៤៣៧. បូតិមំសជាតកំ (១១)

៩៦. ន ខោ មេ រុច្ចតិ អាឡិ, បូតិមំសស្ស បេក្ខនា;

ឯតាទិសា សខារស្មា, អារកា បរិវជ្ជយេ.

៩៧. ឧម្មត្តិកា អយំ វេណី, វណ្ណេតិ បតិនោ សខិំ;

បជ្ឈាយិ [បជ្ឈាតិ (សី. បី.), បជ្ឈាយតិ (សី. និយ្យ)] បដិគច្ឆន្តិំ, អាគតំ មេណ្ឌ [មេឡ (សី. បី.)] មាតរំ.

៩៨. ត្វំ ខោសិ សម្ម ឧម្មត្តោ, ទុម្មេធោ អវិចក្ខណោ;

យោ ត្វំ [សោ ត្វំ (ស្យា.)] មតាលយំ កត្វា, អកាលេន វិបេក្ខសិ.

៩៩. ន អកាលេ វិបេក្ខេយ្យ, កាលេ បេក្ខេយ្យ បណ្ឌិតោ;

បូតិមំសោវ បជ្ឈាយិ [បជ្ឈាតិ (សី. បី.), បជ្ឈាយតិ (សី. និយ្យ)], យោ អកាលេ វិបេក្ខតិ.

១០០. បិយំ ខោ អាឡិ មេ ហោតុ, បុណ្ណបត្តំ ទទាហិ មេ;

បតិ សញ្ជីវិតោ មយ្ហំ, ឯយ្យាសិ បិយបុច្ឆិកា [បុច្ឆិតា (ស្យា. ក.)].

១០១. បិយំ ខោ អាឡិ តេ ហោតុ, បុណ្ណបត្តំ ទទាមិ តេ;

មហតា បរិវារេន [បរិហារេន (ស្យា.)], ឯស្សំ [ឯសំ (សី. បី.)] កយិរាហិ [កយិរាសិ (បី.)] ភោជនំ.

១០២. កីទិសោ តុយ្ហំ បរិវារោ, យេសំ កាហាមិ ភោជនំ;

កិំនាមកា ច តេ សព្ពេ, តំ [តេ (សី. ស្យា. បី.)] មេ អក្ខាហិ បុច្ឆិតា.

១០៣. មាលិយោ ចតុរក្ខោ ច, បិង្គិយោ អថ ជម្ពុកោ;

ឯទិសោ មយ្ហំ បរិវារោ, តេសំ កយិរាហិ [កយិរាសិ (បី.)] ភោជនំ.

១០៤. និក្ខន្តាយ អគារស្មា, ភណ្ឌកម្បិ វិនស្សតិ;

អារោគ្យំ អាឡិនោ វជ្ជំ [វច្ឆំ (?)], ឥធេវ វស មាគមាតិ.

បូតិមំសជាតកំ ឯកាទសមំ.