៦. ឧបសីវមាណវបុច្ឆា

៩៤. ‘‘ឯកោ អហំ សក្ក មហន្តមោឃំ, [ឥច្ចាយស្មា ឧបសីវោ]

អនិស្សិតោ នោ វិសហាមិ តារិតុំ;

អារម្មណំ ព្រូហិ សមន្តចក្ខុ, យំ និស្សិតោ ឱឃមិមំ តរេយ្យំ’’.

៩៥. ‘‘អាកិញ្ចញ្ញំ បេក្ខមានោ សតិមា, [ឧបសីវាតិ ភគវា]

នត្ថីតិ និស្សាយ តរស្សុ ឱឃំ;

កាមេ បហាយ វិរតោ កថាហិ, តណ្ហក្ខយំ នត្តមហាភិបស្ស’’.

៩៦. ‘‘សព្ពេសុ កាមេសុ យោ វីតរាគោ, [ឥច្ចាយស្មា ឧបសីវោ]

អាកិញ្ចញ្ញំ និស្សិតោ ហិត្វា មញ្ញំ;

សញ្ញាវិមោក្ខេ បរមេ វិមុត្តោ [ធិមុត្តោ (ក.)], តិដ្ឋេ នុ សោ តត្ថ អនានុយាយី’’ [អនានុវាយី (ស្យា. ក.)].

៩៧. ‘‘សព្ពេសុ កាមេសុ យោ វីតរាគោ, [ឧបសីវាតិ ភគវា]

អាកិញ្ចញ្ញំ និស្សិតោ ហិត្វា មញ្ញំ;

សញ្ញាវិមោក្ខេ បរមេ វិមុត្តោ, តិដ្ឋេយ្យ សោ តត្ថ អនានុយាយី’’.

៩៨. ‘‘តិដ្ឋេ ចេ សោ តត្ថ អនានុយាយី, បូគម្បិ វស្សានំ សមន្តចក្ខុ;

តត្ថេវ សោ សីតិសិយា វិមុត្តោ, ចវេថ វិញ្ញាណំ តថាវិធស្ស’’.

៩៩. ‘‘អច្ចិ យថា វាតវេគេន ខិត្តា, [ឧបសីវាតិ ភគវា]

អត្ថំ បលេតិ ន ឧបេតិ សង្ខំ;

ឯវំ មុនី នាមកាយា វិមុត្តោ, អត្ថំ បលេតិ ន ឧបេតិ សង្ខំ’’.

១០០. ‘‘អត្ថង្គតោ សោ ឧទ វា សោ នត្ថិ, ឧទាហុ វេ សស្សតិយា អរោគោ;

តំ មេ មុនី សាធុ វិយាករោហិ, តថា ហិ តេ វិទិតោ ឯស ធម្មោ’’.

១០១. ‘‘អត្ថង្គតស្ស ន បមាណមត្ថិ, [ឧបសីវាតិ ភគវា]

យេន នំ វជ្ជុំ តំ តស្ស នត្ថិ;

សព្ពេសុ ធម្មេសុ សមូហតេសុ, សមូហតា វាទបថាបិ សព្ពេ’’តិ.

ឧបសីវមាណវបុច្ឆា ឆដ្ឋី.