១០. កប្បមាណវបុច្ឆា

១១៧. ‘‘មជ្ឈេ សរស្មិំ តិដ្ឋតំ, [ឥច្ចាយស្មា កប្បោ]

ឱឃេ ជាតេ មហព្ភយេ;

ជរាមច្ចុបរេតានំ, ទីបំ បព្រូហិ មារិស;

ត្វញ្ច មេ ទីបមក្ខាហិ, យថាយិទំ នាបរំ សិយា’’.

១១៨. ‘‘មជ្ឈេ សរស្មិំ តិដ្ឋតំ, [កប្បាតិ ភគវា]

ឱឃេ ជាតេ មហព្ភយេ;

ជរាមច្ចុបរេតានំ, ទីបំ បព្រូមិ កប្ប តេ.

១១៩. ‘‘អកិញ្ចនំ អនាទានំ, ឯតំ ទីបំ អនាបរំ;

និព្ពានំ ឥតិ នំ ព្រូមិ, ជរាមច្ចុបរិក្ខយំ.

១២០. ‘‘ឯតទញ្ញាយ យេ សតា, ទិដ្ឋធម្មាភិនិព្ពុតា;

ន តេ មារវសានុគា, ន តេ មារស្ស បដ្ឋគូ’’តិ [បទ្ធគូ (សី.)].

កប្បមាណវបុច្ឆា ទសមា.