១. មណិកុណ្ឌលវគ្គោ

៣៥១. មណិកុណ្ឌលជាតកំ (៥-១-១)

១. ជីនោ រថស្សំ មណិកុណ្ឌលេ ច, បុត្តេ ច ទារេ ច តថេវ ជីនោ;

សព្ពេសុ ភោគេសុ អសេសកេសុ [អសេសិតេសុ (សី. បី.), អសេសិកេសុ (ក.)], កស្មា ន សន្តប្បសិ សោកកាលេ.

២. បុព្ពេវ មច្ចំ វិជហន្តិ ភោគា, មច្ចោ វា តេ [ច នេ (បី.), ធនេ (ក.)] បុព្ពតរំ ជហាតិ;

អសស្សតា ភោគិនោ កាមកាមិ, តស្មា ន សោចាមហំ សោកកាលេ.

៣. ឧទេតិ អាបូរតិ វេតិ [បូរេតិ ខីយតិ (ស្យា.)] ចន្ទោ, អត្ថំ តបេត្វាន [អន្ធំ តបេត្វាន (ក.), អត្ថង្គមេត្វាន (ស្យា.), ឯត្ថ ‘‘តបេត្វាន អត្ថំ បលេតី’’តិ សម្ពន្ធោ] បលេតិ សូរិយោ;

វិទិតា [វិជិតា (ស្យា.)] មយា សត្តុក លោកធម្មា, តស្មា ន សោចាមហំ សោកកាលេ.

៤. អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;

រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ.

៥. និសម្ម ខត្តិយោ កយិរា, នានិសម្ម ទិសម្បតិ;

និសម្មការិនោ រាជ [រញ្ញោ (សី. ស្យា.)], យសោ កិត្តិ ច វឌ្ឍតីតិ.

មណិកុណ្ឌលជាតកំ បឋមំ.

៣៥២. សុជាតជាតកំ (៥-១-២)

៦. កិំ នុ សន្តរមានោវ, លាយិត្វា ហរិតំ តិណំ;

ខាទ ខាទាតិ លបសិ, គតសត្តំ ជរគ្គវំ.

៧. ន ហិ អន្នេន បានេន, មតោ គោណោ សមុដ្ឋហេ;

ត្វញ្ច តុច្ឆំ វិលបសិ, យថា តំ ទុម្មតី តថា.

៨. តថេវ តិដ្ឋតិ សីសំ, ហត្ថបាទា ច វាលធិ;

សោតា តថេវ តិដ្ឋន្តិ [សោ តាត តថេវ តិដ្ឋតិ (ក.)], មញ្ញេ គោណោ សមុដ្ឋហេ.

៩. នេវយ្យកស្ស សីសញ្ច [សីសំ វា (សី. ស្យា. បី.)], ហត្ថបាទា ច ទិស្សរេ;

រុទំ មត្តិកថូបស្មិំ, ននុ ត្វញ្ញេវ ទុម្មតិ.

១០. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ [ឱសិញ្ចិ (ក.)], សព្ពំ និព្ពាបយេ ទរំ.

១១. អព្ពហី [អព្ពូឡ្ហំ (សី. ស្យា.), អព្ភូឡ្ហំ (ក.)] វត មេ សល្លំ, យមាសិ ហទយស្សិតំ [សោកំ ហទយនិស្សិតំ (សី. ស្យា.)];

យោ មេ សោកបរេតស្ស, បិតុ សោកំ អបានុទិ.

១២. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន មាណវ.

១៣. ឯវំ ករោន្តិ សប្បញ្ញា, យេ ហោន្តិ អនុកម្បកា;

វិនិវត្តេន្តិ សោកម្ហា, សុជាតោ បិតរំ យថាតិ.

សុជាតជាតកំ ទុតិយំ.

៣៥៣. វេនសាខជាតកំ (៥-១-៣)

១៤. នយិទំ និច្ចំ ភវិតព្ពំ ព្រហ្មទត្ត, ខេមំ សុភិក្ខំ សុខតា ច កាយេ;

អត្ថច្ចយេ មា អហុ សម្បមូឡ្ហោ, ភិន្នប្លវោ សាគរស្សេវ មជ្ឈេ.

១៥. យានិ ករោតិ បុរិសោ, តានិ អត្តនិ បស្សតិ;

កល្យាណការី កល្យាណំ, បាបការី ច បាបកំ;

យាទិសំ វបតេ ពីជំ, តាទិសំ ហរតេ ផលំ.

១៦. ឥទំ តទាចរិយវចោ, បារាសរិយោ យទព្រវិ;

មា សុ [មា ស្សុ (សី. ស្យា. បី.)] ត្វំ អករិ បាបំ, យំ ត្វំ បច្ឆា កតំ តបេ.

១៧. អយមេវ សោ បិង្គិយ [សោ បិង្គិយោ (ស្យា.), សោបិ ភិយ្យោ (ក.)] វេនសាខោ, [ធោនសាខោ (ក. សី. បី.)] យម្ហិ ឃាតយិំ ខត្តិយានំ សហស្សំ;

អលង្កតេ ចន្ទនសារានុលិត្តេ, តមេវ ទុក្ខំ បច្ចាគតំ មមំ.

១៨. សាមា ច [សាមាបិ (សី. ស្យា.)] ខោ ចន្ទនលិត្តគត្តា [គត្តី (ក. សី. ស្យា. បី.)], លដ្ឋីវ សោភញ្ជនកស្ស ឧគ្គតា;

អទិស្វា [អទិស្វាវ (សី.)] កាលំ ករិស្សាមិ ឧព្ពរិំ, តំ មេ ឥតោ ទុក្ខតរំ ភវិស្សតីតិ.

វេនសាខជាតកំ [ធោនសាខជាតកំ (ក. សី. បី.)] តតិយំ.

៣៥៤. ឧរគជាតកំ (៥-១-៤)

១៩. ឧរគោវ តចំ ជិណ្ណំ, ហិត្វា គច្ឆតិ សំ តនុំ;

ឯវំ សរីរេ និព្ភោគេ, បេតេ កាលង្កតេ សតិ.

២០. ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន សោចាមិ, គតោ សោ តស្ស យា គតិ.

២១. អនវ្ហិតោ តតោ អាគា, អននុញ្ញាតោ [នានុញ្ញាតោ (ក.)] ឥតោ គតោ;

យថាគតោ តថា គតោ, តត្ថ កា បរិទេវនា.

២២. ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន សោចាមិ, គតោ សោ តស្ស យា គតិ.

២៣. សចេ រោទេ កិសា [កិសី (បី.)] អស្សំ, តស្សា មេ កិំ ផលំ សិយា;

ញាតិមិត្តសុហជ្ជានំ, ភិយ្យោ នោ អរតី សិយា.

២៤. ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន សោចាមិ, គតោ សោ តស្ស យា គតិ.

២៥. យថាបិ ទារកោ ចន្ទំ, គច្ឆន្តមនុរោទតិ;

ឯវំ សម្បទមេវេតំ, យោ បេតមនុសោចតិ.

២៦. ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន សោចាមិ, គតោ សោ តស្ស យា គតិ.

២៧. យថាបិ ឧទកកុម្ភោ, ភិន្នោ អប្បដិសន្ធិយោ;

ឯវំ សម្បទមេវេតំ, យោ បេតមនុសោចតិ.

២៨. ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន សោចាមិ, គតោ សោ តស្ស យា គតីតិ.

ឧរគជាតកំ ចតុត្ថំ.

៣៥៥. ឃដជាតកំ (៥-១-៥)

២៩. អញ្ញេ សោចន្តិ រោទន្តិ, អញ្ញេ អស្សុមុខា ជនា;

បសន្នមុខវណ្ណោសិ, កស្មា ឃដ [ឃត (សី. បី.)] ន សោចសិ.

៣០. នាព្ភតីតហរោ សោកោ, នានាគតសុខាវហោ;

តស្មា ធង្ក [វំក (បី.)] ន សោចាមិ, នត្ថិ សោកេ ទុតីយតា [សោកោ ទុតីយកា (ក.)].

៣១. សោចំ បណ្ឌុ កិសោ ហោតិ, ភត្តញ្ចស្ស ន រុច្ចតិ;

អមិត្តា សុមនា ហោន្តិ, សល្លវិទ្ធស្ស រុប្បតោ.

៣២. គាមេ វា យទិ វារញ្ញេ, និន្នេ វា យទិ វា ថលេ;

ឋិតំ មំ នាគមិស្សតិ, ឯវំ ទិដ្ឋបទោ អហំ.

៣៣. យស្សត្តា នាលមេកោវ, សព្ពកាមរសាហរោ;

សព្ពាបិ បថវី តស្ស, ន សុខំ អាវហិស្សតីតិ.

ឃដជាតកំ បញ្ចមំ.

៣៥៦. កោរណ្ឌិយជាតកំ (៥-១-៦)

៣៤. ឯកោ អរញ្ញេ គិរិកន្ទរាយំ, បគ្គយ្ហ បគ្គយ្ហ សិលំ បវេច្ឆសិ [បវេជ្ឈសិ (ស្យា. សី. អដ្ឋ.)];

បុនប្បុនំ សន្តរមានរូបោ, កោរណ្ឌិយ [ការណ្ឌិយ (សី. ស្យា. បី.)] កោ នុ តវ យិធត្ថោ.

៣៥. អហញ្ហិមំ សាគរ សេវិតន្តំ, សមំ ករិស្សាមិ យថាបិ បាណិ;

វិកិរិយ សានូនិ ច បព្ពតានិ ច, តស្មា សិលំ ទរិយា បក្ខិបាមិ.

៣៦. នយិមំ មហិំ អរហតិ បាណិកប្បំ, សមំ មនុស្សោ ករណាយ មេកោ;

មញ្ញាមិមញ្ញេវ ទរិំ ជិគីសំ [ជិគិំសំ (សី. ស្យា. បី.)], កោរណ្ឌិយ ហាហសិ [ហាយសិ (ស្យា. ក.)] ជីវលោកំ.

៣៧. សចេ អហំ [អយំ (សី. ស្យា. បី.)] ភូតធរំ ន សក្កា [សក្កោ (ស្យា. ក.)], សមំ មនុស្សោ ករណាយ មេកោ;

ឯវមេវ ត្វំ ព្រហ្មេ ឥមេ មនុស្សេ, នានាទិដ្ឋិកេ នានយិស្សសិ តេ [នេ (ក.)].

៣៨. សង្ខិត្តរូបេន ភវំ មមត្ថំ, អក្ខាសិ កោរណ្ឌិយ ឯវមេតំ;

យថា ន សក្កា បថវី សមាយំ, កត្តុំ មនុស្សេន តថា មនុស្សាតិ.

កោរណ្ឌិយជាតកំ ឆដ្ឋំ.

៣៥៧. លដុកិកជាតកំ (៥-១-៧)

៣៩. វន្ទាមិ តំ កុញ្ជរ សដ្ឋិហាយនំ, អារញ្ញកំ យូថបតិំ យសស្សិំ;

បក្ខេហិ តំ បញ្ជលិកំ ករោមិ, មា មេ វធី បុត្តកេ ទុព្ពលាយ.

៤០. វន្ទាមិ តំ កុញ្ជរ ឯកចារិំ, អារញ្ញកំ បព្ពតសានុគោចរំ;

បក្ខេហិ តំ បញ្ជលិកំ ករោមិ, មា មេ វធី បុត្តកេ ទុព្ពលាយ;

៤១. វមិស្សាមិ តេ លដុកិកេ បុត្តកានិ, កិំ មេ តុវំ កាហសិ ទុព្ពលាសិ;

សតំ សហស្សានិបិ តាទិសីនំ, វាមេន បាទេន បបោថយេយ្យំ.

៤២. ន ហេវ សព្ពត្ថ ពលេន កិច្ចំ, ពលញ្ហិ ពាលស្ស វធាយ ហោតិ;

ករិស្សាមិ តេ នាគរាជា អនត្ថំ, យោ មេ វធី បុត្តកេ ទុព្ពលាយ.

៤៣. កាកញ្ច បស្ស លដុកិកំ, មណ្ឌូកំ នីលមក្ខិកំ;

ឯតេ នាគំ អឃាតេសុំ, បស្ស វេរស្ស វេរិនំ;

តស្មា ហិ វេរំ ន កយិរាថ, អប្បិយេនបិ កេនចីតិ.

លដុកិកជាតកំ សត្តមំ.

៣៥៨. ចូឡធម្មបាលជាតកំ (៥-១-៨)

៤៤. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, ហត្ថេ មេ ទេវ ឆេទេហិ.

៤៥. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, បាទេ មេ ទេវ ឆេទេហិ.

៤៦. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, សីសំ មេ ទេវ ឆេទេហិ.

៤៧. ន ហិ [នហ (សី. ស្យា. បី.) ឯត្ថ ហ-ការោ ខេទេ] នូនិមស្ស រញ្ញោ, មិត្តាមច្ចា ច វិជ្ជរេ សុហទា;

យេ ន វទន្តិ រាជានំ, មា ឃាតយិ ឱរសំ បុត្តំ.

៤៨. ន ហិ [នហ (សី. ស្យា. បី.) ឯត្ថ ហ-ការោ ខេទេ] នូនិមស្ស រញ្ញោ, ញាតី មិត្តា ច វិជ្ជរេ សុហទា;

យេ ន វទន្តិ រាជានំ, មា ឃាតយិ អត្រជំ បុត្តំ.

៤៩. ចន្ទនសារានុលិត្តា, ពាហា ឆិជ្ជន្តិ ធម្មបាលស្ស;

ទាយាទស្ស បថព្យា, បាណា មេ ទេវ រុជ្ឈន្តីតិ.

ចូឡធម្មបាលជាតកំ អដ្ឋមំ.

៣៥៩. សុវណ្ណមិគជាតកំ (៥-១-៩)

៥០. វិក្កម រេ ហរិបាទ [មហាមិគ (សី. ស្យា. បី.)], វិក្កម រេ មហាមិគ [ហរីបទ (សី. ស្យា. បី.)];

ឆិន្ទ វារត្តិកំ បាសំ, នាហំ ឯកា វនេ រមេ.

៥១. វិក្កមាមិ ន បារេមិ, ភូមិំ សុម្ភាមិ វេគសា;

ទឡ្ហោ វារត្តិកោ បាសោ, បាទំ មេ បរិកន្តតិ.

៥២. អត្ថរស្សុ បលាសានិ, អសិំ និព្ពាហ លុទ្ទក;

បឋមំ មំ វធិត្វាន, ហន បច្ឆា មហាមិគំ.

៥៣. ន មេ សុតំ វា ទិដ្ឋំ វា, ភាសន្តិំ មានុសិំ មិគិំ [ន មេ សុតា វា ទិដ្ឋា វា, ភាសន្តី មានុសិំ មិគី (ដីកា)];

ត្វញ្ច ភទ្ទេ សុខី ហោហិ, ឯសោ ចាបិ មហាមិគោ.

៥៤. ឯវំ លុទ្ទក នន្ទស្សុ, សហ សព្ពេហិ ញាតិភិ;

យថាហមជ្ជ នន្ទាមិ, មុត្តំ ទិស្វា មហាមិគន្តិ.

សុវណ្ណមិគជាតកំ នវមំ.

៣៦០. សុយោនន្ទីជាតកំ (៥-១-១០)

៥៥. វាតិ គន្ធោ តិមិរានំ, កុសមុទ្ទោ ច [វ (ស្យា. បី.)] ឃោសវា;

ទូរេ ឥតោ សុយោនន្ទី [ឥតោ ហិ សុសន្ទី (សី. ស្យា.), ឥតោបិ សុស្សោន្ទី (បី.)], តម្ពកាមា តុទន្តិ មំ.

៥៦. កថំ សមុទ្ទមតរិ, កថំ អទ្ទក្ខិ សេទុមំ [សេរុមំ (សី. ស្យា. បី.)];

កថំ តស្សា ច តុយ្ហញ្ច, អហុ សគ្គ [អគ្គ (សី. ស្យា.)] សមាគមោ.

៥៧. កុរុកច្ឆា [ភរុកច្ឆា (សី. ស្យា. បី.)] បយាតានំ, វាណិជានំ ធនេសិនំ;

មករេហិ អភិទា [មករេហិព្ភិទា (សី.), មករេហិ’ភិទា (ស្យា.), មករេហិ ភិន្នា (បី.)] នាវា, ផលកេនាហមប្លវិំ.

៥៨. សា មំ សណ្ហេន មុទុនា, និច្ចំ ចន្ទនគន្ធិនី;

អង្គេន [អង្កេន (បី. ក.)] ឧទ្ធរី ភទ្ទា, មាតា បុត្តំវ ឱរសំ.

៥៩. សា មំ អន្នេន បានេន, វត្ថេន សយនេន ច;

អត្តនាបិ ច មន្ទក្ខី, ឯវំ តម្ព វិជានាហីតិ.

សុយោនន្ទីជាតកំ ទសមំ.

មណិកុណ្ឌលវគ្គោ បឋមោ.

តស្សុទ្ទានំ –

អថ ជិនវរោ ហរិតំ តិណកោ, អថ ភិន្នប្លវោ ឧរគោវ ឃដោ;

ទរិយា បុន កុញ្ជរ ភូនហតា, មិគមុត្តមសគ្គវរេន ទសាតិ.