៤២៣. ឥន្ទ្រិយជាតកំ (៧)

៦០. យោ ឥន្ទ្រិយានំ កាមេន, វសំ នារទ គច្ឆតិ;

សោ បរិច្ចជ្ជុភោ លោកេ, ជីវន្តោវ វិសុស្សតិ [ជីវន្តោបិវិសុស្សតិ (ស្យា.), ជីវន្តោ វាបិ សុស្សតិ (ក.)].

៦១. សុខស្សានន្តរំ ទុក្ខំ, ទុក្ខស្សានន្តរំ សុខំ;

សោសិ [សោបិ (ស្យា. បី. ក.)] បត្តោ សុខា [សុខ (ស្យា.), សុខំ (ក.)] ទុក្ខំ, បាដិកង្ខ វរំ សុខំ.

៦២. កិច្ឆកាលេ កិច្ឆសហោ, យោ កិច្ឆំ នាតិវត្តតិ;

ស កិច្ឆន្តំ សុខំ ធីរោ, យោគំ សមធិគច្ឆតិ.

៦៣. ន ហេវ កាមាន កាមា, នានត្ថា នាត្ថការណា;

ន កតញ្ច និរង្កត្វា, ធម្មា ចវិតុមរហសិ.

៦៤. ទក្ខំ គហបតី [គហបតំ (សី. ស្យា. បី.), គហវតំ (?)] សាធុ, សំវិភជ្ជញ្ច ភោជនំ;

អហាសោ អត្ថលាភេសុ, អត្ថព្យាបត្តិ អព្យថោ.

៦៥. ឯត្តាវតេតំ បណ្ឌិច្ចំ, អបិ សោ [អសិតោ (សី. ស្យា. បី.)] ទវិលោ [ទេវលោ (សី. បី.)] ព្រវិ;

ន យិតោ កិញ្ចិ បាបិយោ, យោ ឥន្ទ្រិយានំ វសំ វជេ.

៦៦. អមិត្តានំវ ហត្ថត្ថំ, សិវិ បប្បោតិ មាមិវ;

កម្មំ វិជ្ជញ្ច ទក្ខេយ្យំ, វិវាហំ សីលមទ្ទវំ;

ឯតេ ច យសេ ហាបេត្វា, និព្ពត្តោ សេហិ កម្មេហិ.

៦៧. សោហំ សហស្សជីនោវ អពន្ធុ អបរាយណោ;

អរិយធម្មា អបក្កន្តោ, យថា បេតោ តថេវហំ.

៦៨. សុខកាមេ ទុក្ខាបេត្វា, អាបន្នោស្មិ បទំ ឥមំ;

សោ សុខំ នាធិគច្ឆាមិ, ឋិតោ [ចិតោ (បី. សី. អដ្ឋ.)] ភាណុមតាមិវាតិ.

ឥន្ទ្រិយជាតកំ សត្តមំ.