៤៣៦. សមុគ្គជាតកំ (១០)

៨៧. កុតោ នុ អាគច្ឆថ ភោ តយោ ជនា, ស្វាគតា ឯថ [ស្វាគតំ ឯត្ថ (សី. បី.)] និសីទថាសនេ;

កច្ចិត្ថ ភោន្តោ កុសលំ អនាមយំ, ចិរស្សមព្ភាគមនំ ហិ វោ ឥធ.

៨៨. អហមេវ ឯកោ ឥធ មជ្ជ បត្តោ, ន ចាបិ មេ ទុតិយោ កោចិ វិជ្ជតិ;

កិមេវ សន្ធាយ តេ ភាសិតំ ឥសេ, ‘‘កុតោ នុ អាគច្ឆថ ភោ តយោ ជនា’’.

៨៩. តុវញ្ច ឯកោ ភរិយា ច តេ បិយា, សមុគ្គបក្ខិត្តនិកិណ្ណមន្តរេ;

សា រក្ខិតា កុច្ឆិគតាវ [កុច្ឆិគតា ច (ក.)] តេ សទា, វាយុស្ស [ហរិស្ស (ក.)] បុត្តេន សហា តហិំ រតា.

៩០. សំវិគ្គរូបោ ឥសិនា វិយាកតោ [បព្យាកតោ (ក.), ព្យាកតោ (ស្យា. បី.)], សោ ទានវោ តត្ថ សមុគ្គមុគ្គិលិ;

អទ្ទក្ខិ ភរិយំ សុចិ មាលធារិនិំ, វាយុស្ស បុត្តេន សហា តហិំ រតំ.

៩១. សុទិដ្ឋរូបមុគ្គតបានុវត្តិនា [សុទិដ្ឋរូបុគ្គតបានុវត្តិនា (សី. ស្យា. បី.)], ហីនា នរា យេ បមទាវសំ គតា;

យថា ហវេ បាណរិវេត្ថ រក្ខិតា, ទុដ្ឋា មយី អញ្ញមភិប្បមោទយិ.

៩២. ទិវា ច រត្តោ ច មយា ឧបដ្ឋិតា, តបស្សិនា ជោតិរិវា វនេ វសំ;

សា ធម្មមុក្កម្ម អធម្មមាចរិ, អកិរិយរូបោ បមទាហិ សន្ថវោ.

៩៣. សរីរមជ្ឈម្ហិ ឋិតាតិមញ្ញហំ, មយ្ហំ អយន្តិ អសតិំ អសញ្ញតំ;

សា ធម្មមុក្កម្ម អធម្មមាចរិ, អកិរិយរូបោ បមទាហិ សន្ថវោ.

៩៤. សុរក្ខិតំ មេតិ កថំ នុ វិស្សសេ, អនេកចិត្តាសុ ន ហត្ថិ [អនេកចិត្តា បុន ហេត្ថ (ក.)] រក្ខណា;

ឯតា ហិ បាតាលបបាតសន្និភា, ឯត្ថប្បមត្តោ ព្យសនំ និគច្ឆតិ.

៩៥. តស្មា ហិ តេ សុខិនោ វីតសោកា, យេ មាតុគាមេហិ ចរន្តិ និស្សដា;

ឯតំ សិវំ ឧត្តមមាភិបត្ថយំ, ន មាតុគាមេហិ ករេយ្យ សន្ថវន្តិ.

សមុគ្គជាតកំ ទសមំ.