២. វស្សគណនបញ្ហោ

២. ‘‘កតិវស្សោសិ ត្វំ, ភន្តេ នាគសេនា’’តិ? ‘‘សត្តវស្សោហំ, មហារាជា’’តិ. ‘‘កេ តេ, ភន្តេ, សត្ត, ត្វំ វា សត្ត, គណនា វា សត្តា’’តិ?

តេន ខោ បន សមយេន មិលិន្ទស្ស រញ្ញោ សព្ពាភរណបដិមណ្ឌិតស្ស អលង្កតបដិយត្តស្ស បថវិយំ ឆាយា ទិស្សតិ, ឧទកមណិកេ ច ឆាយា ទិស្សតិ. អថ ខោ អាយស្មា នាគសេនោ មិលិន្ទំ រាជានំ ឯតទវោច ‘‘អយំ តេ, មហារាជ, ឆាយា បថវិយំ ឧទកមណិកេ ច ទិស្សតិ, កិំ បន, មហារាជ, ត្វំ វា រាជា, ឆាយា វា រាជា’’តិ? ‘‘អហំ, ភន្តេ នាគសេន, រាជា, នាយំ ឆាយា រាជា, មំ បន និស្សាយ ឆាយា បវត្តតី’’តិ. ‘‘ឯវមេវ ខោ, មហារាជ, វស្សានំ គណនា សត្ត, ន បនាហំ សត្ត, មំ បន និស្សាយ សត្ត បវត្តតិ, ឆាយូបមំ មហារាជា’’តិ. ‘‘អច្ឆរិយំ, ភន្តេ នាគសេន, អព្ភុតំ, ភន្តេ នាគសេន, អតិចិត្រានិ បញ្ហបដិភានានិ វិសជ្ជិតានី’’តិ.

វស្សគណនបញ្ហោ ទុតិយោ.