៦. ចតុព្យូហហារសម្បាតោ

៦៨. តត្ថ កតមោ ចតុព្យូហោ ហារសម្បាតោ.

‘‘តស្មា រក្ខិតចិត្តស្ស, សម្មាសង្កប្បគោចរោ’’តិ គាថា. ‘‘តស្មា រក្ខិតចិត្តស្សា’’តិ រក្ខិតំ បរិបាលីយតីតិ ឯសា និរុត្តិ. ឥធ ភគវតោ កោ អធិប្បាយោ? យេ ទុគ្គតីហិ បរិមុច្ចិតុកាមា ភវិស្សន្តិ, តេ ធម្មចារិនោ ភវិស្សន្តីតិ អយំ ឯត្ថ ភគវតោ អធិប្បាយោ. កោកាលិកោ ហិ សារិបុត្តមោគ្គល្លានេសុ ថេរេសុ ចិត្តំ បទោសយិត្វា មហាបទុមនិរយេ ឧបបន្នោ. ភគវា ច សតិអារក្ខេន ចេតសា សមន្នាគតោ, សុត្តម្ហិ វុត្តំ ‘‘សតិយា ចិត្តំ រក្ខិតព្ព’’ន្តិ.

និយុត្តោ ចតុព្យូហោ ហារសម្បាតោ.