១៦. សមារោបនហារសម្បាតោ

៧៨. តត្ថ កតមោ សមារោបនោ ហារសម្បាតោ?

‘‘តស្មា រក្ខិតចិត្តស្ស, សម្មាសង្កប្បគោចរោ;

សម្មាទិដ្ឋិបុរេក្ខារោ, ញត្វាន ឧទយព្ពយំ;

ថិនមិទ្ធាភិភូ ភិក្ខុ, សព្ពា ទុគ្គតិយោ ជហេ’’តិ.

តស្មា រក្ខិតចិត្តស្សាតិ តិណ្ណំ សុចរិតានំ បទដ្ឋានំ, ចិត្តេ រក្ខិតេ តំ រក្ខិតំ ភវតិ កាយកម្មំ វចីកម្មំ មនោកម្មំ. សម្មាទិដ្ឋិបុរេក្ខារោតិ សម្មាទិដ្ឋិយា ភាវិតាយ ភាវិតោ ភវតិ អរិយោ អដ្ឋង្គិកោ មគ្គោ. កេន ការណេន? សម្មាទិដ្ឋិតោ ហិ សម្មាសង្កប្បោ បភវតិ, សម្មាសង្កប្បតោ សម្មាវាចា បភវតិ, សម្មាវាចាតោ សម្មាកម្មន្តោ បភវតិ, សម្មាកម្មន្តតោ សម្មាអាជីវោ បភវតិ, សម្មាអាជីវតោ សម្មាវាយាមោ បភវតិ, សម្មាវាយាមតោ សម្មាសតិ បភវតិ, សម្មាសតិតោ សម្មាសមាធិ បភវតិ, សម្មាសមាធិតោ សម្មាវិមុត្តិ បភវតិ, សម្មាវិមុត្តិតោ សម្មាវិមុត្តិញាណទស្សនំ បភវតិ. អយំ អនុបាទិសេសោ បុគ្គលោ អនុបាទិសេសា ច និព្ពានធាតុ.

និយុត្តោ សមារោបនោ ហារសម្បាតោ.

តេនាហ អាយស្មា មហាកច្ចាយនោ –

‘‘សោឡស ហារា បឋមំ, ទិសលោចនតោ ទិសា វិលោកេត្វា;

សង្ខិបិយ អង្កុសេន ហិ, នយេហិ តីហិ និទ្ទិសេ សុត្ត’’ន្តិ.

និយុត្តោ ហារសម្បាតោ.