៣៥៨. ចូឡធម្មបាលជាតកំ (៥-១-៨)

៤៤. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, ហត្ថេ មេ ទេវ ឆេទេហិ.

៤៥. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, បាទេ មេ ទេវ ឆេទេហិ.

៤៦. អហមេវ ទូសិយា ភូនហតា, រញ្ញោ មហាបតាបស្ស;

ឯតំ មុញ្ចតុ ធម្មបាលំ, សីសំ មេ ទេវ ឆេទេហិ.

៤៧. ន ហិ [នហ (សី. ស្យា. បី.) ឯត្ថ ហ-ការោ ខេទេ] នូនិមស្ស រញ្ញោ, មិត្តាមច្ចា ច វិជ្ជរេ សុហទា;

យេ ន វទន្តិ រាជានំ, មា ឃាតយិ ឱរសំ បុត្តំ.

៤៨. ន ហិ [នហ (សី. ស្យា. បី.) ឯត្ថ ហ-ការោ ខេទេ] នូនិមស្ស រញ្ញោ, ញាតី មិត្តា ច វិជ្ជរេ សុហទា;

យេ ន វទន្តិ រាជានំ, មា ឃាតយិ អត្រជំ បុត្តំ.

៤៩. ចន្ទនសារានុលិត្តា, ពាហា ឆិជ្ជន្តិ ធម្មបាលស្ស;

ទាយាទស្ស បថព្យា, បាណា មេ ទេវ រុជ្ឈន្តីតិ.

ចូឡធម្មបាលជាតកំ អដ្ឋមំ.