២. វណ្ណារោហវគ្គោ

៣៦១. វណ្ណារោហជាតកំ (៥-២-១)

៦០. វណ្ណារោហេន ជាតិយា, ពលនិក្កមនេន ច;

សុពាហុ ន មយា សេយ្យោ, សុទាឋ ឥតិ ភាសសិ.

៦១. វណ្ណារោហេន ជាតិយា, ពលនិក្កមនេន ច;

សុទាឋោ ន មយា សេយ្យោ, សុពាហុ ឥតិ ភាសសិ.

៦២. ឯវំ ចេ មំ វិហរន្តំ, សុពាហុ សម្ម ទុព្ភសិ;

ន ទានាហំ តយា សទ្ធិំ, សំវាសមភិរោចយេ.

៦៣. យោ បរេសំ វចនានិ, សទ្ទហេយ្យ [សទ្ទហេថ (សី. ស្យា. បី.)] យថាតថំ;

ខិប្បំ ភិជ្ជេថ មិត្តស្មិំ, វេរញ្ច បសវេ ពហុំ.

៦៤. ន សោ មិត្តោ យោ សទា អប្បមត្តោ, ភេទាសង្កី រន្ធមេវានុបស្សី;

យស្មិញ្ច សេតី ឧរសីវ បុត្តោ, ស វេ មិត្តោ យោ អភេជ្ជោ បរេហីតិ.

វណ្ណារោហជាតកំ បឋមំ.

៣៦២. សីលវីមំសជាតកំ (៥-២-២)

៦៥. សីលំ សេយ្យោ សុតំ សេយ្យោ, ឥតិ មេ សំសយោ អហុ;

សីលមេវ សុតា សេយ្យោ, ឥតិ មេ នត្ថិ សំសយោ.

៦៦. មោឃា ជាតិ ច វណ្ណោ ច, សីលមេវ កិរុត្តមំ;

សីលេន អនុបេតស្ស, សុតេនត្ថោ ន វិជ្ជតិ.

៦៧. ខត្តិយោ ច អធម្មដ្ឋោ, វេស្សោ ចាធម្មនិស្សិតោ;

តេ បរិច្ចជ្ជុភោ លោកេ, ឧបបជ្ជន្តិ ទុគ្គតិំ.

៦៨. ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

ឥធ ធម្មំ ចរិត្វាន, ភវន្តិ តិទិវេ សមា.

៦៩. ន វេទា សម្បរាយាយ, ន ជាតិ នាបិ [នោបិ (បី.)] ពន្ធវា;

សកញ្ច សីលំ សំសុទ្ធំ, សម្បរាយាយ សុខាយ ចាតិ [សុខាវហន្តិ (សី. ស្យា.)].

សីលវីមំសជាតកំ ទុតិយំ.

៣៦៣. ហិរិជាតកំ (៥-២-៣)

៧០. ហិរិំ តរន្តំ វិជិគុច្ឆមានំ, តវាហមស្មី ឥតិ ភាសមានំ;

សេយ្យានិ កម្មានិ អនាទិយន្តំ, នេសោ មមន្តិ ឥតិ នំ វិជញ្ញា.

៧១. យញ្ហិ កយិរា តញ្ហិ វទេ, យំ ន កយិរា ន តំ វទេ;

អករោន្តំ ភាសមានំ, បរិជានន្តិ បណ្ឌិតា.

៧២. ន សោ មិត្តោ យោ សទា អប្បមត្តោ, ភេទាសង្កី រន្ធមេវានុបស្សី;

យស្មិញ្ច សេតី ឧរសីវ បុត្តោ, ស វេ មិត្តោ យោ អភេជ្ជោ បរេហិ.

៧៣. បាមោជ្ជករណំ ឋានំ, បសំសាវហនំ សុខំ;

ផលានិសំសោ ភាវេតិ, វហន្តោ បោរិសំ ធុរំ.

៧៤. បវិវេករសំ បិត្វា, រសំ ឧបសមស្ស ច;

និទ្ទរោ ហោតិ និប្បាបោ, ធម្មប្បីតិរសំ បិវន្តិ.

ហិរិជាតកំ តតិយំ.

៣៦៤. ខជ្ជោបនកជាតកំ (៥-២-៤)

៧៥. កោ នុ សន្តម្ហិ បជ្ជោតេ, អគ្គិបរិយេសនំ ចរំ;

អទ្ទក្ខិ រត្តិ [រត្តិំ (ស្យា.)] ខជ្ជោតំ, ជាតវេទំ អមញ្ញថ.

៧៦. ស្វស្ស គោមយចុណ្ណានិ, អភិមត្ថំ តិណានិ ច;

វិបរីតាយ សញ្ញាយ, នាសក្ខិ បជ្ជលេតវេ.

៧៧. ឯវម្បិ អនុបាយេន, អត្ថំ ន លភតេ មិគោ [មូគោ (ស្យា.)];

វិសាណតោ គវំ ទោហំ, យត្ថ ខីរំ ន វិន្ទតិ.

៧៨. វិវិធេហិ ឧបាយេហិ, អត្ថំ បប្បោន្តិ មាណវា;

និគ្គហេន អមិត្តានំ, មិត្តានំ បគ្គហេន ច.

៧៩. សេនាមោក្ខបលាភេន [សេនី មោក្ខូបលាភេន (ស្យា.)], វល្លភានំ នយេន ច;

ជគតិំ ជគតិបាលា, អាវសន្តិ វសុន្ធរន្តិ.

ខជ្ជោបនកជាតកំ ចតុត្ថំ.

៣៦៥. អហិតុណ្ឌិកជាតកំ (៥-២-៥)

៨០. ធុត្តោម្ហិ សម្ម សុមុខ, ជូតេ អក្ខបរាជិតោ;

ហរេហិ [សេវេហិ (បី.)] អម្ពបក្កានិ, វីរិយំ តេ ភក្ខយាមសេ.

៨១. អលិកំ វត មំ សម្ម, អភូតេន បសំសសិ;

កោ តេ សុតោ វា ទិដ្ឋោ វា, សុមុខោ នាម មក្កដោ.

៨២. អជ្ជាបិ មេ តំ មនសិ [តេ មំ សរសិ (ក.)], យំ មំ ត្វំ អហិតុណ្ឌិក;

ធញ្ញាបណំ បវិសិត្វា, មត្តោ [មុត្តោ (ក.)] ឆាតំ ហនាសិ មំ.

៨៣. តាហំ សរំ ទុក្ខសេយ្យំ, អបិ រជ្ជម្បិ ការយេ;

នេវាហំ យាចិតោ ទជ្ជំ, តថា ហិ ភយតជ្ជិតោ.

៨៤. យញ្ច ជញ្ញា កុលេ ជាតំ, គព្ភេ តិត្តំ អមច្ឆរិំ;

តេន សខិញ្ច មិត្តញ្ច, ធីរោ សន្ធាតុមរហតីតិ.

អហិតុណ្ឌិកជាតកំ បញ្ចមំ.

៣៦៦. គុម្ពិយជាតកំ (៥-២-៦)

៨៥. មធុវណ្ណំ មធុរសំ, មធុគន្ធំ វិសំ អហុ;

គុម្ពិយោ ឃាសមេសានោ, អរញ្ញេ ឱទហី វិសំ.

៨៦. មធុ ឥតិ មញ្ញមានា [មធូតិ មញ្ញមានាយ (ក.)], យេ តំ វិសមខាទិសុំ [វិសមសាយិសុំ (សី. ស្យា.)];

តេសំ តំ កដុកំ អាសិ, មរណំ តេនុបាគមុំ.

៨៧. យេ ច ខោ បដិសង្ខាយ, វិសំ តំ បរិវជ្ជយុំ;

តេ អាតុរេសុ សុខិតា, ឌយ្ហមានេសុ និព្ពុតា.

៨៨. ឯវមេវ មនុស្សេសុ, វិសំ កាមា សមោហិតា;

អាមិសំ ពន្ធនញ្ចេតំ, មច្ចុវេសោ [បច្ចុវសោ (សី. ស្យា.)] គុហាសយោ.

៨៩. ឯវមេវ ឥមេ កាមេ, អាតុរា បរិចារិកេ [បរិចារកេ (ក.)];

យេ សទា បរិវជ្ជេន្តិ, សង្គំ លោកេ ឧបច្ចគុន្តិ.

គុម្ពិយជាតកំ ឆដ្ឋំ.

៣៦៧. សាឡិយជាតកំ (៥-២-៧)

៩០. យ្វាយំ សាឡិយ [សាលិយ (សី. ស្យា. បី.), សាឡិក (?)] ឆាបោតិ, កណ្ហសប្បំ អគាហយិ;

តេន សប្បេនយំ ទដ្ឋោ, ហតោ បាបានុសាសកោ.

៩១. អហន្តារ [អហនន្ត (បី.), អហរន្ត (?)] មហន្តារំ, យោ នរោ ហន្តុមិច្ឆតិ;

ឯវំ សោ និហតោ សេតិ, យថាយំ បុរិសោ ហតោ.

៩២. អហន្តារ [អហនន្ត (សី. ស្យា. បី.), អហរន្ត (?)] មឃាតេន្តំ, យោ នរោ ហន្តុមិច្ឆតិ;

ឯវំ សោ និហតោ សេតិ, យថាយំ បុរិសោ ហតោ.

៩៣. យថា បំសុមុដ្ឋិំ បុរិសោ, បដិវាតំ បដិក្ខិបេ;

តមេវ សោ រជោ ហន្តិ, តថាយំ បុរិសោ ហតោ.

៩៤. យោ អប្បទុដ្ឋស្ស នរស្ស ទុស្សតិ, សុទ្ធស្ស បោសស្ស អនង្គណស្ស;

តមេវ ពាលំ បច្ចេតិ បាបំ, សុខុមោ រជោ បដិវាតំវ ខិត្តោតិ.

សាឡិយជាតកំ សត្តមំ.

៣៦៨. តចសារជាតកំ (៥-២-៨)

៩៥. អមិត្តហត្ថត្ថគតា [ហត្ថត្តគតា (កត្ថចិ, សី. និយ្យ)], តចសារសមប្បិតា;

បសន្នមុខវណ្ណាត្ថ, កស្មា តុម្ហេ ន សោចថ.

៩៦. ន សោចនាយ បរិទេវនាយ, អត្ថោវ លព្ភោ [អត្ថោ ច លព្ភា (សី. ស្យា.), អត្ថោធ លព្ភា (អ. និ. ៥.៤៨)] អបិ អប្បកោបិ;

សោចន្តមេនំ ទុខិតំ វិទិត្វា, បច្ចត្ថិកា អត្តមនា ភវន្តិ.

៩៧. យតោ ច ខោ បណ្ឌិតោ អាបទាសុ, ន វេធតី អត្ថវិនិច្ឆយញ្ញូ;

បច្ចត្ថិកាស្ស [បច្ចត្ថិកា តេ (ក.)] ទុខិតា ភវន្តិ, ទិស្វា មុខំ អវិការំ បុរាណំ.

៩៨. ជប្បេន មន្តេន សុភាសិតេន, អនុប្បទានេន បវេណិយា វា;

យថា យថា យត្ថ លភេថ អត្ថំ, តថា តថា តត្ថ បរក្កមេយ្យ.

៩៩. យតោ ច ជានេយ្យ អលព្ភនេយ្យោ, មយា វ [មយា វា (ស្យា. ក.)] អញ្ញេន វា ឯស អត្ថោ;

អសោចមានោ អធិវាសយេយ្យ, កម្មំ ទឡ្ហំ កិន្តិ ករោមិ ទានីតិ.

តចសារជាតកំ អដ្ឋមំ.

៣៦៩. មិត្តវិន្ទកជាតកំ (៥-២-៩)

១០០. ក្យាហំ ទេវានមករំ, កិំ បាបំ បកតំ មយា;

យំ មេ សិរស្មិំ ឱហច្ច [ឧហច្ច (ក.), ឧហច្ច (បី.)], ចក្កំ ភមតិ មត្ថកេ.

១០១. អតិក្កម្ម រមណកំ, សទាមត្តញ្ច ទូភកំ;

ព្រហ្មត្តរញ្ច បាសាទំ, កេនត្ថេន ឥធាគតោ.

១០២. ឥតោ ពហុតរា ភោគា, អត្រ មញ្ញេ ភវិស្សរេ;

ឥតិ ឯតាយ សញ្ញាយ, បស្ស មំ ព្យសនំ គតំ.

១០៣. ចតុព្ភិ អដ្ឋជ្ឈគមា, អដ្ឋាហិបិ ច [អដ្ឋាហិ ចាបិ (សី. ស្យា.), អដ្ឋាភិ ចាបិ (ក.)] សោឡស;

សោឡសាហិ ច ពាត្តិំស, អត្រិច្ឆំ ចក្កមាសទោ;

ឥច្ឆាហតស្ស បោសស្ស, ចក្កំ ភមតិ មត្ថកេ.

១០៤. ឧបរិវិសាលា ទុប្បូរា, ឥច្ឆា វិសដគាមិនី [ឧបរិ វិសាលំ ទុប្បូរំ, ឥច្ឆាវិសទគាមិនី (សី.)];

យេ ច តំ អនុគិជ្ឈន្តិ, តេ ហោន្តិ ចក្កធារិនោតិ.

មិត្តវិន្ទកជាតកំ នវមំ.

៣៧០. បលាសជាតកំ (៥-២-១០)

១០៥. ហំសោ បលាសមវច, និគ្រោធោ សម្ម ជាយតិ;

អង្កស្មិំ [អង្គស្មិំ (ក.)] តេ និសិន្នោវ, សោ តេ មម្មានិ ឆេច្ឆតិ [ឆិជ្ជតិ (ក.)].

១០៦. វឌ្ឍតាមេវ [វទ្ធិតមេវ (ក.)] និគ្រោធោ, បតិដ្ឋស្ស ភវាមហំ;

យថា បិតា ច មាតា ច [បិតា វា មាតា វា (បី.), មាតា វា បិតា វា (ក.)], ឯវំ មេ សោ ភវិស្សតិ.

១០៧. យំ ត្វំ អង្កស្មិំ វឌ្ឍេសិ, ខីររុក្ខំ ភយានកំ;

អាមន្ត ខោ តំ គច្ឆាម, វុឌ្ឍិ មស្ស ន រុច្ចតិ.

១០៨. ឥទានិ ខោ មំ ភាយេតិ, មហានេរុនិទស្សនំ;

ហំសស្ស អនភិញ្ញាយ, មហា មេ ភយមាគតំ.

១០៩. ន តស្ស វុឌ្ឍិ កុសលប្បសត្ថា, យោ វឌ្ឍមានោ ឃសតេ បតិដ្ឋំ;

តស្សូបរោធំ បរិសង្កមានោ, បតារយី មូលវធាយ ធីរោតិ.

បលាសជាតកំ ទសមំ.

វណ្ណារោហវគ្គោ ទុតិយោ [ឥមស្សុទ្ទានំ តតិយវគ្គបរិយោសានេ ភវិស្សតិ].