៤២៦. ទីបិជាតកំ (១០)

៨៨. ខមនីយំ យាបនីយំ, កច្ចិ មាតុល តេ សុខំ;

សុខំ តេ អម្មា អវច, សុខកាមាវ [សុខកាមា ហិ (សី. ស្យា. បី.)] តេ មយំ.

៨៩. នង្គុដ្ឋំ មេ អវក្កម្ម [អបក្កម្ម (ក.)], ហេឋយិត្វាន [បោថយិត្វាន (ក.)] ឯឡិកេ [ឯឡកិ (ស្យា.), ឯឡិកិ (បី.)];

សាជ្ជ មាតុលវាទេន, មុញ្ចិតព្ពា នុ មញ្ញសិ.

៩០. បុរត្ថាមុខោ និសិន្នោសិ, អហំ តេ មុខមាគតា;

បច្ឆតោ តុយ្ហំ នង្គុដ្ឋំ, កថំ ខ្វាហំ អវក្កមិំ [អបក្កមិំ (ក.)].

៩១. យាវតា ចតុរោ ទីបា, សសមុទ្ទា សបព្ពតា;

តាវតា មយ្ហំ នង្គុដ្ឋំ, កថំ ខោ ត្វំ វិវជ្ជយិ.

៩២. បុព្ពេវ មេតមក្ខិំសុ [មេតំ អក្ខំសុ (សី. បី.)], មាតា បិតា ច ភាតរោ;

ទីឃំ ទុដ្ឋស្ស នង្គុដ្ឋំ, សាម្ហិ វេហាយសាគតា.

៩៣. តញ្ច ទិស្វាន អាយន្តិំ, អន្តលិក្ខស្មិ ឯឡិកេ;

មិគសង្ឃោ បលាយិត្ថ, ភក្ខោ មេ នាសិតោ តយា.

៩៤. ឥច្ចេវំ វិលបន្តិយា, ឯឡកិយា រុហគ្ឃសោ;

គលកំ អន្វាវមទ្ទិ, នត្ថិ ទុដ្ឋេ សុភាសិតំ.

៩៥. នេវ ទុដ្ឋេ នយោ អត្ថិ, ន ធម្មោ ន សុភាសិតំ;

និក្កមំ ទុដ្ឋេ យុញ្ជេថ, សោ ច សព្ភិំ ន រញ្ជតីតិ.

ទីបិជាតកំ ទសមំ.

អដ្ឋកនិបាតំ និដ្ឋិតំ.