៣៦០. សុយោនន្ទីជាតកំ (៥-១-១០)

៥៥. វាតិ គន្ធោ តិមិរានំ, កុសមុទ្ទោ ច [វ (ស្យា. បី.)] ឃោសវា;

ទូរេ ឥតោ សុយោនន្ទី [ឥតោ ហិ សុសន្ទី (សី. ស្យា.), ឥតោបិ សុស្សោន្ទី (បី.)], តម្ពកាមា តុទន្តិ មំ.

៥៦. កថំ សមុទ្ទមតរិ, កថំ អទ្ទក្ខិ សេទុមំ [សេរុមំ (សី. ស្យា. បី.)];

កថំ តស្សា ច តុយ្ហញ្ច, អហុ សគ្គ [អគ្គ (សី. ស្យា.)] សមាគមោ.

៥៧. កុរុកច្ឆា [ភរុកច្ឆា (សី. ស្យា. បី.)] បយាតានំ, វាណិជានំ ធនេសិនំ;

មករេហិ អភិទា [មករេហិព្ភិទា (សី.), មករេហិ’ភិទា (ស្យា.), មករេហិ ភិន្នា (បី.)] នាវា, ផលកេនាហមប្លវិំ.

៥៨. សា មំ សណ្ហេន មុទុនា, និច្ចំ ចន្ទនគន្ធិនី;

អង្គេន [អង្កេន (បី. ក.)] ឧទ្ធរី ភទ្ទា, មាតា បុត្តំវ ឱរសំ.

៥៩. សា មំ អន្នេន បានេន, វត្ថេន សយនេន ច;

អត្តនាបិ ច មន្ទក្ខី, ឯវំ តម្ព វិជានាហីតិ.

សុយោនន្ទីជាតកំ ទសមំ.

មណិកុណ្ឌលវគ្គោ បឋមោ.

តស្សុទ្ទានំ –

អថ ជិនវរោ ហរិតំ តិណកោ, អថ ភិន្នប្លវោ ឧរគោវ ឃដោ;

ទរិយា បុន កុញ្ជរ ភូនហតា, មិគមុត្តមសគ្គវរេន ទសាតិ.