៣៨៣. កុក្កុដជាតកំ (៦-១-៨)

៥៧. សុចិត្តបត្តឆទន, តម្ពចូឡ វិហង្គម;

ឱរោហ ទុមសាខាយ, មុធា ភរិយា ភវាមិ តេ.

៥៨. ចតុប្បទី ត្វំ កល្យាណិ, ទ្វិបទាហំ មនោរមេ;

មិគី បក្ខី អសញ្ញុត្តា, អញ្ញំ បរិយេស សាមិកំ.

៥៩. កោមារិកា តេ ហេស្សាមិ, មញ្ជុកា បិយភាណិនី;

វិន្ទ មំ អរិយេន វេទេន, សាវយ មំ យទិច្ឆសិ.

៦០. កុណបាទិនិ លោហិតបេ, ចោរិ កុក្កុដបោថិនិ;

ន ត្វំ អរិយេន វេទេន, មមំ ភត្តារមិច្ឆសិ.

៦១. ឯវម្បិ ចតុរា [ចាតុរា (ស្យា. ក.)] នារី, ទិស្វាន សធនំ [បវរំ (សី. ស្យា. បី.)] នរំ;

នេន្តិ សណ្ហាហិ វាចាហិ, ពិឡារី វិយ កុក្កុដំ.

៦២. យោ ច ឧប្បតិតំ អត្ថំ, ន ខិប្បមនុពុជ្ឈតិ;

អមិត្តវសមន្វេតិ, បច្ឆា ច អនុតប្បតិ.

៦៣. យោ ច ឧប្បតិតំ អត្ថំ, ខិប្បមេវ និពោធតិ;

មុច្ចតេ សត្តុសម្ពាធា, កុក្កុដោវ ពិឡារិយាតិ.

កុក្កុដជាតកំ អដ្ឋមំ.