៤០៤. កបិជាតកំ (៧-១-៩)

៦១. យត្ថ វេរី និវសតិ, ន វសេ តត្ថ បណ្ឌិតោ;

ឯករត្តំ ទិរត្តំ វា, ទុក្ខំ វសតិ វេរិសុ.

៦២. ទិសោ វេ លហុចិត្តស្ស, បោសស្សានុវិធីយតោ;

ឯកស្ស កបិនោ ហេតុ, យូថស្ស អនយោ កតោ.

៦៣. ពាលោវ [ច (សី. ស្យា. បី.)] បណ្ឌិតមានី, យូថស្ស បរិហារកោ;

សចិត្តស្ស វសំ គន្ត្វា, សយេថាយំ [បស្សេថាយំ (ក.)] យថា កបិ.

៦៤. ន សាធុ ពលវា ពាលោ, យូថស្ស បរិហារកោ;

អហិតោ ភវតិ ញាតីនំ, សកុណានំវ ចេតកោ [ចេដកោ (ក.)].

៦៥. ធីរោវ ពលវា សាធុ, យូថស្ស បរិហារកោ;

ហិតោ ភវតិ ញាតីនំ, តិទសានំវ វាសវោ.

៦៦. យោ ច សីលញ្ច បញ្ញញ្ច, សុតញ្ចត្តនិ បស្សតិ;

ឧភិន្នមត្ថំ ចរតិ, អត្តនោ ច បរស្ស ច.

៦៧. តស្មា តុលេយ្យ មត្តានំ, សីលបញ្ញាសុតាមិវ [សីលំ បញ្ញំ សុតំបិវ (ស្យា.)];

គណំ វា បរិហរេ ធីរោ, ឯកោ វាបិ បរិព្ពជេតិ.

កបិជាតកំ នវមំ.