១១. ជតុកណ្ណិមាណវបុច្ឆានិទ្ទេសោ

៦៥. សុត្វានហំ វីរ អកាមកាមិំ, [ឥច្ចាយស្មា ជតុកណ្ណិ]

ឱឃាតិគំ បុដ្ឋុមកាមមាគមំ;

សន្តិបទំ ព្រូហិ សហជនេត្ត, យថាតច្ឆំ ភគវា ព្រូហិ មេតំ.

សុត្វានហំ វីរ អកាមកាមិន្តិ សុត្វា សុណិត្វា ឧគ្គហេត្វា ឧបធារេត្វា ឧបលក្ខយិត្វា. ឥតិបិ សោ ភគវា អរហំ…បេ… ពុទ្ធោ ភគវាតិ – សុត្វានហំ. វីរាតិ វីរោ ភគវា. វីរិយវាតិ វីរោ, បហូតិ វីរោ, វិសវីតិ វីរោ, អលមត្តោតិ វីរោ, សូរោតិ វីរោ, វិក្កន្តោ អភីរូ អច្ឆម្ភី អនុត្រាសី អបលាយី បហីនភយភេរវោ វិគតលោមហំសោតិ វីរោ.

វិរតោ ឥធ សព្ពបាបកេហិ, និរយទុក្ខំ អតិច្ច វីរិយវា [វិរិយវា (ស្យា.) សុ. និ. ៥៣៦] សោ;

សោ វីរិយវា បធានវា, វីរោ តាទិ បវុច្ចតេ តថត្តាតិ.

សុត្វានហំ វីរ. អកាមកាមិន្តិ. កាមាតិ ឧទ្ទានតោ ទ្វេ កាមា – វត្ថុកាមា ច កិលេសកាមា ច…បេ… ឥមេ វុច្ចន្តិ វត្ថុកាមា…បេ… ឥមេ វុច្ចន្តិ កិលេសកាមា. ពុទ្ធស្ស ភគវតោ វត្ថុកាមា បរិញ្ញាតា, កិលេសកាមា បហីនា. វត្ថុកាមានំ បរិញ្ញាតត្តា កិលេសកាមានំ បហីនត្តា ភគវា ន កាមេ កាមេតិ, ន កាមេ បត្ថេតិ, ន កាមេ បិហេតិ, ន កាមេ អភិជប្បតិ. យេ កាមេ កាមេន្តិ, កាមេ បត្ថេន្តិ, កាមេ បិហេន្តិ, កាមេ អភិជប្បន្តិ, តេ កាមកាមិនោ រាគរាគិនោ សញ្ញាសញ្ញិនោ. ភគវា ន កាមេ កាមេតិ, ន កាមេ បត្ថេតិ, ន កាមេ បិហេតិ, ន កាមេ អភិជប្បតិ. តស្មា ពុទ្ធោ អកាមោ និក្កាមោ ចត្តកាមោ វន្តកាមោ មុត្តកាមោ បហីនកាមោ បដិនិស្សដ្ឋកាមោ វីតរាគោ វិគតរាគោ ចត្តរាគោ វន្តរាគោ មុត្តរាគោ បហីនរាគោ បដិនិស្សដ្ឋរាគោ និច្ឆាតោ និព្ពុតោ សីតិភូតោ សុខប្បដិសំវេទី ព្រហ្មភូតេន អត្តនា វិហរតីតិ – សុត្វានហំ វីរ អមកាមកាមិំ.

ឥច្ចាយស្មា ជតុកណ្ណីតិ. ឥច្ចាតិ បទសន្ធិ…បេ… បទានុបុព្ពតាបេតំ – ឥច្ចាតិ. អាយស្មាតិ បិយវចនំ សគារវសប្បតិស្សាធិវចនមេតំ អាយស្មាតិ. ជតុកណ្ណីតិ តស្ស ព្រាហ្មណស្ស គោត្តំ សង្ខា សមញ្ញា បញ្ញត្តិ វោហារោតិ – ឥច្ចាយស្មា ជតុកណ្ណិ.

ឱឃាតិគំ បុដ្ឋុមកាមមាគមន្តិ. ឱឃាតិគន្តិ ឱឃាតិគំ ឱឃំ អតិក្កន្តំ សមតិក្កន្តំ វីតិវត្តន្តិ – ឱឃាតិគំ. បុដ្ឋុន្តិ បុដ្ឋុំ បុច្ឆិតុំ យាចិតុំ អជ្ឈេសិតុំ បសាទេតុំ. អកាមមាគមន្តិ អកាមំ បុដ្ឋុំ និក្កាមំ ចត្តកាមំ វន្តកាមំ មុត្តកាមំ បហីនកាមំ បដិនិស្សដ្ឋកាមំ វីតរាគំ វិគតរាគំ ចត្តរាគំ វន្តរាគំ មុត្តរាគំ បហីនរាគំ បដិនិស្សដ្ឋរាគំ អាគម្ហា អាគតម្ហា ឧបាគតម្ហា សម្បត្តម្ហា តយា សទ្ធិំ សមាគតម្ហាតិ – ឱឃាតិគំ បុដ្ឋុមកាមមាគមំ.

សន្តិបទំ ព្រូហិ សហជនេត្តាតិ. សន្តីតិ ឯកេន អាការេន សន្តិបិ សន្តិបទម្បិ [សន្តិបទន្តិ (ក.)] តំយេវ អមតំ និព្ពានំ. យោ សោ សព្ពសង្ខារសមថោ សព្ពូបធិបដិនិស្សគ្គោ តណ្ហក្ខយោ វិរាគោ និរោធោ និព្ពានំ. វុត្តញ្ហេតំ ភគវតា – ‘‘សន្តមេតំ បទំ, បណីតមេតំ បទំ, យទិទំ សព្ពសង្ខារសមថោ សព្ពូបធិបដិនិស្សគ្គោ តណ្ហក្ខយោ វិរាគោ និរោធោ និព្ពាន’’ន្តិ. អថាបរេនាការេន យេ ធម្មា សន្តាធិគមាយ សន្តិផុសនាយ សន្តិសច្ឆិកិរិយាយ សំវត្តន្តិ, សេយ្យថិទំ – ចត្តារោ សតិបដ្ឋានា ចត្តារោ សម្មប្បធានា ចត្តារោ ឥទ្ធិបាទា បញ្ចិន្ទ្រិយានិ បញ្ច ពលានិ សត្ត ពោជ្ឈង្គា អរិយោ អដ្ឋង្គិកោ មគ្គោ – ឥមេ វុច្ចន្តិ សន្តិបទា. សន្តិបទំ តាណបទំ លេណបទំ សរណបទំ អភយបទំ អច្ចុតបទំ អមតបទំ និព្ពានបទំ ព្រូហិ អាចិក្ខាហិ ទេសេហិ បញ្ញបេហិ បដ្ឋបេហិ វិវរាហិ វិភជាហិ ឧត្តានីករោហិ បកាសេហិ. សហជនេត្តាតិ នេត្តំ វុច្ចតិ សព្ពញ្ញុតញាណំ. ពុទ្ធស្ស ភគវតោ នេត្តញ្ច ជិនភាវោ ច ពោធិយា មូលេ អបុព្ពំ អចរិមំ ឯកស្មិំ ខណេ ឧប្បន្នោ, តស្មា ពុទ្ធោ សហជនេត្តោតិ – សន្តិបទំ ព្រូហិ សហជនេត្ត.

យថាតច្ឆំ ភគវា ព្រូហិ មេតន្តិ យថាតច្ឆំ វុច្ចតិ អមតំ និព្ពានំ…បេ… និរោធោ និព្ពានំ. ភគវាតិ គារវាធិវចនំ…បេ… សច្ឆិកា បញ្ញត្តិ, យទិទំ ភគវាតិ. ព្រូហិ មេតន្តិ ព្រូហិ អាចិក្ខាហិ…បេ… បកាសេហីតិ – យថាតច្ឆំ ភគវា ព្រូហិ មេតំ. តេនាហ សោ ព្រាហ្មណោ –

‘‘សុត្វានហំ វីរ អកាមកាមិំ, [ឥច្ចាយស្មា ជតុកណ្ណិ]

ឱឃាតិគំ បុដ្ឋុមកាមមាគមំ;

សន្តិបទំ ព្រូហិ សហជនេត្ត, យថាតច្ឆំ ភគវា ព្រូហិ មេត’’ន្តិ.

៦៦. ភគវា ហិ កាមេ អភិភុយ្យ ឥរិយតិ, អាទិច្ចោវ បថវិំ តេជី តេជសា;

បរិត្តបញ្ញស្ស មេ ភូរិបញ្ញោ, អាចិក្ខ ធម្មំ យមហំ វិជញ្ញំ;

ជាតិជរាយ ឥធ វិប្បហានំ.

ភគវា ហិ កាមេ អភិភុយ្យ ឥរិយតីតិ. ភគវាតិ គារវាធិវចនំ…បេ… សច្ឆិកា បញ្ញត្តិ, យទិទំ ភគវាតិ. កាមាតិ ឧទ្ទានតោ ទ្វេ កាមា – វត្ថុកាមា ច កិលេសកាមា ច…បេ… ឥមេ វុច្ចន្តិ វត្ថុកាមា…បេ… ឥមេ វុច្ចន្តិ កិលេសកាមា. ភគវា វត្ថុកាមេ បរិជានិត្វា កិលេសកាមេ បហាយ អភិភុយ្យ អភិភវិត្វា អជ្ឈោត្ថរិត្វា បរិយាទិយិត្វា ចរតិ វិហរតិ ឥរិយតិ វត្តេតិ បាលេតិ យបេតិ យាបេតីតិ – ភគវា ហិ កាមេ អភិភុយ្យ ឥរិយតិ.

អាទិច្ចោវ បថវិំ តេជី តេជសាតិ អាទិច្ចោ វុច្ចតិ សូរិយោ [សុរិយោ (ស្យា.)]. បថវី វុច្ចតិ ជគតី [ជរា (ស្យា.)]. យថា សូរិយោ តេជី តេជេន សមន្នាគតោ បថវិំ អភិភុយ្យ អភិភវិត្វា អជ្ឈោត្ថរិត្វា បរិយាទិយិត្វា សន្តាបយិត្វា សព្ពំ អាកាសគតំ តមគតំ អភិវិហច្ច អន្ធការំ វិធមិត្វា អាលោកំ ទស្សយិត្វា អាកាសេ អន្តលិក្ខេ គគនបថេ [គមនបថេ (ស្យា.) អដ្ឋកថា ឱលោកេតព្ពា] គច្ឆតិ, ឯវមេវ ភគវា ញាណតេជី ញាណតេជេន សមន្នាគតោ សព្ពំ អភិសង្ខារសមុទយំ…បេ… កិលេសតមំ អវិជ្ជន្ធការំ វិធមិត្វា ញាណាលោកំ ទស្សេត្វា វត្ថុកាមេ បរិជានិត្វា កិលេសកាមេ បហាយ អភិភុយ្យ អភិភវិត្វា អជ្ឈោត្ថរិត្វា បរិយាទិយិត្វា មទ្ទិត្វា ចរតិ វិហរតិ ឥរិយតិ វត្តេតិ បាលេតិ យបេតិ យាបេតីតិ – អាទិច្ចោវ បថវិំ តេជី តេជសា.

បរិត្តបញ្ញស្ស មេ ភូរិបញ្ញោតិ អហមស្មិ បរិត្តបញ្ញោ ឱមកបញ្ញោ លាមកបញ្ញោ ឆតុក្កបញ្ញោ. ត្វម្បិ មហាបញ្ញោ បុថុបញ្ញោ ហាសបញ្ញោ ជវនបញ្ញោ តិក្ខបញ្ញោ និព្ពេធិកបញ្ញោ. ភូរិ វុច្ចតិ បថវី. ភគវា តាយ បថវិសមាយ បញ្ញាយ វិបុលាយ វិត្ថតាយ សមន្នាគតោតិ – បរិត្តបញ្ញស្ស មេ ភូរិបញ្ញោ.

អាចិក្ខ ធម្មំ យមហំ វិជញ្ញន្តិ. ធម្មន្តិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ, ចត្តារោ សតិបដ្ឋានេ…បេ… និព្ពានញ្ច និព្ពានគាមិនិញ្ច បដិបទំ អាចិក្ខាហិ ទេសេហិ បញ្ញបេហិ បដ្ឋបេហិ វិវរាហិ វិភជាហិ ឧត្តានីករោហិ បកាសេហិ. យមហំ វិជញ្ញន្តិ យមហំ ជានេយ្យំ អាជានេយ្យំ វិជានេយ្យំ បដិជានេយ្យំ បដិវិជ្ឈេយ្យំ អធិគច្ឆេយ្យំ ផស្សេយ្យំ សច្ឆិករេយ្យន្តិ – អាចិក្ខ ធម្មំ យមហំ វិជញ្ញំ.

ជាតិជរាយ ឥធ វិប្បហានន្តិ ឥធេវ ជាតិជរាយ មរណស្ស បហានំ វូបសមំ បដិនិស្សគ្គំ បដិប្បស្សទ្ធិំ អមតំ និព្ពានន្តិ – ជាតិជរាយ ឥធ វិប្បហានំ. តេនាហ សោ ព្រាហ្មណោ –

‘‘ភគវា ហិ កាមេ អភិភុយ្យ ឥរិយតិ, អាទិច្ចោវ បថវិំ តេជី តេជសា;

បរិត្តបញ្ញស្ស មេ ភូរិបញ្ញោ, អាចិក្ខ ធម្មំ យមហំ វិជញ្ញំ;

ជាតិជរាយ ឥធ វិប្បហាន’’ន្តិ.

៦៧. កាមេសុ វិនយ គេធំ, [ជតុកណ្ណីតិ ភគវា]

នេក្ខម្មំ ទដ្ឋុ ខេមតោ;

ឧគ្គហិតំ និរត្តំ វា, មា តេ វិជ្ជិត្ថ កិញ្ចនំ.

កាមេសុ វិនយ គេធន្តិ. កាមាតិ ឧទ្ទានតោ ទ្វេ កាមា – វត្ថុកាមា ច កិលេសកាមា ច…បេ… ឥមេ វុច្ចន្តិ វត្ថុកាមា…បេ… ឥមេ វុច្ចន្តិ កិលេសកាមា. គេធន្តិ គេធោ វុច្ចតិ តណ្ហា. យោ រាគោ សារាគោ…បេ… អភិជ្ឈា លោភោ អកុសលមូលំ. កាមេសុ វិនយ គេធន្តិ កាមេសុ គេធំ វិនយ បដិវិនយ បជហ វិនោទេហិ ព្យន្តីករោហិ អនភាវំ គមេហីតិ – កាមេសុ វិនយ គេធំ. ជតុកណ្ណីតិ ភគវា តំ ព្រាហ្មណំ គោត្តេន អាលបតិ. ភគវាតិ គារវាធិវចនមេតំ…បេ… សច្ឆិកា បញ្ញត្តិ, យទិទំ ភគវាតិ – ជតុកណ្ណីតិ ភគវា.

នេក្ខម្មំ ទដ្ឋុ ខេមតោតិ. នេក្ខម្មន្តិ សម្មាបដិបទំ អនុលោមបដិបទំ អបច្ចនីកបដិបទំ អន្វត្ថបដិបទំ ធម្មានុធម្មបដិបទំ សីលេសុ បរិបូរការិតំ ឥន្ទ្រិយេសុ គុត្តទ្វារតំ ភោជនេ មត្តញ្ញុតំ ជាគរិយានុយោគំ សតិសម្បជញ្ញំ ចត្តារោ សតិបដ្ឋានេ ចត្តារោ សម្មប្បធានេ ចត្តារោ ឥទ្ធិបាទេ បញ្ចិន្ទ្រិយានិ បញ្ច ពលានិ សត្ត ពោជ្ឈង្គេ អរិយំ អដ្ឋង្គិកំ មគ្គំ និព្ពានញ្ច និព្ពានគាមិនិញ្ច បដិបទំ ខេមតោ តាណតោ លេណតោ សរណតោ សរណីភូតតោ អភយតោ អច្ចុតតោ អមតតោ និព្ពានតោ ទដ្ឋុំ បស្សិត្វា តុលយិត្វា តីរយិត្វា វិភាវយិត្វា វិភូតំ កត្វាតិ – នេក្ខម្មំ ទដ្ឋុ ខេមតោ.

ឧគ្គហិតំ និរត្តំ វាតិ. ឧគ្គហិតន្តិ តណ្ហាវសេន ទិដ្ឋិវសេន គហិតំ បរាមដ្ឋំ អភិនិវិដ្ឋំ អជ្ឈោសិតំ អធិមុត្តំ. និរត្តំ វាតិ និរត្តំ វា មុញ្ចិតព្ពំ វិជហិតព្ពំ វិនោទិតព្ពំ ព្យន្តីកាតព្ពំ អនភាវំ គមេតព្ពន្តិ – ឧគ្គហិតំ និរត្តំ វា.

មា តេ វិជ្ជិត្ថ កិញ្ចនន្តិ រាគកិញ្ចនំ ទោសកិញ្ចនំ មោហកិញ្ចនំ មានកិញ្ចនំ ទិដ្ឋិកិញ្ចនំ កិលេសកិញ្ចនំ ទុច្ចរិតកិញ្ចនំ. ឥទំ កិញ្ចនំ [ឥមេ កិញ្ចនា (ក.)] តុយ្ហំ មា វិជ្ជិត្ថ មា បវិជ្ជិត្ថ មា សំវិជ្ជិត្ថ បជហ វិនោទេហិ ព្យន្តីករោហិ អនភាវំ គមេហីតិ – មា តេ វិជ្ជិត្ថ កិញ្ចនំ. តេនាហ ភគវា –

‘‘កាមេសុ វិនយ គេធំ, [ជតុកណ្ណីតិ ភគវា]

នេក្ខម្មំ ទដ្ឋុ ខេមតោ;

ឧគ្គហិតំ និរត្តំ វា, មា តេ វិជ្ជិត្ថ កិញ្ចន’’ន្តិ.

៦៨. យំ បុព្ពេ តំ វិសោសេហិ, បច្ឆា តេ មាហុ កិញ្ចនំ;

មជ្ឈេ ចេ នោ គហេស្សសិ, ឧបសន្តោ ចរិស្សសិ.

យំ បុព្ពេ តំ វិសោសេហីតិ អតីតេ សង្ខារេ អារព្ភ យេ កិលេសា ឧប្បជ្ជេយ្យុំ តេ កិលេសេ សោសេហិ វិសោសេហិ សុក្ខាបេហិ វិសុក្ខាបេហិ អពីជំ ករោហិ បជហ វិនោទេហិ ព្យន្តីករោហិ អនភាវំ គមេហីតិ – ឯវម្បិ យំ បុព្ពេ តំ វិសោសេហិ. អថ វា, យេ អតីតា កម្មាភិសង្ខារា អវិបក្កវិបាកា តេ កម្មាភិសង្ខារេ សោសេហិ វិសោសេហិ សុក្ខាបេហិ វិសុក្ខាបេហិ អពីជំ [អវីជំ (ស្យា.)] ករោហិ បជហ វិនោទេហិ ព្យន្តីករោហិ អនភាវំ គមេហីតិ – ឯវម្បិ យំ បុព្ពេ តំ វិសោសេហិ.

បច្ឆា តេ មាហុ កិញ្ចនន្តិ បច្ឆា វុច្ចតិ អនាគតេ សង្ខារេ អារព្ភ រាគកិញ្ចនំ ទោសកិញ្ចនំ មោហកិញ្ចនំ មានកិញ្ចនំ ទិដ្ឋិកិញ្ចនំ កិលេសកិញ្ចនំ ទុច្ចរិតកិញ្ចនំ. ឥទំ កិញ្ចនំ តុយ្ហំ មា អហុ មា អហោសិ មា ជនេសិ [មា ជនេហិ (ស្យា.) តថាវសេសេសុ ទ្វីសុ បទេសុបិ] មា សញ្ជនេសិ មាភិនិព្ពត្តេសិ បជហ វិនោទេហិ ព្យន្តីករោហិ អនភាវំ គមេហីតិ – បច្ឆា តេ មាហុ កិញ្ចនំ.

មជ្ឈេ ចេ នោ គហេស្សសីតិ មជ្ឈេ វុច្ចតិ បច្ចុប្បន្នំ រូបំ វេទនា សញ្ញា សង្ខារា វិញ្ញាណំ. បច្ចុប្បន្នេ សង្ខារេ តណ្ហាវសេន ទិដ្ឋិវសេន ន គហេស្សសិ ន តណ្ហិស្សសិ ន បរាមសិស្សសិ ន នន្ទិស្សសិ នាភិនន្ទិស្សសិ ន អជ្ឈោសិស្សសិ. អភិនន្ទនំ អភិវទនំ អជ្ឈោសានំ គាហំ បរាមាសំ អភិនិវេសំ បជហិស្សសិ វិនោទេស្សសិ ព្យន្តីករិស្សសិ អនភាវំ គមេស្សសីតិ – មជ្ឈេ ចេ នោ គហេស្សសិ.

ឧបសន្តោ ចរិស្សសីតិ រាគស្ស ឧបសមិតត្តា ឧបសន្តោ ចរិស្សសិ, ទោសស្ស…បេ… សព្ពាកុសលាភិសង្ខារានំ សន្តត្តា សមិតត្តា ឧបសមិតត្តា វូបសមិតត្តា និជ្ឈាតត្តា និព្ពុតត្តា វិគតត្តា បដិប្បស្សទ្ធត្តា សន្តោ ឧបសន្តោ វូបសន្តោ និព្ពុតោ បដិប្បស្សទ្ធោ ចរិស្សសិ វិហរិស្សសិ ឥរិយិស្សសិ វត្តិស្សសិ បាលេស្សសិ យបេស្សសិ យាបេស្សសីតិ – ឧបសន្តោ ចរិស្សសិ. តេនាហ ភគវា –

‘‘យំ បុព្ពេ តំ វិសោសេហិ, បច្ឆា តេ មាហុ កិញ្ចនំ;

មជ្ឈេ ចេ នោ គហេស្សសិ, ឧបសន្តោ ចរិស្សសី’’តិ.

៦៩. សព្ពសោ នាមរូបស្មិំ, វីតគេធស្ស ព្រាហ្មណ;

អាសវាស្ស ន វិជ្ជន្តិ, យេហិ មច្ចុវសំ វជេ.

សព្ពសោ នាមរូបស្មិំ វីតគេធស្ស ព្រាហ្មណាតិ. សព្ពសោតិ សព្ពេន សព្ពំ សព្ពថា សព្ពំ អសេសំ និស្សេសំ បរិយាទិយនវចនមេតំ សព្ពសោតិ. នាមន្តិ ចត្តារោ អរូបិនោ ខន្ធា. រូបន្តិ ចត្តារោ ច មហាភូតា ចតុន្នញ្ច មហាភូតានំ ឧបាទាយ រូបំ. គេធោ វុច្ចតិ តណ្ហា. យោ រាគោ សារាគោ…បេ… អភិជ្ឈា លោភោ អកុសលមូលំ. សព្ពសោ នាមរូបស្មិំ វីតគេធស្ស ព្រាហ្មណាតិ សព្ពសោ នាមរូបស្មិំ វីតគេធស្ស វិគតគេធស្ស ចត្តគេធស្ស វន្តគេធស្ស មុត្តគេធស្ស បហីនគេធស្ស បដិនិស្សដ្ឋគេធស្ស វីតរាគស្ស វិគតរាគស្ស ចត្តរាគស្ស វន្តរាគស្ស មុត្តរាគស្ស បហីនរាគស្ស បដិនិស្សដ្ឋរាគស្សាតិ – សព្ពសោ នាមរូបស្មិំ វីតគេធស្ស ព្រាហ្មណ.

អាសវាស្ស ន វិជ្ជន្តីតិ. អាសវាតិ ចត្តារោ អាសវា – កាមាសវោ, ភវាសវោ, ទិដ្ឋាសវោ, អវិជ្ជាសវោ. អស្សាតិ អរហតោ ខីណាសវស្ស. ន វិជ្ជន្តីតិ ឥមេ អាសវា តស្ស នត្ថិ ន សន្តិ ន សំវិជ្ជន្តិ នុបលព្ភន្តិ បហីនា សមុច្ឆិន្នា វូបសន្តា បដិប្បស្សទ្ធា អភព្ពុប្បត្តិកា ញាណគ្គិនា ទឌ្ឍាតិ – អាសវាស្ស ន វិជ្ជន្តិ.

យេហិ មច្ចុវសំ វជេតិ យេហិ អាសវេហិ មច្ចុនោ វា វសំ គច្ឆេយ្យ, មរណស្ស វា វសំ គច្ឆេយ្យ, មារបក្ខស្ស វា វសំ គច្ឆេយ្យ; តេ អាសវា តស្ស នត្ថិ ន សន្តិ ន សំវិជ្ជន្តិ នុបលព្ភន្តិ បហីនា សមុច្ឆិន្នា វូបសន្តា បដិប្បស្សទ្ធា អភព្ពុប្បត្តិកា ញាណគ្គិនា ទឌ្ឍាតិ – យេហិ មច្ចុវសំ វជេ. តេនាហ ភគវា –

‘‘សព្ពសោ នាមរូបស្មិំ, វីតគេធស្ស ព្រាហ្មណ;

អាសវាស្ស ន វិជ្ជន្តិ, យេហិ មច្ចុវសំ វជេ’’តិ.

សហ គាថាបរិយោសានា…បេ… សត្ថា មេ ភន្តេ ភគវា, សាវកោហមស្មីតិ.

ជតុកណ្ណិមាណវបុច្ឆានិទ្ទេសោ ឯកាទសមោ.