៩. នវកនិបាតោ

៤២៧. គិជ្ឈជាតកំ (១)

១. បរិសង្កុបថោ នាម, គិជ្ឈបន្ថោ សនន្តនោ;

តត្រាសិ មាតាបិតរោ, គិជ្ឈោ បោសេសិ ជិណ្ណកេ;

តេសំ អជគរមេទំ, អច្ចហាសិ ពហុត្តសោ [បហុត្តតោ (ក. សី.), បហូតសោ (ស្យា. បី.), ពហុធសោ (ក.)].

២. បិតា ច បុត្តំ អវច, ជានំ ឧច្ចំ បបាតិនំ;

សុបត្តំ ថាមសម្បន្នំ [បក្ខសម្បន្នំ (សី. ស្យា. បី.)], តេជស្សិំ ទូរគាមិនំ.

៣. បរិប្លវន្តំ បថវិំ, យទា តាត វិជានហិ;

សាគរេន បរិក្ខិត្តំ, ចក្កំវ បរិមណ្ឌលំ;

តតោ តាត និវត្តស្សុ, មាស្សុ ឯត្តោ បរំ គមិ.

៤. ឧទបត្តោសិ [ឧទ្ធំ បត្តោសិ (ក. សី.)] វេគេន, ពលី បក្ខី ទិជុត្តមោ;

ឱលោកយន្តោ វក្កង្គោ, បព្ពតានិ វនានិ ច.

៥. អទ្ទស្ស បថវិំ គិជ្ឈោ, យថាសាសិ [យថាស្សាសិ (ស្យា. អដ្ឋ. បាឋន្តរំ)] បិតុស្សុតំ;

សាគរេន បរិក្ខិត្តំ, ចក្កំវ បរិមណ្ឌលំ.

៦. តញ្ច សោ សមតិក្កម្ម, បរមេវច្ចវត្តថ [បរមេវ បវត្តថ (សី. ស្យា.)];

តញ្ច វាតសិខា តិក្ខា, អច្ចហាសិ ពលិំ ទិជំ.

៧. នាសក្ខាតិគតោ បោសោ, បុនទេវ និវត្តិតុំ;

ទិជោ ព្យសនមាបាទិ, វេរម្ភានំ [វេរម្ពានំ (សី. បី.)] វសំ គតោ.

៨. តស្ស បុត្តា ច ទារា ច, យេ ចញ្ញេ អនុជីវិនោ;

សព្ពេ ព្យសនមាបាទុំ, អនោវាទករេ ទិជេ.

៩. ឯវម្បិ ឥធ វុឌ្ឍានំ, យោ វាក្យំ នាវពុជ្ឈតិ;

អតិសីមចរោ ទិត្តោ, គិជ្ឈោវាតីតសាសនោ;

ស វេ ព្យសនំ បប្បោតិ, អកត្វា វុឌ្ឍសាសនន្តិ.

គិជ្ឈជាតកំ បឋមំ.

៤២៨. កោសម្ពិយជាតកំ (២)

១០. បុថុសទ្ទោ សមជនោ, ន ពាលោ កោចិ មញ្ញថ;

សង្ឃស្មិំ ភិជ្ជមានស្មិំ, នាញ្ញំ ភិយ្យោ អមញ្ញរុំ.

១១. បរិមុដ្ឋា បណ្ឌិតាភាសា, វាចាគោចរភាណិនោ;

យាវិច្ឆន្តិ មុខាយាមំ, យេន នីតា ន តំ វិទូ.

១២. អក្កោច្ឆិ មំ អវធិ មំ, អជិនិ មំ អហាសិ មេ;

យេ ច តំ ឧបនយ្ហន្តិ, វេរំ តេសំ ន សម្មតិ.

១៣. អក្កោច្ឆិ មំ អវធិ មំ, អជិនិ មំ អហាសិ មេ;

យេ ច តំ នុបនយ្ហន្តិ, វេរំ តេសូបសម្មតិ.

១៤. ន ហិ វេរេន វេរានិ, សម្មន្តីធ កុទាចនំ;

អវេរេន ច សម្មន្តិ, ឯស ធម្មោ សនន្តនោ.

១៥. បរេ ច ន វិជានន្តិ, មយមេត្ថ យមាមសេ;

យេ ច តត្ថ វិជានន្តិ, តតោ សម្មន្តិ មេធគា.

១៦. អដ្ឋិច្ឆិន្នា បាណហរា, គវស្ស [គវាស្ស (សី. ស្យា. បី.)] ធនហារិនោ;

រដ្ឋំ វិលុម្បមានានំ, តេសម្បិ ហោតិ សង្គតិ;

កស្មា តុម្ហាក នោ សិយា.

១៧. សចេ លភេថ និបកំ សហាយំ, សទ្ធិំចរំ សាធុវិហារិធីរំ;

អភិភុយ្យ សព្ពានិ បរិស្សយានិ, ចរេយ្យ តេនត្តមនោ សតីមា.

១៨. នោ ចេ លភេថ និបកំ សហាយំ, សទ្ធិំចរំ សាធុវិហារិធីរំ;

រាជាវ រដ្ឋំ វិជិតំ បហាយ, ឯកោ ចរេ មាតង្គរញ្ញេវ នាគោ.

១៩. ឯកស្ស ចរិតំ សេយ្យោ, នត្ថិ ពាលេ សហាយតា;

ឯកោ ចរេ ន បាបានិ កយិរា, អប្បោស្សុក្កោ មាតង្គរញ្ញេវ នាគោតិ.

កោសម្ពិយជាតកំ ទុតិយំ.

៤២៩. មហាសុវជាតកំ (៣)

២០. ទុមោ យទា ហោតិ ផលូបបន្នោ, ភុញ្ជន្តិ នំ វិហង្គមា [វិហគា (សី. បី.)] សម្បតន្តា;

ខីណន្តិ ញត្វាន ទុមំ ផលច្ចយេ [ញត្វា ទុមប្ផលច្ចយេន (ក.)], ទិសោទិសំ យន្តិ តតោ វិហង្គមា.

២១. ចរ ចារិកំ លោហិតតុណ្ឌ មាមរិ, កិំ ត្វំ សុវ សុក្ខទុមម្ហិ ឈាយសិ;

តទិង្ឃ មំ ព្រូហិ វសន្តសន្និភ, កស្មា សុវ សុក្ខទុមំ ន រិញ្ចសិ.

២២. យេ វេ សខីនំ សខារោ ភវន្តិ, បាណច្ចយេ [បាណំ ចជេ (ក.), បាណច្ចយេ មរណកាលេ ច សុខទុក្ខេសុ ច ន ជហន្តីតិ សម្ពន្ធោ] ទុក្ខសុខេសុ ហំស;

ខីណំ អខីណន្តិ ន តំ ជហន្តិ, សន្តោ សតំ ធម្មមនុស្សរន្តា.

២៣. សោហំ សតំ អញ្ញតរោស្មិ ហំស, ញាតី ច មេ ហោតិ សខា ច រុក្ខោ;

តំ នុស្សហេ ជីវិកត្ថោ បហាតុំ, ខីណន្តិ ញត្វាន ន ហេស ធម្មោ [ន សោស (ក.), ន ឯស (ស្យា.)].

២៤. សាធុ សក្ខិ កតំ ហោតិ, មេត្តិ សំសតិ សន្ថវោ [មិត្តំ សង្គតិ សន្ធវោ (ក.)];

សចេតំ ធម្មំ រោចេសិ, បាសំសោសិ វិជានតំ.

២៥. សោ តេ សុវ វរំ ទម្មិ, បត្តយាន វិហង្គម;

វរំ វរស្សុ វក្កង្គ, យំ កិញ្ចិ មនសិច្ឆសិ.

២៦. វរញ្ច មេ ហំស ភវំ ទទេយ្យ, អយញ្ច រុក្ខោ បុនរាយុំ លភេថ;

សោ សាខវា ផលិមា សំវិរូឡ្ហោ, មធុត្ថិកោ តិដ្ឋតុ សោភមានោ.

២៧. តំ បស្ស សម្ម ផលិមំ ឧឡារំ, សហាវ តេ ហោតុ ឧទុម្ពរេន;

សោ សាខវា ផលិមា សំវិរូឡ្ហោ, មធុត្ថិកោ តិដ្ឋតុ សោភមានោ.

២៨. ឯវំ សក្ក សុខី ហោហិ, សហ សព្ពេហិ ញាតិភិ;

យថាហមជ្ជ សុខិតោ, ទិស្វាន សផលំ ទុមំ.

២៩. សុវស្ស ច វរំ ទត្វា, កត្វាន សផលំ ទុមំ;

បក្កាមិ សហ ភរិយាយ, ទេវានំ នន្ទនំ វនន្តិ.

មហាសុវជាតកំ តតិយំ.

៤៣០. ចូឡសុវជាតកំ (៤)

៣០. សន្តិ រុក្ខា ហរិបត្តា [ហរិតបត្តា (សី. ស្យា. បី.)], ទុមា នេកផលា ពហូ;

កស្មា នុ សុក្ខេ [សុក្ខ (ក.)] កោឡាបេ, សុវស្ស និរតោ មនោ.

៣១. ផលស្ស ឧបភុញ្ជិម្ហា, នេកវស្សគណេ ពហូ;

អផលម្បិ វិទិត្វាន, សាវ មេត្តិ យថា បុរេ.

៣២. សុខញ្ច រុក្ខំ កោឡាបំ, ឱបត្តមផលំ ទុមំ;

ឱហាយ សកុណា យន្តិ, កិំ ទោសំ បស្សសេ ទិជ.

៣៣. យេ ផលត្ថា សម្ភជន្តិ, អផលោតិ ជហន្តិ នំ;

អត្តត្ថបញ្ញា ទុម្មេធា, តេ ហោន្តិ បក្ខបាតិនោ.

៣៤. សាធុ សក្ខិ កតំ ហោតិ, មេត្តិ សំសតិ សន្ថវោ;

សចេតំ ធម្មំ រោចេសិ, បាសំសោសិ វិជានតំ.

៣៥. សោ តេ សុវ វរំ ទម្មិ, បត្តយាន វិហង្គម;

វរំ វរស្សុ វក្កង្គ, យំ កិញ្ចិ មនសិច្ឆសិ.

៣៦. អបិ នាម នំ បស្សេយ្យំ [អបិ នាម នំ បុន បស្សេ (សី. ស្យា.)], សបត្តំ សផលំ ទុមំ;

ទលិទ្ទោវ និធិ លទ្ធា, នន្ទេយ្យាហំ បុនប្បុនំ.

៣៧. តតោ អមតមាទាយ, អភិសិញ្ចិ មហីរុហំ;

តស្ស សាខា វិរូហិំសុ [វិរូឡ្ហស្ស (ក.)], សីតច្ឆាយា មនោរមា.

៣៨. ឯវំ សក្ក សុខី ហោហិ, សហ សព្ពេហិ ញាតិភិ;

យថាហមជ្ជ សុខិតោ, ទិស្វាន សផលំ ទុមំ.

៣៩. សុវស្ស ច វរំ ទត្វា, កត្វាន សផលំ ទុមំ;

បក្កាមិ សហ ភរិយាយ, ទេវានំ នន្ទនំ វនន្តិ.

ចូឡសុវជាតកំ ចតុត្ថំ.

៤៣១. ហរិតចជាតកំ (៥)

៤០. សុតំ មេតំ មហាព្រហ្មេ, កាមេ ភុញ្ជតិ ហារិតោ;

កច្ចេតំ វចនំ តុច្ឆំ, កច្ចិ សុទ្ធោ ឥរិយ្យសិ.

៤១. ឯវមេតំ មហារាជ, យថា តេ វចនំ សុតំ;

កុម្មគ្គំ បដិបន្នោស្មិ, មោហនេយ្យេសុ មុច្ឆិតោ.

៤២. អទុ [អាទុ (សី. បី.)] បញ្ញា កិមត្ថិយា, និបុណា សាធុចិន្តិនី [ចិន្តនី (សី. បី.)];

យាយ ឧប្បតិតំ រាគំ, កិំ មនោ ន វិនោទយេ.

៤៣. ចត្តារោមេ មហារាជ, លោកេ អតិពលា ភុសា;

រាគោ ទោសោ មទោ មោហោ, យត្ថ បញ្ញា ន គាធតិ.

៤៤. អរហា សីលសម្បន្នោ, សុទ្ធោ ចរតិ ហារិតោ;

មេធាវី បណ្ឌិតោ ចេវ, ឥតិ នោ សម្មតោ ភវំ.

៤៥. មេធាវីនម្បិ ហិំសន្តិ, ឥសិំ ធម្មគុណេ រតំ;

វិតក្កា បាបកា រាជ, សុភា រាគូបសំហិតា.

៤៦. ឧប្បន្នាយំ សរីរជោ, រាគោ វណ្ណវិទូសនោ តវ;

តំ បជហ ភទ្ទមត្ថុ តេ, ពហុន្នាសិ មេធាវិសម្មតោ.

៤៧. តេ អន្ធការកេ [ករណេ (សី. ស្យា. បី.)] កាមេ, ពហុទុក្ខេ មហាវិសេ;

តេសំ មូលំ គវេសិស្សំ, ឆេច្ឆំ រាគំ សពន្ធនំ.

៤៨. ឥទំ វត្វាន ហារិតោ, ឥសិ សច្ចបរក្កមោ;

កាមរាគំ វិរាជេត្វា, ព្រហ្មលោកូបគោ អហូតិ.

ហរិតចជាតកំ [ហារិតជាតកំ (សី. បី.)] បញ្ចមំ.

៤៣២. បទកុសលមាណវជាតកំ (៦)

៤៩. ពហុស្សុតំ ចិត្តកថិំ [ចិត្តកថំ (ស្យា. ក.)], គង្គា វហតិ បាដលិំ [បាដលំ (សី. បី.)];

វុយ្ហមានក ភទ្ទន្តេ, ឯកំ មេ ទេហិ គាថកំ [គីតកំ (ក. អដ្ឋ.)].

៥០. យេន សិញ្ចន្តិ ទុក្ខិតំ, យេន សិញ្ចន្តិ អាតុរំ;

តស្ស មជ្ឈេ មរិស្សាមិ, ជាតំ សរណតោ ភយំ.

៥១. យត្ថ ពីជានិ រូហន្តិ, សត្តា យត្ថ បតិដ្ឋិតា;

សា មេ សីសំ និបីឡេតិ, ជាតំ សរណតោ ភយំ.

៥២. យេន ភត្តានិ បច្ចន្តិ, សីតំ យេន វិហញ្ញតិ;

សោ មំ ឌហតិ [ទយ្ហតិ (ក.)] គត្តានិ, ជាតំ សរណតោ ភយំ.

៥៣. យេន ភុត្តេន [ភត្តេន (ស្យា. ក.)] យាបេន្តិ, បុថូ ព្រាហ្មណខត្តិយា;

សោ មំ ភុត្តោ ព្យាបាទេតិ, ជាតំ សរណតោ ភយំ.

៥៤. គិម្ហានំ បច្ឆិមេ មាសេ, វាតមិច្ឆន្តិ បណ្ឌិតា;

សោ មំ [សោ មេ (សី. បី.)] ភញ្ជតិ គត្តានិ, ជាតំ សរណតោ ភយំ.

៥៥. យំ និស្សិតា ជគតិរុហំ, ស្វាយំ អគ្គិំ បមុញ្ចតិ;

ទិសា ភជថ វក្កង្គា, ជាតំ សរណតោ ភយំ.

៥៦. យមានយិំ សោមនស្សំ, មាលិនិំ ចន្ទនុស្សទំ;

សា មំ ឃរា និច្ឆុភតិ [នីហរតិ (សី. ស្យា.)], ជាតំ សរណតោ ភយំ.

៥៧. យេន ជាតេន នន្ទិស្សំ, យស្ស ច ភវមិច្ឆិសំ;

សោ មំ ឃរា និច្ឆុភតិ [នីហរតិ (សី. ស្យា.)], ជាតំ សរណតោ ភយំ.

៥៨. សុណន្តុ មេ ជានបទា, នេគមា ច សមាគតា;

យតោទកំ តទាទិត្តំ, យតោ ខេមំ តតោ ភយំ.

៥៩. រាជា វិលុម្បតេ រដ្ឋំ, ព្រាហ្មណោ ច បុរោហិតោ;

អត្តគុត្តា វិហរថ, ជាតំ សរណតោ ភយន្តិ.

បទកុសលមាណវជាតកំ ឆដ្ឋំ.

៤៣៣. លោមសកស្សបជាតកំ (៧)

៦០. អស្ស ឥន្ទសមោ រាជ, អច្ចន្តំ អជរាមរោ;

សចេ ត្វំ យញ្ញំ យាជេយ្យ, ឥសិំ លោមសកស្សបំ.

៦១. សសមុទ្ទបរិយាយំ, មហិំ សាគរកុណ្ឌលំ;

ន ឥច្ឆេ សហ និន្ទាយ, ឯវំ សេយ្យ [សយ្ហ (សី. ស្យា. បី.)] វិជានហិ.

៦២. ធិរត្ថុ តំ យសលាភំ, ធនលាភញ្ច ព្រាហ្មណ;

យា វុត្តិ វិនិបាតេន, អធម្មចរណេន វា.

៦៣. អបិ ចេ បត្តមាទាយ, អនគារោ បរិព្ពជេ;

សាយេវ ជីវិកា សេយ្យោ, យា ចាធម្មេន ឯសនា.

៦៤. អបិ ចេ បត្តមាទាយ, អនគារោ បរិព្ពជេ;

អញ្ញំ អហិំសយំ លោកេ, អបិ រជ្ជេន តំ វរំ.

៦៥. ពលំ ចន្ទោ ពលំ សុរិយោ, ពលំ សមណព្រាហ្មណា;

ពលំ វេលា សមុទ្ទស្ស, ពលាតិពលមិត្ថិយោ.

៦៦. យថា ឧគ្គតបំ សន្តំ, ឥសិំ លោមសកស្សបំ;

បិតុ អត្ថា ចន្ទវតី, វាជបេយ្យំ [វាចបេយ្យំ (បី. ក.)] អយាជយិ.