៣៣១. កោកិលជាតកំ (៤-៤-១)

១២១. យោ វេ កាលេ អសម្បត្តេ, អតិវេលំ បភាសតិ;

ឯវំ សោ និហតោ សេតិ, កោកិលាយិវ អត្រជោ.

១២២. ន ហិ សត្ថំ សុនិសិតំ, វិសំ ហលាហលាមិវ [ហលាហលំ ឥវ (បី.)];

ឯវំ និកដ្ឋេ [និក្កឌ្ឍេ (ស្យា.), និកឌ្ឍេ (ក.)] បាតេតិ, វាចា ទុព្ភាសិតា យថា.

១២៣. តស្មា កាលេ អកាលេ វា [អកាលេ ច (សី. ស្យា.)], វាចំ រក្ខេយ្យ បណ្ឌិតោ;

នាតិវេលំ បភាសេយ្យ, អបិ អត្តសមម្ហិ វា.

១២៤. យោ ច កាលេ មិតំ ភាសេ, មតិបុព្ពោ វិចក្ខណោ;

សព្ពេ អមិត្តេ អាទេតិ, សុបណ្ណោ ឧរគាមិវាតិ.

កោកិលជាតកំ [កោកាលិកជាតកំ (សព្ពត្ថ)] បឋមំ.