៣៨៤. ធម្មធជជាតកំ (៦-១-៩)

៦៤. ធម្មំ ចរថ ញាតយោ, ធម្មំ ចរថ ភទ្ទំ វោ [ភទ្ទ វោ (ក.)];

ធម្មចារី សុខំ សេតិ, អស្មិំ លោកេ បរម្ហិ ច.

៦៥. ភទ្ទកោ វតយំ បក្ខី, ទិជោ បរមធម្មិកោ;

ឯកបាទេន តិដ្ឋន្តោ, ធម្មមេវានុសាសតិ.

៦៦. នាស្ស សីលំ វិជានាថ, អនញ្ញាយ បសំសថ;

ភុត្វា អណ្ឌញ្ច បោតញ្ច [ឆាបេ ច (សី. បី.)], ធម្មោ ធម្មោតិ ភាសតិ.

៦៧. អញ្ញំ ភណតិ វាចាយ, អញ្ញំ កាយេន កុព្ពតិ;

វាចាយ នោ ច កាយេន, ន តំ ធម្មំ អធិដ្ឋិតោ.

៦៨. វាចាយ សខិលោ មនោវិទុគ្គោ, ឆន្នោ កូបសយោវ កណ្ហសប្បោ;

ធម្មធជោ គាមនិគមាសុសាធុ [គាមនិគមាសុ សាធុសម្មតោ (សី.), គាមនិគមសាធុ (បី.)], ទុជ្ជានោ បុរិសេន ពាលិសេន.

៦៩. ឥមំ តុណ្ឌេហិ បក្ខេហិ, បាទា ចិមំ វិហេឋថ [វិបោថថ (បី.)];

ឆវញ្ហិមំ វិនាសេថ, នាយំ សំវាសនារហោតិ.

ធម្មធជជាតកំ នវមំ.