៤២៥. អដ្ឋានជាតកំ (៩)

៧៧. គង្គា កុមុទិនី សន្តា, សង្ខវណ្ណា ច កោកិលា;

ជម្ពុ តាលផលំ ទជ្ជា, អថ នូន តទា សិយា.

៧៨. យទា កច្ឆបលោមានំ, បាវារោ តិវិធោ សិយា;

ហេមន្តិកំ បាវុរណំ [បាបុរណំ (សី. ស្យា. បី.)], អថ នូន តទា សិយា.

៧៩. យទា មកសបាទានំ [ទាឋានំ (សី. បី.)], អដ្ដាលោ សុកតោ សិយា;

ទឡ្ហោ ច អវិកម្បី ច [អប្បកម្បី ច (សី. បី.)], អថ នូន តទា សិយា.

៨០. យទា សសវិសាណានំ, និស្សេណី សុកតា សិយា;

សគ្គស្សារោហណត្ថាយ, អថ នូន តទា សិយា.

៨១. យទា និស្សេណិមារុយ្ហ, ចន្ទំ ខាទេយ្យុ មូសិកា;

រាហុញ្ច បរិបាតេយ្យុំ [បរិពាហេយ្យុំ (ស្យា.)], អថ នូន តទា សិយា.

៨២. យទា សុរាឃដំ បិត្វា, មក្ខិកា គណចារិណី;

អង្គារេ វាសំ កប្បេយ្យុំ, អថ នូន តទា សិយា.

៨៣. យទា ពិម្ពោដ្ឋសម្បន្នោ, គទ្រភោ សុមុខោ សិយា;

កុសលោ នច្ចគីតស្ស, អថ នូន តទា សិយា.

៨៤. យទា កាកា ឧលូកា ច, មន្តយេយ្យុំ រហោគតា;

អញ្ញមញ្ញំ បិហយេយ្យុំ, អថ នូន តទា សិយា.

៨៥. យទា មុឡាល [បុលស (សី. បី.), បុលាស (ស្យា.)] បត្តានំ, ឆត្តំ ថិរតរំ សិយា;

វស្សស្ស បដិឃាតាយ, អថ នូន តទា សិយា.

៨៦. យទា កុលកោ [កុលុង្កោ (សី. បី.), កុលុកោ (ស្យា.)] សកុណោ, បព្ពតំ គន្ធមាទនំ;

តុណ្ឌេនាទាយ គច្ឆេយ្យ, អថ នូន តទា សិយា.

៨៧. យទា សាមុទ្ទិកំ នាវំ, ស-យន្តំ ស-វដាករំ [សបដាការំ (ក.)];

ចេដោ អាទាយ គច្ឆេយ្យ, អថ នូន តទា សិយាតិ.

អដ្ឋានជាតកំ នវមំ.