាមោជ្ជបរិយោគាហណំ អរតិយា សុញ្ញំ. បឋមជ្ឈានបរិយោគាហណំ នីវរណេហិ សុញ្ញំ…បេ… អរហត្តមគ្គបរិយោគាហណំ សព្ពកិលេសេហិ សុញ្ញំ. ឥទំ បរិយោគាហណសុញ្ញំ.

កតមំ សម្បជានស្ស បវត្តបរិយាទានំ សព្ពសុញ្ញតានំ បរមត្ថសុញ្ញំ? ឥធ សម្បជានោ នេក្ខម្មេន កាមច្ឆន្ទស្ស បវត្តំ បរិយាទិយតិ, អព្យាបាទេន ព្យាបាទស្ស បវត្តំ បរិយាទិយតិ, អាលោកសញ្ញាយ ថិនមិទ្ធស្ស បវត្តំ បរិយាទិយតិ, អវិក្ខេបេន ឧទ្ធច្ចស្ស បវត្តំ បរិយាទិយតិ, ធម្មវវត្ថានេន វិចិកិច្ឆាយ បវត្តំ បរិយាទិយតិ, ញាណេន អវិជ្ជាយ បវត្តំ បរិយាទិយតិ, បាមោជ្ជេន អរតិយា បវត្តំ បរិយាទិយតិ, បឋមេន ឈានេន នីវរណានំ បវត្តំ បរិយាទិយតិ…បេ… អរហត្តមគ្គេន សព្ពកិលេសានំ បវត្តំ បរិយាទិយតិ. អថ វា បន សម្បជានស្ស អនុបាទិសេសាយ និព្ពានធាតុយា បរិនិព្ពាយន្តស្ស ឥទំ ចេវ ចក្ខុបវត្តំ បរិយាទិយតិ, អញ្ញញ្ច ចក្ខុបវត្តំ ន ឧប្បជ្ជតិ. ឥទញ្ចេវ សោតបវត្តំ…បេ… ឃានបវត្តំ… ជិវ្ហាបវត្តំ… កាយបវត្តំ… មនោបវត្តំ បរិយាទិយតិ, អញ្ញញ្ច មនោបវត្តំ ន ឧប្បជ្ជតិ. ឥទំ សម្បជានស្ស បវត្តបរិយាទានំ សព្ពសុញ្ញតានំ បរមត្ថសុញ្ញន្តិ.

សុញ្ញកថា និដ្ឋិតា.

យុគនទ្ធវគ្គោ ទុតិយោ.