៣៨៥. នន្ទិយមិគរាជជាតកំ (៦-១-១០)

៧០. សចេ ព្រាហ្មណ គច្ឆេសិ, សាកេតេ [សាកេតំ (សី. ស្យា.)] អជ្ជុនំ [អញ្ឈនំ (សី. ស្យា. បី.)] វនំ;

វជ្ជាសិ នន្ទិយំ នាម, បុត្តំ អស្មាកមោរសំ;

មាតា បិតា ច តេ វុទ្ធា, តេ តំ ឥច្ឆន្តិ បស្សិតុំ.

៧១. ភុត្តា មយា និវាបានិ, រាជិនោ បានភោជនំ;

តំ រាជបិណ្ឌំ អវភោត្តុំ [អវភោត្តំ (ក.)], នាហំ ព្រាហ្មណ មុស្សហេ.

៧២. ឱទហិស្សាមហំ បស្សំ, ខុរប្បានិស្ស [ខុរប្បាណិស្ស (សី.), ខុរបាណិស្ស (បី.), ខុរប្បបាណិស្ស (?)] រាជិនោ;

តទាហំ សុខិតោ មុត្តោ, អបិ បស្សេយ្យ មាតរំ.

៧៣. មិគរាជា បុរេ អាសិំ, កោសលស្ស និកេតនេ [និកេតវេ (សី. ស្យា. បី.)];

នន្ទិយោ នាម នាមេន, អភិរូបោ ចតុប្បទោ.

៧៤. តំ មំ វធិតុមាគច្ឆិ, ទាយស្មិំ អជ្ជុនេ វនេ;

ធនុំ អារជ្ជំ [អារជ្ជុំ (និយ្យ), អទេជ្ឈំ (សី. បី.) អទ្វេធាភាវំ ឯកីភាវន្តិ អត្ថោ] កត្វាន, ឧសុំ សន្នយ្ហ [សន្ធាយ (សី. បី.)] កោសលោ.

៧៥. តស្សាហំ ឱទហិំ បស្សំ, ខុរប្បានិស្ស រាជិនោ;

តទាហំ សុខិតោ មុត្តោ, មាតរំ ទដ្ឋុមាគតោតិ.

នន្ទិយមិគរាជជាតកំ ទសមំ.

អវារិយវគ្គោ បឋមោ.

តស្សុទ្ទានំ –

អថ កុជ្ឈរថេសភ កេតុវរោ, សទរីមុខ នេរុ លតា ច បុន;

អបនន្ទ សិរី ច សុចិត្តវរោ, អថ ធម្មិក នន្ទិមិគេន ទសាតិ.