៩. បរិវត្តនហារវិភង្គោ

៣៥. តត្ថ កតមោ បរិវត្តនោ ហារោ? ‘‘កុសលាកុសលេ ធម្មេ’’តិ. សម្មាទិដ្ឋិស្ស បុរិសបុគ្គលស្ស មិច្ឆាទិដ្ឋិ និជ្ជិណ្ណា ភវតិ. យេ ចស្ស មិច្ឆាទិដ្ឋិបច្ចយា ឧប្បជ្ជេយ្យុំ អនេកេ [អនេកា (ក.)] បាបកា អកុសលា ធម្មា, តេ ចស្ស និជ្ជិណ្ណា ហោន្តិ. សម្មាទិដ្ឋិបច្ចយា ចស្ស អនេកេ កុសលា ធម្មា សម្ភវន្តិ, តេ ចស្ស ភាវនាបារិបូរិំ គច្ឆន្តិ. សម្មាសង្កប្បស្ស បុរិសបុគ្គលស្ស មិច្ឆាសង្កប្បោ និជ្ជិណ្ណោ ភវតិ. យេ ចស្ស មិច្ឆាសង្កប្បបច្ចយា ឧប្បជ្ជេយ្យុំ អនេកេ បាបកា អកុសលា ធម្មា, តេ ចស្ស និជ្ជិណ្ណា ហោន្តិ. សម្មាសង្កប្បបច្ចយា ចស្ស អនេកេ កុសលា ធម្មា សម្ភវន្តិ. តេ ចស្ស ភាវនាបារិបូរិំ គច្ឆន្តិ. ឯវំ សម្មាវាចស្ស សម្មាកម្មន្តស្ស សម្មាអាជីវស្ស សម្មាវាយាមស្ស សម្មាសតិស្ស សម្មាសមាធិស្ស សម្មាវិមុត្តស្ស សម្មាវិមុត្តិញាណទស្សនស្ស បុរិសបុគ្គលស្ស មិច្ឆាវិមុត្តិញាណទស្សនំ និជ្ជិណ្ណំ ភវតិ. យេ ចស្ស មិច្ឆាវិមុត្តិញាណទស្សនបច្ចយា ឧប្បជ្ជេយ្យុំ អនេកេ បាបកា អកុសលា ធម្មា, តេ ចស្ស និជ្ជិណ្ណា ហោន្តិ. សម្មាវិមុត្តិញាណទស្សនបច្ចយា ចស្ស អនេកេ កុសលា ធម្មា សម្ភវន្តិ, តេ ចស្ស ភាវនាបារិបូរិំ គច្ឆន្តិ.

៣៦. យស្ស វា បាណាតិបាតា បដិវិរតស្ស បាណាតិបាតោ បហីនោ ហោតិ. អទិន្នាទានា បដិវិរតស្ស អទិន្នាទានំ បហីនំ ហោតិ. ព្រហ្មចារិស្ស អព្រហ្មចរិយំ បហីនំ ហោតិ. សច្ចវាទិស្ស មុសាវាទោ បហីនោ ហោតិ. អបិសុណវាចស្ស បិសុណា វាចា បហីនា ហោតិ. សណ្ហវាចស្ស ផរុសា វាចា បហីនា ហោតិ. កាលវាទិស្ស សម្ផប្បលាបោ បហីនោ ហោតិ. អនភិជ្ឈាលុស្ស [អនភិជ្ឈាមនស្ស (ក.)] អភិជ្ឈា បហីនា ហោតិ. អព្យាបន្នចិត្តស្ស ព្យាបាទោ បហីនោ ហោតិ. សម្មាទិដ្ឋិស្ស មិច្ឆាទិដ្ឋិ បហីនា ហោតិ.

យេ ច ខោ កេចិ អរិយំ អដ្ឋង្គិកំ មគ្គំ គរហន្តិ, នេសំ សន្ទិដ្ឋិកា សហធម្មិកា គារយ្ហា វាទានុវាទា អាគច្ឆន្តិ. សម្មាទិដ្ឋិញ្ច តេ ភវន្តោ ធម្មំ គរហន្តិ. តេន ហិ យេ មិច្ឆាទិដ្ឋិកា, តេសំ ភវន្តានំ បុជ្ជា ច បាសំសា ច. ឯវំ សម្មាសង្កប្បំ សម្មាវាចំ សម្មាកម្មន្តំ សម្មាអាជីវំ សម្មាវាយាមំ សម្មាសតិំ សម្មាសមាធិំ សម្មាវិមុត្តិំ សម្មាវិមុត្តិញាណទស្សនញ្ច តេ ភវន្តោ ធម្មំ គរហន្តិ. តេន ហិ យេ មិច្ឆាវិមុត្តិញាណទស្សនា, តេសំ ភវន្តានំ បុជ្ជា ច បាសំសា ច.

យេ ច ខោ កេចិ ឯវមាហំសុ ‘‘ភុញ្ជិតព្ពា កាមា, បរិភុញ្ជិតព្ពា កាមា, អាសេវិតព្ពា កាមា, និសេវិតព្ពា កាមា, ភាវយិតព្ពា កាមា, ពហុលីកាតព្ពា កាមា’’តិ. កាមេហិ វេរមណី តេសំ អធម្មោ.

យេ វា បន កេចិ ឯវមាហំសុ ‘‘អត្តកិលមថានុយោគោ ធម្មោ’’តិ. និយ្យានិកោ តេសំ ធម្មោ អធម្មោ. យេ ច ខោ កេចិ ឯវមាហំសុ ‘‘ទុក្ខោ ធម្មោ’’តិ. សុខោ តេសំ ធម្មោ អធម្មោ. យថា វា បន ភិក្ខុនោ សព្ពសង្ខារេសុ អសុភានុបស្សិនោ វិហរតោ សុភសញ្ញា បហីយន្តិ. ទុក្ខានុបស្សិនោ វិហរតោ សុខសញ្ញា បហីយន្តិ. អនិច្ចានុបស្សិនោ វិហរតោ និច្ចសញ្ញា បហីយន្តិ. អនត្តានុបស្សិនោ វិហរតោ អត្តសញ្ញា បហីយន្តិ. យំ យំ វា បន ធម្មំ រោចយតិ វា ឧបគច្ឆតិ វា, តស្ស តស្ស ធម្មស្ស យោ បដិបក្ខោ, ស្វស្ស អនិដ្ឋតោ អជ្ឈាបន្នោ ភវតិ. តេនាហ អាយស្មា មហាកច្ចាយនោ ‘‘កុសលាកុសលធម្មេ’’តិ.

និយុត្តោ បរិវត្តនោ ហារោ.