៤. កោកិលវគ្គោ

៣៣១. កោកិលជាតកំ (៤-៤-១)

១២១. យោ វេ កាលេ អសម្បត្តេ, អតិវេលំ បភាសតិ;

ឯវំ សោ និហតោ សេតិ, កោកិលាយិវ អត្រជោ.

១២២. ន ហិ សត្ថំ សុនិសិតំ, វិសំ ហលាហលាមិវ [ហលាហលំ ឥវ (បី.)];

ឯវំ និកដ្ឋេ [និក្កឌ្ឍេ (ស្យា.), និកឌ្ឍេ (ក.)] បាតេតិ, វាចា ទុព្ភាសិតា យថា.

១២៣. តស្មា កាលេ អកាលេ វា [អកាលេ ច (សី. ស្យា.)], វាចំ រក្ខេយ្យ បណ្ឌិតោ;

នាតិវេលំ បភាសេយ្យ, អបិ អត្តសមម្ហិ វា.

១២៤. យោ ច កាលេ មិតំ ភាសេ, មតិបុព្ពោ វិចក្ខណោ;

សព្ពេ អមិត្តេ អាទេតិ, សុបណ្ណោ ឧរគាមិវាតិ.

កោកិលជាតកំ [កោកាលិកជាតកំ (សព្ពត្ថ)] បឋមំ.

៣៣២. រថលដ្ឋិជាតកំ (៤-៤-២)

១២៥. អបិ ហន្ត្វា ហតោ ព្រូតិ, ជេត្វា ជិតោតិ ភាសតិ;

បុព្ពវក្ខាយិនោ [បុព្ពមក្ខាយិនោ (សី. ស្យា.)] រាជ, អញ្ញទត្ថុ [ឯកទត្ថុ (សី. បី.)] ន សទ្ទហេ.

១២៦. តស្មា បណ្ឌិតជាតិយោ, សុណេយ្យ ឥតរស្សបិ;

ឧភិន្នំ វចនំ សុត្វា, យថា ធម្មោ តថា ករេ.

១២៧. អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;

រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ.

១២៨. និសម្ម ខត្តិយោ កយិរា, នានិសម្ម ទិសម្បតិ;

និសម្មការិនោ រាជ [រញ្ញោ (សី. ស្យា.)], យសោ កិត្តិ ច វឌ្ឍតីតិ.

រថលដ្ឋិជាតកំ ទុតិយំ.

៣៣៣. បក្កគោធជាតកំ (៤-៤-៣)

១២៩. តទេវ មេ ត្វំ វិទិតោ, វនមជ្ឈេ រថេសភ;

យស្ស តេ ខគ្គពទ្ធស្ស, សន្នទ្ធស្ស តិរីដិនោ;

អស្សត្ថទុមសាខាយ, បក្កា គោធា បលាយថ.

១៣០. នមេ នមន្តស្ស ភជេ ភជន្តំ, កិច្ចានុកុព្ពស្ស ករេយ្យ កិច្ចំ;

នានត្ថកាមស្ស ករេយ្យ អត្ថំ, អសម្ភជន្តម្បិ ន សម្ភជេយ្យ.

១៣១. ចជេ ចជន្តំ វនថំ ន កយិរា, អបេតចិត្តេន ន សម្ភជេយ្យ;

ទិជោ ទុមំ ខីណផលន្តិ [ផលំវ (ក. សី. ស្យា. ក.), ទុកនិបាតេ បុដភត្តជាតកេន សំសន្ទេតព្ពំ] ញត្វា, អញ្ញំ សមេក្ខេយ្យ មហា ហិ លោកោ.

១៣២. សោ តេ ករិស្សាមិ យថានុភាវំ, កតញ្ញុតំ ខត្តិយេ [ខត្តិយោ (ស្យា. ក.)] បេក្ខមានោ;

សព្ពញ្ច តេ ឥស្សរិយំ ទទាមិ, យស្សិច្ឆសី តស្ស តុវំ ទទាមីតិ.

បក្កគោធជាតកំ [គោធជាតកំ (សី. ស្យា. បី.)] តតិយំ.

៣៣៤. រាជោវាទជាតកំ (៤-៤-៤)

១៣៣. គវំ ចេ តរមានានំ, ជិម្ហំ គច្ឆតិ បុង្គវោ;

សព្ពា តា ជិម្ហំ គច្ឆន្តិ [សព្ពា គាវី ជិម្ហំ យន្តិ (សី. ស្យា.)], នេត្តេ ជិម្ហំ គតេ សតិ.

១៣៤. ឯវមេវ មនុស្សេសុ, យោ ហោតិ សេដ្ឋសម្មតោ;

សោ ចេ អធម្មំ ចរតិ, បគេវ ឥតរា បជា;

សព្ពំ រដ្ឋំ ទុខំ សេតិ, រាជា ចេ ហោតិ អធម្មិកោ.

១៣៥. គវំ ចេ តរមានានំ, ឧជុំ គច្ឆតិ បុង្គវោ;

សព្ពា គាវី ឧជុំ យន្តិ [សព្ពា តា ឧជុំ គច្ឆន្តិ (បី. អ. និ. ៤.៧០)], នេត្តេ ឧជុំ គតេ សតិ.

១៣៦. ឯវមេវ មនុស្សេសុ, យោ ហោតិ សេដ្ឋសម្មតោ;

សោ សចេ ធម្មំ ចរតិ, បគេវ ឥតរា បជា;

សព្ពំ រដ្ឋំ សុខំ សេតិ, រាជា ចេ ហោតិ ធម្មិកោតិ.

រាជោវាទជាតកំ ចតុត្ថំ.

៣៣៥. ជម្ពុកជាតកំ (៤-៤-៥)

១៣៧. ព្រហា បវឌ្ឍកាយោ សោ, ទីឃទាឋោ ច ជម្ពុក;

ន ត្វំ តត្ថ កុលេ ជាតោ, យត្ថ គណ្ហន្តិ កុញ្ជរំ.

១៣៨. អសីហោ សីហមានេន, យោ អត្តានំ វិកុព្ពតិ;

កោត្ថូវ [កុដ្ឋូវ (សី.), កុត្ថុវ (ស្យា. បី)] គជមាសជ្ជ, សេតិ ភូម្យា អនុត្ថុនំ.

១៣៩. យសស្សិនោ ឧត្តមបុគ្គលស្ស, សញ្ជាតខន្ធស្ស មហព្ពលស្ស;

អសមេក្ខិយ ថាមពលូបបត្តិំ, ស សេតិ នាគេន ហតោយំ ជម្ពុកោ.

១៤០. យោ ចីធ កម្មំ កុរុតេ បមាយ, ថាមព្ពលំ អត្តនិ សំវិទិត្វា;

ជប្បេន មន្តេន សុភាសិតេន, បរិក្ខវា សោ វិបុលំ ជិនាតីតិ.

ជម្ពុកជាតកំ បញ្ចមំ.

៣៣៦. ព្រហាឆត្តជាតកំ (៤-៤-៦)

១៤១. តិណំ តិណន្តិ លបសិ, កោ នុ តេ តិណមាហរិ;

កិំ នុ តេ តិណកិច្ចត្ថិ, តិណមេវ បភាសសិ.

១៤២. ឥធាគមា ព្រហ្មចារី, ព្រហា ឆត្តោ ពហុស្សុតោ;

សោ មេ [សោ វេ (ក.)] សព្ពំ សមាទាយ, តិណំ និក្ខិប្ប គច្ឆតិ.

១៤៣. ឯវេតំ ហោតិ កត្តព្ពំ, អប្បេន ពហុមិច្ឆតា;

សព្ពំ សកស្ស អាទានំ, អនាទានំ តិណស្ស ច. ( ) [(តិណស្ស ចាដីសុ គតោ, តត្ថ កា បរិទេវនា) (សី. ស្យា.) (ចាដីសុ បក្ខិបិត្វាន, តត្ថ កា បរិទេវនា) (ក.)]

១៤៤. សីលវន្តោ ន កុព្ពន្តិ, ពាលោ សីលានិ កុព្ពតិ;

អនិច្ចសីលំ ទុស្សីល្យំ [ទុស្សីលំ (បី.)], កិំ បណ្ឌិច្ចំ ករិស្សតីតិ.

ព្រហាឆត្តជាតកំ ឆដ្ឋំ.

៣៣៧. បីឋជាតកំ (៤-៤-៧)

១៤៥. ន តេ បីឋមទាយិម្ហា [មទាសិម្ហ (បី. ក.)], ន បានំ នបិ ភោជនំ;

ព្រហ្មចារិ ខមស្សុ មេ, ឯតំ បស្សាមិ អច្ចយំ.

១៤៦. នេវាភិសជ្ជាមិ ន ចាបិ កុប្បេ, ន ចាបិ មេ អប្បិយមាសិ កិញ្ចិ;

អថោបិ មេ អាសិ មនោវិតក្កោ, ឯតាទិសោ នូន កុលស្ស ធម្មោ.

១៤៧. ឯសស្មាកំ កុលេ ធម្មោ, បិតុបិតាមហោ សទា;

អាសនំ ឧទកំ បជ្ជំ, សព្ពេតំ និបទាមសេ.

១៤៨. ឯសស្មាកំ កុលេ ធម្មោ, បិតុបិតាមហោ សទា;

សក្កច្ចំ ឧបតិដ្ឋាម, ឧត្តមំ វិយ ញាតកន្តិ.

បីឋជាតកំ សត្តមំ.

៣៣៨. ថុសជាតកំ (៤-៤-៨)

១៤៩. វិទិតំ ថុសំ ឧន្ទុរានំ [ឧន្ទូរានំ (ក.)], វិទិតំ បន តណ្ឌុលំ;

ថុសំ ថុសំ [ថុសំ ថូលំ (សី.)] វិវជ្ជេត្វា, តណ្ឌុលំ បន ខាទរេ.

១៥០. យា មន្តនា អរញ្ញស្មិំ, យា ច គាមេ និកណ្ណិកា;

យញ្ចេតំ ឥតិ ចីតិ ច, ឯតម្បិ វិទិតំ មយា.

១៥១. ធម្មេន កិរ ជាតស្ស, បិតា បុត្តស្ស មក្កដោ;

ទហរស្សេវ សន្តស្ស, ទន្តេហិ ផលមច្ឆិទា.

១៥២. យមេតំ បរិសប្បសិ [បរិសព្ពេសិ (ក.)], អជកាណោវ សាសបេ;

យោបាយំ ហេដ្ឋតោ សេតិ [សេសិ (សី.)], ឯតម្បិ វិទិតំ មយាតិ.

ថុសជាតកំ អដ្ឋមំ.

៣៣៩. ពាវេរុជាតកំ (៤-៤-៩)

១៥៣. អទស្សនេន មោរស្ស, សិខិនោ មញ្ជុភាណិនោ;

កាកំ តត្ថ អបូជេសុំ, មំសេន ច ផលេន ច.

១៥៤. យទា ច សរសម្បន្នោ, មោរោ ពាវេរុមាគមា;

អថ លាភោ ច សក្ការោ, វាយសស្ស អហាយថ.

១៥៥. យាវ នុប្បជ្ជតី ពុទ្ធោ, ធម្មរាជា បភង្ករោ;

តាវ អញ្ញេ អបូជេសុំ, បុថូ សមណព្រាហ្មណេ.

១៥៦. យទា ច សរសម្បន្នោ, ពុទ្ធោ ធម្មំ អទេសយិ;

អថ លាភោ ច សក្ការោ, តិត្ថិយានំ អហាយថាតិ.

ពាវេរុជាតកំ នវមំ.

៣៤០. វិសយ្ហជាតកំ (៤-៤-១០)

១៥៧. អទាសិ ទានានិ បុរេ វិសយ្ហ, ទទតោ ច តេ ខយធម្មោ អហោសិ;

ឥតោ បរំ ចេ ន ទទេយ្យ ទានំ, តិដ្ឋេយ្យុំ តេ សំយមន្តស្ស ភោគា.

១៥៨. អនរិយមរិយេន សហស្សនេត្ត, សុទុគ្គតេនាបិ អកិច្ចមាហុ;

មា វោ ធនំ តំ អហុ ទេវរាជ [អហុវា ជនិន្ទ (ក. សី. ស្យា. បី.)], យំ ភោគហេតុ វិជហេមុ សទ្ធំ.

១៥៩. យេន ឯកោ រថោ យាតិ, យាតិ តេនាបរោ រថោ;

បោរាណំ និហិតំ វត្តំ, វត្តតញ្ញេវ [វទ្ធំ, វទ្ធតញ្ញេវ (ក. សី. បី.)] វាសវ.

១៦០. យទិ ហេស្សតិ ទស្សាម, អសន្តេ កិំ ទទាមសេ;

ឯវំភូតាបិ ទស្សាម, មា ទានំ បមទម្ហសេតិ.

វិសយ្ហជាតកំ ទសមំ.

កោកិលវគ្គោ [កោកាលិកវគ្គោ (ក.)] ចតុត្ថោ.

តស្សុទ្ទានំ –

អតិវេលបភាសតិ ជីតវរោ, វនមជ្ឈ រថេសភ ជិម្ហគមោ;

អថ ជម្ពុ តិណាសនបីឋវរំ, អថ តណ្ឌុល មោរ វិសយ្ហ ទសាតិ.