៣. អឌ្ឍវគ្គោ

៣៧១. ទីឃីតិកោសលជាតកំ (៥-៣-១)

១១០. ឯវំភូតស្ស តេ រាជ, អាគតស្ស វសេ [វសោ (បី. ក.)] មម;

អត្ថិ នុ កោចិ បរិយាយោ, យោ តំ ទុក្ខា បមោចយេ.

១១១. ឯវំភូតស្ស មេ តាត, អាគតស្ស វសេ តវ;

នត្ថិ នោ កោចិ បរិយាយោ, យោ មំ ទុក្ខា បមោចយេ.

១១២. នាញ្ញំ សុចរិតំ រាជ, នាញ្ញំ រាជ សុភាសិតំ;

តាយតេ មរណកាលេ, ឯវមេវិតរំ ធនំ.

១១៣. អក្កោច្ឆិ មំ អវធិ មំ, អជិនិ មំ អហាសិ មេ;

យេ ច តំ ឧបនយ្ហន្តិ, វេរំ តេសំ ន សម្មតិ.

១១៤. អក្កោច្ឆិ មំ អវធិ មំ, អជិនិ មំ អហាសិ មេ;

យេ ច តំ នុបនយ្ហន្តិ, វេរំ តេសូបសម្មតិ.

១១៥. ន ហិ វេរេន វេរានិ, សម្មន្តីធ កុទាចនំ;

អវេរេន ច សម្មន្តិ, ឯស ធម្មោ សនន្តនោតិ.

ទីឃីតិកោសលជាតកំ បឋមំ.

៣៧២. មិគបោតកជាតកំ (៥-៣-២)

១១៦. អគារា បច្ចុបេតស្ស, អនគារស្ស តេ សតោ;

សមណស្ស ន តំ សាធុ, យំ បេតមនុសោចសិ.

១១៧. សំវាសេន ហវេ សក្ក, មនុស្សស្ស មិគស្ស វា;

ហទយេ ជាយតេ បេមំ, ន តំ សក្កា អសោចិតុំ.

១១៨. មតំ មរិស្សំ រោទន្តិ, យេ រុទន្តិ លបន្តិ ច;

តស្មា ត្វំ ឥសិ មា រោទិ, រោទិតំ មោឃមាហុ សន្តោ.

១១៩. រោទិតេន ហវេ ព្រហ្មេ, មតោ បេតោ សមុដ្ឋហេ;

សព្ពេ សង្គម្ម រោទាម, អញ្ញមញ្ញស្ស ញាតកេ.

១២០. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

១២១. អព្ពហិ វត មេ សល្លំ, យមាសិ ហទយស្សិតំ;

យោ មេ សោកបរេតស្ស, បុត្តសោកំ អបានុទិ.

១២២. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន វាសវាតិ.

មិគបោតកជាតកំ ទុតិយំ.

៣៧៣. មូសិកជាតកំ (៥-៣-៣)

១២៣. កុហិំ គតា កត្ថ គតា, ឥតិ លាលប្បតី ជនោ;

អហមេវេកោ ជានាមិ, ឧទបានេ មូសិកា ហតា.

១២៤. យញ្ចេតំ [យថេតំ (បី.), យវេតំ (ក.), យមេតំ (កត្ថចិ)] ឥតិ ចីតិ ច, គទ្រភោវ និវត្តសិ;

ឧទបានេ មូសិកំ ហន្ត្វា, យវំ ភក្ខេតុមិច្ឆសិ.

១២៥. ទហរោ ចាសិ ទុម្មេធ, បឋមុប្បត្តិកោ [បឋមុប្បត្តិតោ (សី. បី.)] សុសុ;

ទីឃញ្ចេតំ [ទីឃមេតំ (បី.)] សមាសជ្ជ [សមាបជ្ជ (ស្យា. ក.)], ន តេ ទស្សាមិ ជីវិតំ.

១២៦. នាន្តលិក្ខភវនេន, នាង្គបុត្តបិនេន [នាង្គបុត្តសិរេន (សី. ស្យា. បី.)] វា;

បុត្តេន ហិ បត្ថយិតោ, សិលោកេហិ បមោចិតោ.

១២៧. សព្ពំ សុតមធីយេថ, ហីនមុក្កដ្ឋមជ្ឈិមំ;

សព្ពស្ស អត្ថំ ជានេយ្យ, ន ច សព្ពំ បយោជយេ;

ហោតិ តាទិសកោ កាលោ, យត្ថ អត្ថាវហំ សុតន្តិ.

មូសិកជាតកំ តតិយំ.

៣៧៤. ចូឡធនុគ្គហជាតកំ (៥-៣-៤)

១២៨. សព្ពំ ភណ្ឌំ សមាទាយ, បារំ តិណ្ណោសិ ព្រាហ្មណ;

បច្ចាគច្ឆ លហុំ ខិប្បំ, មម្បិ តារេហិ ទានិតោ [ទានិភោ (ស្យា.)].

១២៩. អសន្ថុតំ មំ ចិរសន្ថុតេន, និមីនិ ភោតី អទ្ធុវំ ធុវេន;

មយាបិ ភោតី និមិនេយ្យ អញ្ញំ, ឥតោ អហំ ទូរតរំ គមិស្សំ.

១៣០. កាយំ ឯឡគលាគុម្ពេ [ឯឡគណគុម្ពេ (ក.)], ករោតិ អហុហាសិយំ;

នយីធ នច្ចគីតំ វា [នយិធ នច្ចំ វា គីតំ វា (សី. ស្យា. បី.)], តាឡំ វា សុសមាហិតំ;

អនម្ហិកាលេ [អនម្ហកាលេ (បី.)] សុសោណិ [សុស្សោណិ (សី. ស្យា. បី.)], កិំ នុ ជគ្ឃសិ សោភនេ [សោភណេ (បី. ក.)].

១៣១. សិង្គាល ពាល ទុម្មេធ, អប្បបញ្ញោសិ ជម្ពុក;

ជីនោ មច្ឆញ្ច បេសិញ្ច, កបណោ វិយ ឈាយសិ.

១៣២. សុទស្សំ វជ្ជមញ្ញេសំ, អត្តនោ បន ទុទ្ទសំ;

ជីនា បតិញ្ច ជារញ្ច, មញ្ញេ ត្វញ្ញេវ [មម្បិ ត្វញ្ញេវ (សី. ស្យា.), ត្វម្បិ មញ្ញេវ (បី.)] ឈាយសិ.

១៣៣. ឯវមេតំ មិគរាជ, យថា ភាសសិ ជម្ពុក;

សា នូនាហំ ឥតោ គន្ត្វា, ភត្តុ ហេស្សំ វសានុគា.

១៣៤. យោ ហរេ មត្តិកំ ថាលំ, កំសថាលម្បិ សោ ហរេ;

កតញ្ចេវ [កតំយេវ (សី. ស្យា. បី.)] តយា បាបំ, បុនបេវំ ករិស្សសីតិ.

ចូឡធនុគ្គហជាតកំ ចតុត្ថំ.

៣៧៥. កបោតជាតកំ (៥-៣-៥)

១៣៥. ឥទានិ ខោម្ហិ សុខិតោ អរោគោ, និក្កណ្ដកោ និប្បតិតោ កបោតោ;

កាហាមិ ទានី ហទយស្ស តុដ្ឋិំ, តថាហិមំ មំសសាកំ ពលេតិ.

១៣៦. កាយំ ពលាកា សិខិនោ, ចោរី លង្ឃិបិតាមហា;

ឱរំ ពលាកេ អាគច្ឆ, ចណ្ឌោ មេ វាយសោ សខា.

១៣៧. អលញ្ហិ តេ ជគ្ឃិតាយេ, មមំ ទិស្វាន ឯទិសំ;

វិលូនំ សូទបុត្តេន, បិដ្ឋមណ្ឌេន [បិដ្ឋមទ្ទេន (សី. ស្យា. បី.)] មក្ខិតំ.

១៣៨. សុន្ហាតោ សុវិលិត្តោសិ, អន្នបានេន តប្បិតោ;

កណ្ឋេ ច តេ វេឡុរិយោ, អគមា នុ កជង្គលំ.

១៣៩. មា តេ មិត្តោ អមិត្តោ វា, អគមាសិ កជង្គលំ;

បិញ្ឆានិ តត្ថ លាយិត្វា, កណ្ឋេ ពន្ធន្តិ វដ្ដនំ.

១៤០. បុនបាបជ្ជសី សម្ម, សីលញ្ហិ តវ តាទិសំ;

ន ហិ មានុសកា ភោគា, សុភុញ្ជា ហោន្តិ បក្ខិនាតិ.

កបោតជាតកំ បញ្ចមំ.

អឌ្ឍវគ្គោ តតិយោ.

តស្សុទ្ទានំ –

អថ វណ្ណ សសីល ហិរិ លភតេ, សុមុខា វិស សាឡិយមិត្តវរោ;

អថ ចក្ក បលាស សរាជ សតោ, យវ ពាល កបោតក បន្នរសាតិ.

អថ វគ្គុទ្ទានំ –

ជីនញ្ច វណ្ណំ អសមំវគុប្បរិ, សុទេសិតា ជាតកន្តិ សន្តិ វីសតិ [ជាតក បញ្ចវីសតិ (?)];

មហេសិនោ ព្រហ្មចរិត្តមុត្ត-មវោច គាថា អត្ថវតី សុព្យញ្ជនាតិ.

បញ្ចកនិបាតំ និដ្ឋិតំ.