៤៣៤. ចក្កវាកជាតកំ (៨)

៦៩. កាសាយវត្ថេ សកុណេ វទាមិ, ទុវេ ទុវេ នន្ទមនេ [នន្ទិមនេ (សី. បី.)] ចរន្តេ;

កំ អណ្ឌជំ អណ្ឌជា មានុសេសុ, ជាតិំ បសំសន្តិ តទិង្ឃ ព្រូថ.

៧០. អម្ហេ មនុស្សេសុ មនុស្សហិំស, អនុព្ពតេ [អនុបុព្ពកេ (ក.)] ចក្កវាកេ វទន្តិ;

កល្យាណភាវម្ហេ [ភាវ’ម្ហ (សី. បី.)] ទិជេសុ សម្មតា, អភិរូបា [អភីតរូបា (សី. ស្យា. បី.)] វិចរាម អណ្ណវេ. ( ) [(ន ឃាសហេតូបិ ករោម បាបំ) (ក.)]

៧១. កិំ អណ្ណវេ កានិ ផលានិ ភុញ្ជេ, មំសំ កុតោ ខាទថ ចក្កវាកា;

កិំ ភោជនំ ភុញ្ជថ វោ អនោមា [អភិណ្ហំ (ក.)], ពលញ្ច វណ្ណោ ច អនប្បរូបា [អនប្បរូបោ (សី. ស្យា. បី.)].

៧២. ន អណ្ណវេ សន្តិ ផលានិ ធង្ក, មំសំ កុតោ ខាទិតុំ ចក្កវាកេ;

សេវាលភក្ខម្ហ [ភក្ខិម្ហ (ក.)] អបាណភោជនា [អវាកភោជនា (សី. បី.)], ន ឃាសហេតូបិ ករោម បាបំ.

៧៣. ន មេ ឥទំ រុច្ចតិ ចក្កវាក, អស្មិំ ភវេ ភោជនសន្និកាសោ;

អហោសិ បុព្ពេ តតោ មេ អញ្ញថា, ឥច្ចេវ មេ វិមតិ ឯត្ថ ជាតា.

៧៤. អហម្បិ មំសានិ ផលានិ ភុញ្ជេ, អន្នានិ ច លោណិយតេលិយានិ;

រសំ មនុស្សេសុ លភាមិ ភោត្តុំ, សូរោវ សង្គាមមុខំ វិជេត្វា;

ន ច មេ តាទិសោ វណ្ណោ, ចក្កវាក យថា តវ.

៧៥. អសុទ្ធភក្ខោសិ ខណានុបាតី, កិច្ឆេន តេ លព្ភតិ អន្នបានំ;

ន តុស្សសី រុក្ខផលេហិ ធង្ក, មំសានិ វា យានិ សុសានមជ្ឈេ.

៧៦. យោ សាហសេន អធិគម្ម ភោគេ, បរិភុញ្ជតិ ធង្ក ខណានុបាតី;

តតោ ឧបក្កោសតិ នំ សភាវោ, ឧបក្កុដ្ឋោ វណ្ណពលំ ជហាតិ.

៧៧. អប្បម្បិ ចេ និព្ពុតិំ ភុញ្ជតី យទិ, អសាហសេន អបរូបឃាតី [អសាហសេនានុបឃាតិនោ (ក.)];

ពលញ្ច វណ្ណោ ច តទស្ស ហោតិ, ន ហិ សព្ពោ អាហារមយេន វណ្ណោតិ.

ចក្កវាកជាតកំ អដ្ឋមំ.