៤០៥. ពកជាតកំ (៧-១-១០)

៦៨. ទ្វាសត្តតិ គោតម [ភោ គោតម (ក.)] បុញ្ញកម្មា, វសវត្តិនោ ជាតិជរំ អតីតា;

អយមន្តិមា វេទគូ ព្រហ្មបត្តិ [ព្រហ្មុបបត្តិ (ស្យា. ក.)], អស្មាភិជប្បន្តិ ជនា [បជា (ក.)] អនេកា.

៦៩. អប្បញ្ហិ ឯតំ [អប្បញ្ច ហេតំ (ស្យា.), អប្បំសិ ឯតំ (ក.)] ន ហិ ទីឃមាយុ, យំ ត្វំ ពក មញ្ញសិ ទីឃមាយុំ;

សតំ សហស្សានិ [សហស្សានំ (សី. បី. សំ. និ. ១.១៧៥), សហស្សាន (ស្យា. កំ.)] និរព្ពុទានំ, អាយុំ បជានាមិ តវាហ ព្រហ្មេ.

៧០. អនន្តទស្សី ភគវាហមស្មិ, ជាតិជ្ជរំ សោកមុបាតិវត្តោ;

កិំ មេ បុរាណំ វតសីលវត្តំ [សីលវន្តំ (បី. ក.)], អាចិក្ខ មេ តំ យមហំ វិជញ្ញំ.

៧១. យំ ត្វំ អបាយេសិ ពហូ មនុស្សេ, បិបាសិតេ ឃម្មនិ សម្បរេតេ;

តំ តេ បុរាណំ វតសីលវត្តំ, សុត្តប្បពុទ្ធោវ អនុស្សរាមិ.

៧២. យំ ឯណិកូលស្មិ ជនំ គហីតំ, អមោចយី គយ្ហក និយ្យមានំ;

តំ តេ បុរាណំ វតសីលវត្តំ, សុត្តប្បពុទ្ធោវ អនុស្សរាមិ.

៧៣. គង្គាយ សោតស្មិំ គហីតនាវំ, លុទ្ទេន នាគេន មនុស្សកប្បា;

អមោចយិ ត្វំ ពលសា បសយ្ហ, តំ តេ បុរាណំ វតសីលវត្តំ;

សុត្តប្បពុទ្ធោវ អនុស្សរាមិ.

៧៤. កប្បោ ច តេ ពទ្ធចរោ [បត្ថចរោ (ស្យា.), បដ្ឋចរោ (ក.)] អហោសិ, សម្ពុទ្ធិមន្តំ [សម្ពុទ្ធិវន្តំ (ស្យា. បី.), សម្ពុទ្ធវន្តំ (ក.)] វតិនំ [វតិតំ (ស្យា.), វតិទំ (ក.)] អមញ្ញំ;

តំ តេ បុរាណំ វតសីលវត្តំ, សុត្តប្បពុទ្ធោវ អនុស្សរាមិ.

៧៥. អទ្ធា បជានាសិ មមេតមាយុំ, អញ្ញម្បិ ជានាសិ តថា ហិ ពុទ្ធោ;

តថា ហិ តាយំ [ត្យាយំ (សំ. និ. ១.១៧៥)] ជលិតានុភាវោ, ឱភាសយំ តិដ្ឋតិ ព្រហ្មលោកន្តិ.

ពកជាតកំ ទសមំ.

កុក្កុវគ្គោ បឋមោ.

តស្សុទ្ទានំ –

វរកណ្ណិក ចាបវរោ សុតនោ, អថ គិជ្ឈ សរោហិតមច្ឆវរោ;

បុន បណ្ណក [ទសណ្ណក (សី. ស្យា. បី.)] សេនក យាចនកោ, អថ វេរិ សព្រហ្មពកេន ទសាតិ.