៤៣៨. ទទ្ទរជាតកំ (១២)

១០៥. យោ តេ បុត្តកេ អខាទិ, ទិន្នភត្តោ អទូសកេ;

តស្មិំ ទាឋំ និបាតេហិ, មា តេ មុច្ចិត្ថ ជីវតោ.

១០៦. អាកិណ្ណលុទ្ទោ បុរិសោ, ធាតិចេលំវ មក្ខិតោ;

បទេសំ តំ ន បស្សាមិ, យត្ថ ទាឋំ និបាតយេ.

១០៧. អកតញ្ញុស្ស បោសស្ស, និច្ចំ វិវរទស្សិនោ;

សព្ពំ ចេ បថវិំ ទជ្ជា, នេវ នំ អភិរាធយេ.

១០៨. កិន្នុ សុពាហុ តរមានរូបោ, បច្ចាគតោសិ សហ មាណវេន;

កិំ កិច្ចមត្ថំ ឥធមត្ថិ តុយ្ហំ, អក្ខាហិ មេ បុច្ឆិតោ ឯតមត្ថំ.

១០៩. យោ តេ សខា ទទ្ទរោ សាធុរូបោ, តស្ស វធំ បរិសង្កាមិ អជ្ជ;

បុរិសស្ស កម្មាយតនានិ សុត្វា, នាហំ សុខិំ ទទ្ទរំ អជ្ជ មញ្ញេ.

១១០. កានិស្ស កម្មាយតនានិ អស្សុ, បុរិសស្ស វុត្តិសមោធានតាយ;

កំ វា បដិញ្ញំ បុរិសស្ស សុត្វា, បរិសង្កសិ ទទ្ទរំ មាណវេន.

១១១. ចិណ្ណា កលិង្គា ចរិតា វណិជ្ជា, វេត្តាចរោ សង្កុបថោបិ ចិណ្ណោ;

នដេហិ ចិណ្ណំ សហ វាកុរេហិ [វាករេហិ (បី. សី. និយ្យ), វាគុរេហិ (?)], ទណ្ឌេន យុទ្ធម្បិ សមជ្ជមជ្ឈេ.

១១២. ពទ្ធា កុលីកា [កុលិង្កា (សី. បី.)] មិតមាឡ្ហកេន, អក្ខា ជិតា [អក្ខាចិតា (សី. អដ្ឋ.)] សំយមោ អព្ភតីតោ;

អព្ពាហិតំ [អប្បហិតំ (សី. ស្យា.), អព្ពូហិតំ (បី. សី. និយ្យ)] បុព្ពកំ [បុប្ផកំ (សី. ស្យា.)] អឌ្ឍរត្តំ, ហត្ថា ទឌ្ឍា បិណ្ឌបដិគ្គហេន.

១១៣. តានិស្ស កម្មាយតនានិ អស្សុ, បុរិសស្ស វុត្តិសមោធានតាយ;

យថា អយំ ទិស្សតិ លោមបិណ្ឌោ, គាវោ ហតា កិំ បន ទទ្ទរស្សាតិ.

ទទ្ទរជាតកំ ទ្វាទសមំ.

នវកនិបាតំ និដ្ឋិតំ.