៦. ញាណរាសិឆក្កនិទ្ទេសោ

១៨៣. កតមានិ ចតុវីសតិ សមាធិវសេន ញាណានិ? ទីឃំ អស្សាសវសេន ចិត្តស្ស ឯកគ្គតា អវិក្ខេបោ សមាធិ, ទីឃំ បស្សាសវសេន ចិត្តស្ស ឯកគ្គតា អវិក្ខេបោ សមាធិ…បេ… វិមោចយំ ចិត្តំ អស្សាសវសេន ចិត្តស្ស ឯកគ្គតា អវិក្ខេបោ សមាធិ, វិមោចយំ ចិត្តំ បស្សាសវសេន ចិត្តស្ស ឯកគ្គតា អវិក្ខេបោ សមាធិ. ឥមានិ ចតុវីសតិ សមាធិវសេន ញាណានិ.

កតមានិ ទ្វេសត្តតិ វិបស្សនាវសេន ញាណានិ? ទីឃំ អស្សាសំ អនិច្ចតោ អនុបស្សនដ្ឋេន វិបស្សនា, ទុក្ខតោ អនុបស្សនដ្ឋេន វិបស្សនា, អនត្តតោ អនុបស្សនដ្ឋេន វិបស្សនា, ទីឃំ បស្សាសំ អនិច្ចតោ អនុបស្សនដ្ឋេន វិបស្សនា, ទុក្ខតោ អនុបស្សនដ្ឋេន វិបស្សនា, អនត្តតោ អនុបស្សនដ្ឋេន វិបស្សនា…បេ… វិមោចយំ ចិត្តំ អស្សាសំ, វិមោចយំ ចិត្តំ បស្សាសំ អនិច្ចតោ អនុបស្សនដ្ឋេន វិបស្សនា, ទុក្ខតោ អនុបស្សនដ្ឋេន វិបស្សនា, អនត្តតោ អនុបស្សនដ្ឋេន វិបស្សនា. ឥមានិ ទ្វេសត្តតិ វិបស្សនាវសេន ញាណានិ.

កតមានិ អដ្ឋ និព្ពិទាញាណានិ? អនិច្ចានុបស្សី អស្សាសំ យថាភូតំ ជានាតិ បស្សតីតិ – និព្ពិទាញាណំ, អនិច្ចានុបស្សី បស្សាសំ យថាភូតំ ជានាតិ បស្សតីតិ – និព្ពិទាញាណំ…បេ… បដិនិស្សគ្គានុបស្សី អស្សាសំ យថាភូតំ ជានាតិ បស្សតីតិ – និព្ពិទាញាណំ, បដិនិស្សគ្គានុបស្សី បស្សាសំ យថាភូតំ ជានាតិ បស្សតីតិ – និព្ពិទាញាណំ. ឥមានិ អដ្ឋ និព្ពិទាញាណានិ.

កតមានិ អដ្ឋ និព្ពិទានុលោមេ ញាណានិ? អនិច្ចានុបស្សី អស្សាសំ ភយតុបដ្ឋានេ បញ្ញា និព្ពិទានុលោមេ ញាណំ, អនិច្ចានុបស្សី បស្សាសំ ភយតុបដ្ឋានេ បញ្ញា និព្ពិទានុលោមេ ញាណំ…បេ… បដិនិស្សគ្គានុបស្សី អស្សាសំ ភយតុបដ្ឋានេ បញ្ញា និព្ពិទានុលោមេ ញាណំ, បដិនិស្សគ្គានុបស្សី បស្សាសំ ភយតុបដ្ឋានេ បញ្ញា និព្ពិទានុលោមេ ញាណំ – ឥមានិ អដ្ឋ និព្ពិទានុលោមេ ញាណានិ.

កតមានិ អដ្ឋ និព្ពិទាបដិប្បស្សទ្ធិញាណានិ? អនិច្ចានុបស្សី អស្សាសំ បដិសង្ខា សន្តិដ្ឋនា បញ្ញា និព្ពិទាបដិប្បស្សទ្ធិញាណំ, អនិច្ចានុបស្សី បស្សាសំ បដិសង្ខា សន្តិដ្ឋនា បញ្ញា និព្ពិទាបដិប្បស្សទ្ធិញាណំ…បេ… បដិនិស្សគ្គានុបស្សី អស្សាសំ បដិសង្ខា សន្តិដ្ឋនា បញ្ញា និព្ពិទាបដិប្បស្សទ្ធិញាណំ, បដិនិស្សគ្គានុបស្សី បស្សាសំ បដិសង្ខា សន្តិដ្ឋនា បញ្ញា និព្ពិទាបដិប្បស្សទ្ធិញាណំ – ឥមានិ អដ្ឋ និព្ពិទាបដិប្បស្សទ្ធិញាណានិ.

កតមានិ ឯកវីសតិ វិមុត្តិសុខេ ញាណានិ? សោតាបត្តិមគ្គេន សក្កាយទិដ្ឋិយា បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ, វិចិកិច្ឆាយ បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ, សីលព្ពតបរាមាសស្ស…បេ… ទិដ្ឋានុសយស្ស, វិចិកិច្ឆានុសយស្ស បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ, សកទាគាមិមគ្គេន ឱឡារិកស្ស, កាមរាគសញ្ញោជនស្ស…បេ… បដិឃសញ្ញោជនស្ស, ឱឡារិកស្ស កាមរាគានុសយស្ស, បដិឃានុសយស្ស បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ, អនាគាមិមគ្គេន អនុសហគតស្ស កាមរាគសញ្ញោជនស្ស…បេ… បដិឃសញ្ញោជនស្ស, អនុសហគតស្ស កាមរាគានុសយស្ស, បដិឃានុសយស្ស បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ, អរហត្តមគ្គេន, រូបរាគស្ស…បេ… អរូបរាគស្ស, មានស្ស, ឧទ្ធច្ចស្ស, អវិជ្ជាយ, មានានុសយស្ស, ភវរាគានុសយស្ស, អវិជ្ជានុសយស្ស បហីនត្តា សមុច្ឆិន្នត្តា ឧប្បជ្ជតិ វិមុត្តិសុខេ ញាណំ. ឥមានិ ឯកវីសតិ វិមុត្តិសុខេ ញាណានិ. សោឡសវត្ថុកំ អានាបានស្សតិសមាធិំ ភាវយតោ សមធិកានិ ឥមានិ ទ្វេ ញាណសតានិ ឧប្បជ្ជន្តិ.

ញាណរាសិឆក្កនិទ្ទេសោ ឆដ្ឋោ.

អានាបានស្សតិកថា [អានាបានកថា (ស្យា. ក.)] និដ្ឋិតា.