៤២២. ចេតិយជាតកំ (៦)

៤៥. ធម្មោ ហវេ ហតោ ហន្តិ, នាហតោ ហន្តិ កិញ្ចនំ [កញ្ចិនំ (បី.)];

តស្មា ហិ ធម្មំ ន ហនេ, មា ត្វំ [តំ (ស្យា. បី.)] ធម្មោ ហតោ ហនិ.

៤៦. អលិកំ ភាសមានស្ស, អបក្កមន្តិ ទេវតា;

បូតិកញ្ច មុខំ វាតិ, សកដ្ឋានា ច ធំសតិ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៤៧. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភូមិយំ តិដ្ឋ ចេតិយ.

៤៨. អកាលេ វស្សតី តស្ស, កាលេ តស្ស ន វស្សតិ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៤៩. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភូមិំ បវិស ចេតិយ.

៥០. ជិវ្ហា តស្ស ទ្វិធា ហោតិ, ឧរគស្សេវ ទិសម្បតិ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៥១. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភិយ្យោ បវិស ចេតិយ.

៥២. ជិវ្ហា តស្ស ន ភវតិ, មច្ឆស្សេវ ទិសម្បតិ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៥៣. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភិយ្យោ បវិស ចេតិយ.

៥៤. ថិយោវ តស្ស ជាយន្តិ [ថិយោ តស្ស បជាយន្តិ (ក.)], ន បុមា ជាយរេ កុលេ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៥៥. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភិយ្យោ បវិស ចេតិយ.

៥៦. បុត្តា តស្ស ន ភវន្តិ, បក្កមន្តិ ទិសោទិសំ;

យោ ជានំ បុច្ឆិតោ បញ្ហំ, អញ្ញថា នំ វិយាករេ.

៥៧. សចេ ហិ សច្ចំ ភណសិ, ហោហិ រាជ យថា បុរេ;

មុសា ចេ ភាសសេ រាជ, ភិយ្យោ បវិស ចេតិយ.

៥៨. ស រាជា ឥសិនា សត្តោ, អន្តលិក្ខចរោ បុរេ;

បាវេក្ខិ បថវិំ ចេច្ចោ, ហីនត្តោ បត្វ បរិយាយំ [អត្តបរិយាយំ (សី. ស្យា.), បត្តបរិយាយំ (ក. សី. និយ្យ)].

៥៩. តស្មា ហិ ឆន្ទាគមនំ, នប្បសំសន្តិ បណ្ឌិតា;

អទុដ្ឋចិត្តោ ភាសេយ្យ, គិរំ សច្ចូបសំហិតន្តិ.

ចេតិយជាតកំ ឆដ្ឋំ.