៣៥៩. សុវណ្ណមិគជាតកំ (៥-១-៩)

៥០. វិក្កម រេ ហរិបាទ [មហាមិគ (សី. ស្យា. បី.)], វិក្កម រេ មហាមិគ [ហរីបទ (សី. ស្យា. បី.)];

ឆិន្ទ វារត្តិកំ បាសំ, នាហំ ឯកា វនេ រមេ.

៥១. វិក្កមាមិ ន បារេមិ, ភូមិំ សុម្ភាមិ វេគសា;

ទឡ្ហោ វារត្តិកោ បាសោ, បាទំ មេ បរិកន្តតិ.

៥២. អត្ថរស្សុ បលាសានិ, អសិំ និព្ពាហ លុទ្ទក;

បឋមំ មំ វធិត្វាន, ហន បច្ឆា មហាមិគំ.

៥៣. ន មេ សុតំ វា ទិដ្ឋំ វា, ភាសន្តិំ មានុសិំ មិគិំ [ន មេ សុតា វា ទិដ្ឋា វា, ភាសន្តី មានុសិំ មិគី (ដីកា)];

ត្វញ្ច ភទ្ទេ សុខី ហោហិ, ឯសោ ចាបិ មហាមិគោ.

៥៤. ឯវំ លុទ្ទក នន្ទស្សុ, សហ សព្ពេហិ ញាតិភិ;

យថាហមជ្ជ នន្ទាមិ, មុត្តំ ទិស្វា មហាមិគន្តិ.

សុវណ្ណមិគជាតកំ នវមំ.