៤៣៥. ហលិទ្ទិរាគជាតកំ (៩)

៧៨. សុតិតិក្ខំ អរញ្ញម្ហិ, បន្តម្ហិ សយនាសនេ;

យេ ច គាមេ តិតិក្ខន្តិ, តេ ឧឡារតរា តយា.

៧៩. អរញ្ញា គាមមាគម្ម, កិំសីលំ កិំវតំ អហំ;

បុរិសំ តាត សេវេយ្យំ, តំ មេ អក្ខាហិ បុច្ឆិតោ.

៨០. យោ តេ [យោ តំ (ស្យា. ជា. ១.៤.១៩០ អរញ្ញជាតកេបិ)] វិស្សាសយេ តាត, វិស្សាសញ្ច ខមេយ្យ តេ;

សុស្សូសី ច តិតិក្ខី ច, តំ ភជេហិ ឥតោ គតោ.

៨១. យស្ស កាយេន វាចាយ, មនសា នត្ថិ ទុក្កដំ;

ឧរសីវ បតិដ្ឋាយ, តំ ភជេហិ ឥតោ គតោ.

៨២. យោ ច ធម្មេន ចរតិ, ចរន្តោបិ ន មញ្ញតិ;

វិសុទ្ធការិំ សប្បញ្ញំ, តំ ភជេហិ ឥតោ គតោ.

៨៣. ហលិទ្ទិរាគំ កបិចិត្តំ, បុរិសំ រាគវិរាគិនំ;

តាទិសំ តាត មា សេវិ, និម្មនុស្សម្បិ ចេ សិយា.

៨៤. អាសីវិសំវ កុបិតំ, មីឡ្ហលិត្តំ មហាបថំ;

អារកា បរិវជ្ជេហិ, យានីវ វិសមំ បថំ.

៨៥. អនត្ថា តាត វឌ្ឍន្តិ, ពាលំ អច្ចុបសេវតោ;

មាស្សុ ពាលេន សំគច្ឆិ, អមិត្តេនេវ សព្ពទា.

៨៦. តំ តាហំ តាត យាចាមិ, ករស្សុ វចនំ មម;

មាស្សុ ពាលេន សំគច្ឆិ [សំគញ្ឆិ (សី. បី.)], ទុក្ខោ ពាលេហិ សង្គមោតិ.

ហលិទ្ទិរាគជាតកំ នវមំ.