១៧. បារាយនត្ថុតិគាថានិទ្ទេសោ

៩៣. ឥទមវោច ភគវា មគធេសុ វិហរន្តោ បាសាណកេ ចេតិយេ, បរិចារកសោឡសានំ [បរិចារិតសោឡសន្នំ (ស្យា. ក.)] ព្រាហ្មណានំ អជ្ឈិដ្ឋោ បុដ្ឋោ បុដ្ឋោ បញ្ហំ ព្យាកាសិ.

ឥទមវោច ភគវាតិ ឥទំ បារាយនំ អវោច. ភគវាតិ គារវាធិវចនមេតំ…បេ… សច្ឆិកា បញ្ញត្តិ, យទិទំ ភគវាតិ – ឥទមវោច ភគវា. មគធេសុ វិហរន្តោតិ មគធនាមកេ ជនបទេ វិហរន្តោ ឥរិយន្តោ វត្តេន្តោ បាលេន្តោ យបេន្តោ យាបេន្តោ. បាសាណកេ ចេតិយេតិ បាសាណកចេតិយំ វុច្ចតិ ពុទ្ធាសនន្តិ – មគធេសុ វិហរន្តោ បាសាណកេ ចេតិយេ. បរិចារកសោឡសានំ ព្រាហ្មណានន្តិ បិង្គិយោ [សិង្គិយោ (ក.)] ព្រាហ្មណោ ពាវរិស្ស ព្រាហ្មណស្ស បទ្ធោ បទ្ធចរោ បរិចារកោ [បរិចារិកោ (ស្យា. ក.)] សិស្សោ. បិង្គិយេន [តេន (ក.)] តេ សោឡសាតិ – ឯវម្បិ បរិចារកសោឡសានំ ព្រាហ្មណានំ. អថ វា, តេ សោឡស ព្រាហ្មណា ពុទ្ធស្ស ភគវតោ បទ្ធា បទ្ធចរា បរិចារកា សិស្សាតិ – ឯវម្បិ បរិចារកសោឡសានំ ព្រាហ្មណានំ.

អជ្ឈិដ្ឋោ បុដ្ឋោ បុដ្ឋោ បញ្ហំ ព្យាកាសីតិ. អជ្ឈិដ្ឋោតិ អជ្ឈិដ្ឋោ អជ្ឈេសិតោ. បុដ្ឋោ បុដ្ឋោតិ បុដ្ឋោ បុដ្ឋោ បុច្ឆិតោ បុច្ឆិតោ យាចិតោ យាចិតោ អជ្ឈេសិតោ អជ្ឈេសិតោ បសាទិតោ បសាទិតោ. បញ្ហំ ព្យាកាសីតិ បញ្ហំ ព្យាកាសិ អាចិក្ខិ ទេសេសិ បញ្ញបេសិ បដ្ឋបេសិ វិវរិ វិភជិ ឧត្តានីអាកាសិ បកាសេសីតិ – អជ្ឈិដ្ឋោ បុដ្ឋោ បុដ្ឋោ បញ្ហំ ព្យាកាសិ. តេនេតំ វុច្ចតិ –

‘‘ឥទមវោច ភគវា មគធេសុ វិហរន្តោ បាសាណកេ ចេតិយេ, បរិចារកសោឡសានំ ព្រាហ្មណានំ អជ្ឈិដ្ឋោ បុដ្ឋោ បុដ្ឋោ បញ្ហំ ព្យាកាសី’’តិ.

៩៤. ឯកមេកស្ស ចេបិ បញ្ហស្ស អត្ថមញ្ញាយ ធម្មមញ្ញាយ ធម្មានុធម្មំ បដិបជ្ជេយ្យ, គច្ឆេយ្យេវ ជរាមរណស្ស បារំ. បារង្គមនីយា ឥមេ ធម្មាតិ. តស្មា ឥមស្ស ធម្មបរិយាយស្ស ‘‘បារាយន’’ន្តេវ អធិវចនំ.

ឯកមេកស្ស ចេបិ បញ្ហស្សាតិ ឯកមេកស្ស ចេបិ អជិតបញ្ហស្ស, ឯកមេកស្ស ចេបិ តិស្សមេត្តេយ្យបញ្ហស្ស, ឯកមេកស្ស ចេបិ បុណ្ណកបញ្ហស្ស, ឯកមេកស្ស ចេបិ មេត្តគូបញ្ហស្ស, ឯកមេកស្ស ចេបិ ធោតកបញ្ហស្ស, ឯកមេកស្ស ចេបិ ឧបសីវបញ្ហស្ស, ឯកមេកស្ស ចេបិ នន្ទកបញ្ហស្ស, ឯកមេកស្ស ចេបិ ហេមកបញ្ហស្ស, ឯកមេកស្ស ចេបិ តោទេយ្យបញ្ហស្ស, ឯកមេកស្ស ចេបិ កប្បបញ្ហស្ស, ឯកមេកស្ស ចេបិ ជតុកណ្ណិបញ្ហស្ស, ឯកមេកស្ស ចេបិ ភទ្រាវុធបញ្ហស្ស, ឯកមេកស្ស ចេបិ ឧទយបញ្ហស្ស, ឯកមេកស្ស ចេបិ បោសាលបញ្ហស្ស, ឯកមេកស្ស ចេបិ មោឃរាជបញ្ហស្ស, ឯកមេកស្ស ចេបិ បិង្គិយបញ្ហស្សាតិ – ឯកមេកស្ស ចេបិ បញ្ហស្ស.

អត្ថមញ្ញាយ ធម្មមញ្ញាយាតិ ស្វេវ បញ្ហោ ធម្មោ, វិសជ្ជនំ [វិស្សជ្ជនំ (ក.)] អត្ថោតិ អត្ថំ អញ្ញាយ ជានិត្វា តុលយិត្វា តីរយិត្វា វិភាវយិត្វា វិភូតំ កត្វាតិ – អត្ថមញ្ញាយ. ធម្មមញ្ញាយាតិ ធម្មំ អញ្ញាយ ជានិត្វា តុលយិត្វា តីរយិត្វា វិភាវយិត្វា វិភូតំ កត្វាតិ – ធម្មមញ្ញាយាតិ – អត្ថមញ្ញាយ ធម្មមញ្ញាយ. ធម្មានុធម្មំ បដិបជ្ជេយ្យាតិ សម្មាបដិបទំ អនុលោមបដិបទំ អបច្ចនីកបដិបទំ អន្វត្ថបដិបទំ ធម្មានុធម្មបដិបទំ បដិបជ្ជេយ្យាតិ – ធម្មានុធម្មំ បដិបជ្ជេយ្យ. គច្ឆេយ្យេវ ជរាមរណស្ស បារន្តិ ជរាមរណស្ស បារំ វុច្ចតិ អមតំ និព្ពានំ. យោ សោ សព្ពសង្ខារសមថោ សព្ពូបធិប្បដិនិស្សគ្គោ តណ្ហក្ខយោ វិរាគោ និរោធោ និព្ពានំ. គច្ឆេយ្យេវ ជរាមរណស្ស បារន្តិ ជរាមរណស្ស បារំ គច្ឆេយ្យ, បារំ អធិគច្ឆេយ្យ, បារំ អធិផស្សេយ្យ, បារំ សច្ឆិករេយ្យាតិ – គច្ឆេយ្យេវ ជរាមរណស្ស បារំ. បារង្គមនីយា ឥមេ ធម្មាតិ ឥមេ ធម្មា បារង្គមនីយា. បារំ បាបេន្តិ បារំ សម្បាបេន្តិ បារំ សមនុបាបេន្តិ, ជរាមណស្ស តរណាយ [តារណាយ (ស្យា.)] សំវត្តន្តីតិ – បារង្គមនីយា ឥមេ ធម្មាតិ.

តស្មា ឥមស្ស ធម្មបរិយាយស្សាតិ. តស្មាតិ តស្មា តំការណា តំហេតុ តប្បច្ចយា តំនិទានាតិ – តស្មា. ឥមស្ស ធម្មបរិយាយស្សាតិ ឥមស្ស បារាយនស្សាតិ – តស្មា ឥមស្ស ធម្មបរិយាយស្ស. បារាយនន្តេវ អធិវចនន្តិ បារំ វុច្ចតិ អមតំ និព្ពានំ…បេ… និរោធោ និព្ពានំ. អយនំ វុច្ចតិ មគ្គោ, សេយ្យថិទំ – សម្មាទិដ្ឋិ…បេ… សម្មាសមាធិ. អធិវចនន្តិ សង្ខា សមញ្ញា បញ្ញត្តិ វោហារោ នាមំ នាមកម្មំ នាមធេយ្យំ និរុត្តិ ព្យញ្ជនំ អភិលាបោតិ – បារាយនន្តេវ អធិវចនំ. តេនេតំ វុច្ចតិ –

‘‘ឯកមេកស្ស ចេបិ បញ្ហស្ស អត្ថមញ្ញាយ ធម្មមញ្ញាយ ធម្មានុធម្មំ បដិបជ្ជេយ្យ, គច្ឆេយ្យេវ ជរាមរណស្ស បារំ. បារង្គមនីយា ឥមេ ធម្មាតិ. តស្មា ឥមស្ស ធម្មបរិយាយស្ស ‘បារាយន’ន្តេវ អធិវចន’’ន្តិ.

៩៥. អជិតោ តិស្សមេត្តេយ្យោ, បុណ្ណកោ អថ មេត្តគូ;

ធោតកោ ឧបសីវោ ច, នន្ទោ ច អថ ហេមកោ.

៩៦. តោទេយ្យកប្បា ទុភយោ, ជតុកណ្ណី ច បណ្ឌិតោ;

ភទ្រាវុធោ ឧទយោ ច, បោសាលោ ចាបិ ព្រាហ្មណោ;

មោឃរាជា ច មេធាវី, បិង្គិយោ ច មហាឥសិ.

៩៧. ឯតេ ពុទ្ធំ ឧបាគច្ឆុំ, សម្បន្នចរណំ ឥសិំ;

បុច្ឆន្តា និបុណេ បញ្ហេ, ពុទ្ធសេដ្ឋំ ឧបាគមុំ.

ឯតេ ពុទ្ធំ ឧបាគច្ឆុន្តិ. ឯតេតិ សោឡស បារាយនិយា ព្រាហ្មណា. ពុទ្ធោតិ យោ សោ ភគវា សយម្ភូ អនាចរិយកោ បុព្ពេ អននុស្សុតេសុ ធម្មេសុ សាមំ សច្ចានិ អភិសម្ពុជ្ឈិ, តត្ថ ច សព្ពញ្ញុតំ បត្តោ ពលេសុ ច វសីភាវំ. ពុទ្ធោតិ កេនដ្ឋេន ពុទ្ធោ? ពុជ្ឈិតា សច្ចានីតិ ពុទ្ធោ, ពោធេតា បជាយាតិ ពុទ្ធោ, សព្ពញ្ញុតាយ ពុទ្ធោ, សព្ពទស្សាវិតាយ ពុទ្ធោ, អភិញ្ញេយ្យតាយ ពុទ្ធោ, វិសវិតាយ ពុទ្ធោ, ខីណាសវសង្ខាតេន ពុទ្ធោ, និរុបលេបសង្ខាតេន ពុទ្ធោ, ឯកន្តវីតរាគោតិ ពុទ្ធោ, ឯកន្តវីតទោសោតិ ពុទ្ធោ, ឯកន្តវីតមោហោតិ ពុទ្ធោ, ឯកន្តនិក្កិលេសោតិ ពុទ្ធោ, ឯកាយនមគ្គំ គតោតិ ពុទ្ធោ, ឯកោ អនុត្តរំ សម្មាសម្ពោធិំ អភិសម្ពុទ្ធោតិ ពុទ្ធោ, អពុទ្ធិវិហតត្តា ពុទ្ធិបដិលាភាតិ ពុទ្ធោ. ពុទ្ធោតិ នេតំ នាមំ មាតរា កតំ ន បិតរា កតំ ន ភាតរា កតំ ន ភគិនិយា កតំ ន មិត្តាមច្ចេហិ កតំ ន ញាតិសាលោហិតេហិ កតំ ន សមណព្រាហ្មណេហិ កតំ ន ទេវតាហិ កតំ. វិមោក្ខន្តិកមេតំ ពុទ្ធានំ ភគវន្តានំ ពោធិយា មូលេ សហ សព្ពញ្ញុតញាណស្ស បដិលាភា សច្ឆិកា បញ្ញត្តិ, យទិទំ ពុទ្ធោតិ. ឯតេ ពុទ្ធំ ឧបាគច្ឆុន្តិ ឯតេ ពុទ្ធំ ឧបាគមិំសុ ឧបសង្កមិំសុ បយិរុបាសិំសុ បរិបុច្ឆិំសុ បរិបញ្ហិំសូតិ – ឯតេ ពុទ្ធំ ឧបាគច្ឆុំ.

សម្បន្នចរណំ ឥសិន្តិ ចរណំ វុច្ចតិ សីលាចារនិព្ពត្តិ. សីលសំវរោបិ ចរណំ, ឥន្ទ្រិយសំវរោបិ ចរណំ, ភោជនេ មត្តញ្ញុតាបិ ចរណំ, ជាគរិយានុយោគោបិ ចរណំ, សត្តបិ សទ្ធម្មា ចរណំ, ចត្តារិបិ ឈានានិ ចរណំ. សម្បន្នចរណន្តិ សម្បន្នចរណំ សេដ្ឋចរណំ វិសេដ្ឋចរណំ [វិសិដ្ឋចរណំ (ក.)] បាមោក្ខចរណំ ឧត្តមចរណំ បវរចរណំ. ឥសីតិ ឥសិ ភគវា មហន្តំ សីលក្ខន្ធំ ឯសី គវេសី បរិយេសីតិ ឥសិ…បេ… មហេសក្ខេហិ វា សត្តេហិ ឯសិតោ គវេសិតោ បរិយេសិតោ – ‘‘កហំ ពុទ្ធោ, កហំ ភគវា, កហំ ទេវទេវោ កហំ នរាសភោ’’តិ – ឥសីតិ – សម្បន្នចរណំ ឥសិំ.

បុច្ឆន្តា និបុណេ បញ្ហេតិ. បុច្ឆន្តាតិ បុច្ឆន្តា យាចន្តា អជ្ឈេសន្តា បសាទេន្តា. និបុណេ បញ្ហេតិ គម្ភីរេ ទុទ្ទសេ ទុរនុពោធេ សន្តេ បណីតេ អតក្កាវចរេ និបុណេ បណ្ឌិតវេទនីយេ បញ្ហេតិ – បុច្ឆន្តា និបុណេ បញ្ហេ.

ពុទ្ធសេដ្ឋំ ឧបាគមុន្តិ. ពុទ្ធោតិ យោ សោ ភគវា…បេ… សច្ឆិកា បញ្ញត្តិ, យទិទំ ពុទ្ធោតិ. សេដ្ឋន្តិ អគ្គំ សេដ្ឋំ វិសេដ្ឋំ បាមោក្ខំ ឧត្តមំ បវរំ ពុទ្ធំ ឧបាគមុំ ឧបាគមិំសុ ឧបសង្កមិំសុ បយិរុបាសិំសុ បរិបុច្ឆិំសុ បរិបញ្ហិំសូតិ – ពុទ្ធសេដ្ឋំ ឧបាគមុំ. តេនេតំ វុច្ចតិ –

‘‘ឯតេ ពុទ្ធំ ឧបាគច្ឆុំ, សម្បន្នចរណំ ឥសិំ;

បុច្ឆន្តា និបុណេ បញ្ហេ, ពុទ្ធសេដ្ឋំ ឧបាគមុ’’ន្តិ.

៩៨. តេសំ ពុទ្ធោ បព្យាកាសិ, បញ្ហំ បុដ្ឋោ យថាតថំ;

បញ្ហានំ វេយ្យាករណេន, តោសេសិ ព្រាហ្មណេ មុនិ.

តេសំ ពុទ្ធោ បព្យាកាសីតិ. តេសន្តិ សោឡសានំ បារាយនិយានំ ព្រាហ្មណានំ. ពុទ្ធោតិ យោ សោ ភគវា…បេ… សច្ឆិកា បញ្ញត្តិ, យទិទំ ពុទ្ធោតិ. បព្យាកាសីតិ តេសំ ពុទ្ធោ បព្យាកាសិ អាចិក្ខិ ទេសេសិ បញ្ញបេសិ បដ្ឋបេសិ វិវរិ វិភជិ ឧត្តានីអកាសិ បកាសេសីតិ – តេសំ ពុទ្ធោ បព្យាកាសិ.

បញ្ហំ បុដ្ឋោ យថាតថន្តិ. បញ្ហំ បុដ្ឋោតិ បញ្ហំ បុដ្ឋោ បុច្ឆិតោ យាចិតោ អជ្ឈេសិតោ បសាទិតោ. យថាតថន្តិ យថា អាចិក្ខិតព្ពំ តថា អាចិក្ខិ, យថា ទេសិតព្ពំ តថា ទេសេសិ, យថា បញ្ញបេតព្ពំ តថា បញ្ញបេសិ, យថា បដ្ឋបេតព្ពំ តថា បដ្ឋបេសិ, យថា វិវរិតព្ពំ តថា វិវរិ, យថា វិភជិតព្ពំ តថា វិភជិ, យថា ឧត្តានីកាតព្ពំ តថា ឧត្តានីអកាសិ, យថា បកាសិតព្ពំ តថា បកាសេសីតិ – បញ្ហំ បុដ្ឋោ យថាតថំ.

បញ្ហានំ វេយ្យាករណេនាតិ បញ្ហានំ វេយ្យាករណេន អាចិក្ខនេន ទេសនេន បញ្ញបនេន បដ្ឋបនេន វិវរណេន វិភជនេន ឧត្តានីកម្មេន បកាសនេនាតិ – បញ្ហានំ វេយ្យាករណេន.

តោសេសិ ព្រាហ្មណេ មុនីតិ. តោសេសីតិ តោសេសិ វិតោសេសិ បសាទេសិ អារាធេសិ អត្តមនេ អកាសិ. ព្រាហ្មណេតិ សោឡស បារាយនិយេ ព្រាហ្មណេ. មុនីតិ មោនំ វុច្ចតិ ញាណំ…បេ… សង្គជាលមតិច្ច សោ មុនីតិ – តោសេសិ ព្រាហ្មណេ មុនិ. តេនេតំ វុច្ចតិ –

‘‘តេសំ ពុទ្ធោ បព្យាកាសិ, បញ្ហំ បុដ្ឋោ យថាតថំ;

បញ្ហានំ វេយ្យាករណេន, តោសេសិ ព្រាហ្មណេ មុនី’’តិ.

៩៩. តេ តោសិតា ចក្ខុមតា, ពុទ្ធេនាទិច្ចពន្ធុនា;

ព្រហ្មចរិយមចរិំសុ, វរបញ្ញស្ស សន្តិកេ.

តេ តោសិតា ចក្ខុមតាតិ. តេតិ សោឡស បារាយនិយា ព្រាហ្មណា. តោសិតាតិ តោសិតា វិតោសិតា បសាទិតា អារាធិតា អត្តមនា កតាតិ – តេ តោសិតា. ចក្ខុមតាតិ ភគវា បញ្ចហិ ចក្ខូហិ ចក្ខុមា – មំសចក្ខុនាបិ ចក្ខុមា, ទិព្ពចក្ខុនាបិ ចក្ខុមា, បញ្ញាចក្ខុនាបិ ចក្ខុមា, ពុទ្ធចក្ខុនាបិ ចក្ខុមា, សមន្តចក្ខុនាបិ ចក្ខុមា. កថំ ភគវា មំសចក្ខុនាបិ ចក្ខុមា…បេ… ឯវំ ភគវា សមន្តចក្ខុនាបិ ចក្ខុមាតិ – តេ តោសិតា ចក្ខុមតា.

ពុទ្ធេនាទិច្ចពន្ធុនាតិ. ពុទ្ធោតិ យោ សោ ភគវា…បេ… សច្ឆិកា បញ្ញត្តិ, យទិទំ ពុទ្ធោតិ. អាទិច្ចពន្ធុនាតិ អាទិច្ចោ វុច្ចតិ សូរិយោ. សោ គោតមោ គោត្តេន, ភគវាបិ គោតមោ គោត្តេន, ភគវា សូរិយស្ស គោត្តញាតកោ គោត្តពន្ធុ. តស្មា ពុទ្ធោ អាទិច្ចពន្ធូតិ – ពុទ្ធេនាទិច្ចពន្ធុនា.

ព្រហ្មចរិយមចរិំសូតិ ព្រហ្មចរិយំ វុច្ចតិ អសទ្ធម្មសមាបត្តិយា អារតិ វិរតិ បដិវិរតិ វេរមណី វិរមណំ អកិរិយា អករណំ អនជ្ឈាបត្តិ វេលាអនតិក្កមោ សេតុឃាតោ. អបិ ច, និប្បរិយាយវសេន ព្រហ្មចរិយំ វុច្ចតិ អរិយោ អដ្ឋង្គិកោ មគ្គោ, សេយ្យថិទំ – សម្មាទិដ្ឋិ, សម្មាសង្កប្បោ, សម្មាវាចា, សម្មាកម្មន្តោ, សម្មាអាជីវោ, សម្មាវាយាមោ, សម្មាសតិ, សម្មាសមាធិ. ព្រហ្មចរិយមចរិំសូតិ ព្រហ្មចរិយំ ចរិំសុ អចរិំសុ សមាទាយ វត្តិំសូតិ – ព្រហ្មចរិយមចរិំសុ.

វរបញ្ញស្ស សន្តិកេតិ វរបញ្ញស្ស អគ្គបញ្ញស្ស សេដ្ឋបញ្ញស្ស វិសេដ្ឋបញ្ញស្ស បាមោក្ខបញ្ញស្ស ឧត្តមបញ្ញស្ស បវរបញ្ញស្ស. សន្តិកេតិ សន្តិកេ សាមន្តា អាសន្នេ អវិទូរេ ឧបកដ្ឋេតិ – វរបញ្ញស្ស សន្តិកេ. តេនេតំ វុច្ចតិ –

‘‘តេ តោសិតា ចក្ខុមតា, ពុទ្ធេនាទិច្ចពន្ធុនា;

ព្រហ្មចរិយមចរិំសុ, វរបញ្ញស្ស សន្តិកេ’’តិ.

១០០. ឯកមេកស្ស បញ្ហស្ស, យថា ពុទ្ធេន ទេសិតំ;

តថា យោ បដិបជ្ជេយ្យ, គច្ឆេ បារំ អបារតោ.

ឯកមេកស្ស បញ្ហស្សាតិ ឯកមេកស្ស អជិតបញ្ហស្ស, ឯកមេកស្ស តិស្សមេត្តេយ្យបញ្ហស្ស…បេ… ឯកមេកស្ស បិង្គិយបញ្ហស្សាតិ – ឯកមេកស្ស បញ្ហស្ស.

យថា ពុទ្ធេន ទេសិតន្តិ. ពុទ្ធោតិ យោ សោ ភគវា សយម្ភូ…បេ… សច្ឆិកា បញ្ញត្តិ, យទិទំ ពុទ្ធោតិ. យថា ពុទ្ធេន ទេសិតន្តិ យថា ពុទ្ធេន អាចិក្ខិតំ ទេសិតំ បញ្ញបិតំ បដ្ឋបិតំ វិវរិតំ វិភជិតំ [វិភត្តំ (ស្យា.)] ឧត្តានីកតំ បកាសិតន្តិ – យថា ពុទ្ធេន ទេសិតំ.

តថា យោ បដិបជ្ជេយ្យាតិ សម្មាបដិបទំ អនុលោមបដិបទំ អបច្ចនីកបដិបទំ អន្វត្ថបដិបទំ ធម្មានុធម្មបដិបទំ បដិបជ្ជេយ្យាតិ – តថា យោ បដិបជ្ជេយ្យ.

គច្ឆេ បារំ អបារតោតិ បារំ វុច្ចតិ អមតំ និព្ពានំ…បេ… និរោធោ និព្ពានំ; អបារំ វុច្ចន្តិ កិលេសា ច ខន្ធា ច អភិសង្ខារា ច. គច្ឆេ បារំ អបារតោតិ អបារតោ បារំ គច្ឆេយ្យ, បារំ អធិគច្ឆេយ្យ, បារំ ផស្សេយ្យ, បារំ សច្ឆិករេយ្យាតិ – គច្ឆេ បារំ អបារតោ. តេនេតំ វុច្ចតិ –

‘‘ឯកមេកស្ស បញ្ហស្ស, យថា ពុទ្ធេន ទេសិតំ;

តថា យោ បដិបជ្ជេយ្យ, គច្ឆេ បារំ អបារតោ’’តិ.

១០១. អបារា បារំ គច្ឆេយ្យ, ភាវេន្តោ មគ្គមុត្តមំ;

មគ្គោ សោ បារំ គមនាយ, តស្មា បារាយនំ ឥតិ.

អបារា បារំ គច្ឆេយ្យាតិ អបារំ វុច្ចន្តិ កិលេសា ច ខន្ធា ច អភិសង្ខារា ច; បារំ វុច្ចតិ អមតំ និព្ពានំ…បេ… តណ្ហក្ខយោ វិរាគោ និរោធោ និព្ពានំ. អបារា បារំ គច្ឆេយ្យាតិ អបារា បារំ គច្ឆេយ្យ, បារំ អធិគច្ឆេយ្យ, បារំ ផស្សេយ្យ, បារំ សច្ឆិករេយ្យាតិ – អបារា បារំ គច្ឆេយ្យ.

ភាវេន្តោ មគ្គមុត្តមន្តិ មគ្គមុត្តមំ វុច្ចតិ អរិយោ អដ្ឋង្គិកោ មគ្គោ, សេយ្យថិទំ – សម្មាទិដ្ឋិ…បេ… សម្មាសមាធិ. មគ្គមុត្តមន្តិ មគ្គំ អគ្គំ សេដ្ឋំ វិសេដ្ឋំ បាមោក្ខំ ឧត្តមំ បវរំ. ភាវេន្តោតិ ភាវេន្តោ អាសេវន្តោ ពហុលីករោន្តោតិ – ភាវេន្តោ មគ្គមុត្តមំ.

មគ្គោ សោ បារំ គមនាយាតិ –

មគ្គោ បន្ថោ បថោ បជ្ជោ [អទ្ធោ (ក.)], អញ្ជសំ វដុមាយនំ;

នាវា ឧត្តរសេតុ ច, កុល្លោ ច ភិសិ សង្កមោ [សង្គមោ (ស្យា. ក.) បស្ស-ធាតុមាលាយំ មគ្គធាតុវណ្ណនាយំ].

បារំ គមនាយាតិ បារំ គមនាយ បារំ សម្បាបនាយ បារំ សមនុបាបនាយ ជរាមរណស្ស តរណាយាតិ – មគ្គោ សោ បារំ គមនាយ.

តស្មា បារាយនំ ឥតីតិ. តស្មាតិ តស្មា តំការណា តំហេតុ តប្បច្ចយា តំនិទានា. បារំ វុច្ចតិ អមតំ និព្ពានំ…បេ… និរោធោ និព្ពានំ. អយនំ វុច្ចតិ មគ្គោ. ឥតីតិ បទសន្ធិ…បេ… បទានុបុព្ពតាបេតំ ឥតីតិ – តស្មា បារាយនំ ឥតិ. តេនេតំ វុច្ចតិ –

‘‘អបារា បារំ គច្ឆេយ្យ, ភាវេន្តោ មគ្គមុត្តមំ;

មគ្គោ សោ បារំ គមនាយ, តស្មា បារាយនំ ឥតី’’តិ.

បារាយនត្ថុតិគាថានិទ្ទេសោ សត្តរសមោ.