៥. ធោតកមាណវបុច្ឆា

៨៦. ‘‘បុច្ឆាមិ តំ ភគវា ព្រូហិ មេតំ, [ឥច្ចាយស្មា ធោតកោ]

វាចាភិកង្ខាមិ មហេសិ តុយ្ហំ;

តវ សុត្វាន និគ្ឃោសំ, សិក្ខេ និព្ពានមត្តនោ’’.

៨៧. ‘‘តេនហាតប្បំ ករោហិ, [ធោតកាតិ ភគវា]

ឥធេវ និបកោ សតោ;

ឥតោ សុត្វាន និគ្ឃោសំ, សិក្ខេ និព្ពានមត្តនោ’’.

៨៨. ‘‘បស្សាមហំ ទេវមនុស្សលោកេ, អកិញ្ចនំ ព្រាហ្មណមិរិយមានំ;

តំ តំ នមស្សាមិ សមន្តចក្ខុ, បមុញ្ច មំ សក្ក កថំកថាហិ’’.

៨៩. ‘‘នាហំ សហិស្សាមិ បមោចនាយ, កថំកថិំ ធោតក កញ្ចិ លោកេ;

ធម្មញ្ច សេដ្ឋំ អភិជានមានោ [អាជានមានោ (សី. ស្យា. បី.)], ឯវំ តុវំ ឱឃមិមំ តរេសិ’’.

៩០. ‘‘អនុសាស ព្រហ្មេ ករុណាយមានោ, វិវេកធម្មំ យមហំ វិជញ្ញំ;

យថាហំ អាកាសោវ អព្យាបជ្ជមានោ, ឥធេវ សន្តោ អសិតោ ចរេយ្យំ’’.

៩១. ‘‘កិត្តយិស្សាមិ តេ សន្តិំ, [ធោតកាតិ ភគវា]

ទិដ្ឋេ ធម្មេ អនីតិហំ;

យំ វិទិត្វា សតោ ចរំ, តរេ លោកេ វិសត្តិកំ’’.

៩២. ‘‘តញ្ចាហំ អភិនន្ទាមិ, មហេសិ សន្តិមុត្តមំ;

យំ វិទិត្វា សតោ ចរំ, តរេ លោកេ វិសត្តិកំ’’.

៩៣. ‘‘យំ កិញ្ចិ សម្បជានាសិ, [ធោតកាតិ ភគវា]

ឧទ្ធំ អធោ តិរិយញ្ចាបិ មជ្ឈេ;

ឯតំ វិទិត្វា សង្គោតិ លោកេ, ភវាភវាយ មាកាសិ តណ្ហ’’ន្តិ.

ធោតកមាណវបុច្ឆា បញ្ចមី.