៦. កម្មជាទិបញ្ហោ

៦. ‘‘ភន្តេ នាគសេន, កតមេ ឯត្ថ កម្មជា, កតមេ ហេតុជា, កតមេ ឧតុជា, កតមេ ន កម្មជា, ន ហេតុជា, ន ឧតុជា’’តិ? ‘‘យេ កេចិ, មហារាជ, សត្តា សចេតនា, សព្ពេ តេ កម្មជា; អគ្គិ ច សព្ពានិ ច ពីជជាតានិ ហេតុជានិ; បថវី ច បព្ពតា ច ឧទកញ្ច វាតោ ច, សព្ពេ តេ ឧតុជា; អាកាសោ ច និព្ពានញ្ច ឥមេ ទ្វេ អកម្មជា អហេតុជា អនុតុជា. និព្ពានំ បន, មហារាជ, ន វត្តព្ពំ កម្មជន្តិ វា ហេតុជន្តិ វា ឧតុជន្តិ វា ឧប្បន្នន្តិ វា អនុប្បន្នន្តិ វា ឧប្បាទនីយន្តិ វា អតីតន្តិ វា អនាគតន្តិ វា បច្ចុប្បន្នន្តិ វា ចក្ខុវិញ្ញេយ្យន្តិ វា សោតវិញ្ញេយ្យន្តិ វា ឃានវិញ្ញេយ្យន្តិ វា ជិវ្ហាវិញ្ញេយ្យន្តិ វា កាយវិញ្ញេយ្យន្តិ វា, អបិ ច, មហារាជ, មនោវិញ្ញេយ្យំ និព្ពានំ, យំ សោ សម្មាបដិបន្នោ អរិយសាវកោ វិសុទ្ធេន ញាណេន បស្សតី’’តិ. ‘‘រមណីយោ, ភន្តេ នាគសេន, បញ្ហោ សុវិនិច្ឆិតោ និស្សំសយោ ឯកន្តគតោ, វិមតិ ឧប្បច្ឆិន្នា, ត្វំ គណិវរបវរមាសជ្ជា’’តិ.

កម្មជាទិបញ្ហោ ឆដ្ឋោ.