៩. តោទេយ្យមាណវបុច្ឆា

១១៣. ‘‘យស្មិំ កាមា ន វសន្តិ, [ឥច្ចាយស្មា តោទេយ្យោ]

តណ្ហា យស្ស ន វិជ្ជតិ;

កថំកថា ច យោ តិណ្ណោ, វិមោក្ខោ តស្ស កីទិសោ’’.

១១៤. ‘‘យស្មិំ កាមា ន វសន្តិ, [តោទេយ្យាតិ ភគវា]

តណ្ហា យស្ស ន វិជ្ជតិ;

កថំកថា ច យោ តិណ្ណោ, វិមោក្ខោ តស្ស នាបរោ’’.

១១៥. ‘‘និរាសសោ សោ ឧទ អាសសានោ [អាសយានោ (ក.)], បញ្ញាណវា សោ ឧទ បញ្ញកប្បី;

មុនិំ អហំ សក្ក យថា វិជញ្ញំ, តំ មេ វិយាចិក្ខ សមន្តចក្ខុ’’.

១១៦. ‘‘និរាសសោ សោ ន ច អាសសានោ, បញ្ញាណវា សោ ន ច បញ្ញកប្បី;

ឯវម្បិ តោទេយ្យ មុនិំ វិជាន, អកិញ្ចនំ កាមភវេ អសត្ត’’ន្តិ.

តោទេយ្យមាណវបុច្ឆា នវមា.