៤៣៣. លោមសកស្សបជាតកំ (៧)

៦០. អស្ស ឥន្ទសមោ រាជ, អច្ចន្តំ អជរាមរោ;

សចេ ត្វំ យញ្ញំ យាជេយ្យ, ឥសិំ លោមសកស្សបំ.

៦១. សសមុទ្ទបរិយាយំ, មហិំ សាគរកុណ្ឌលំ;

ន ឥច្ឆេ សហ និន្ទាយ, ឯវំ សេយ្យ [សយ្ហ (សី. ស្យា. បី.)] វិជានហិ.

៦២. ធិរត្ថុ តំ យសលាភំ, ធនលាភញ្ច ព្រាហ្មណ;

យា វុត្តិ វិនិបាតេន, អធម្មចរណេន វា.

៦៣. អបិ ចេ បត្តមាទាយ, អនគារោ បរិព្ពជេ;

សាយេវ ជីវិកា សេយ្យោ, យា ចាធម្មេន ឯសនា.

៦៤. អបិ ចេ បត្តមាទាយ, អនគារោ បរិព្ពជេ;

អញ្ញំ អហិំសយំ លោកេ, អបិ រជ្ជេន តំ វរំ.

៦៥. ពលំ ចន្ទោ ពលំ សុរិយោ, ពលំ សមណព្រាហ្មណា;

ពលំ វេលា សមុទ្ទស្ស, ពលាតិពលមិត្ថិយោ.

៦៦. យថា ឧគ្គតបំ សន្តំ, ឥសិំ លោមសកស្សបំ;

បិតុ អត្ថា ចន្ទវតី, វាជបេយ្យំ [វាចបេយ្យំ (បី. ក.)] អយាជយិ.

៦៧. តំ លោភបកតំ កម្មំ, កដុកំ កាមហេតុកំ;

តស្ស មូលំ គវេសិស្សំ, ឆេច្ឆំ រាគំ សពន្ធនំ.

៦៨. ធិរត្ថុ កាមេ សុពហូបិ លោកេ, តបោវ សេយ្យោ កាមគុណេហិ រាជ;

តបោ ករិស្សាមិ បហាយ កាមេ, តវេវ រដ្ឋំ ចន្ទវតី ច ហោតូតិ.

លោមសកស្សបជាតកំ សត្តមំ.