៥. ចូឡកុណាលវគ្គោ

៣៤១. កណ្ឌរីជាតកំ (៤-៥-១)

១៦១. នរានមារាមករាសុ នារិសុ, អនេកចិត្តាសុ អនិគ្គហាសុ ច;

សព្ពត្ថ នាបីតិករាបិ [សព្ព’ត្តនា’បីតិករាបិ (សី. ស្យា.)] ចេ សិយា [សិយុំ (ស្យា.)], ន វិស្សសេ តិត្ថសមា ហិ នារិយោ.

១៦២. យំ វេ [យញ្ច (ស្យា. ក.)] ទិស្វា កណ្ឌរីកិន្នរានំ [កិន្នរកិន្នរីនំ (ស្យា.), កិន្នរីកិន្នរានំ (ក.)], សព្ពិត្ថិយោ ន រមន្តិ អគារេ;

តំ តាទិសំ មច្ចំ ចជិត្វា ភរិយា, អញ្ញំ ទិស្វា បុរិសំ បីឋសប្បិំ.

១៦៣. ពកស្ស ច ពាវរិកស្ស [បាវារិកស្ស (សី.)] រញ្ញោ, អច្ចន្តកាមានុគតស្ស ភរិយា;

អវាចរី [អច្ចាចរិ (ស្យា.), អនាចរិ (ក.)] បដ្ឋវសានុគស្ស [ពទ្ធវសានុគស្ស (សី. ស្យា.), បត្តវសានុគតស្ស (ក.)], កំ វាបិ ឥត្ថី នាតិចរេ តទញ្ញំ.

១៦៤. បិង្គិយានី សព្ពលោកិស្សរស្ស, រញ្ញោ បិយា ព្រហ្មទត្តស្ស ភរិយា;

អវាចរី បដ្ឋវសានុគស្ស, តំ វាបិ សា នាជ្ឈគា កាមកាមិនីតិ.

កណ្ឌរីជាតកំ [កិន្នរីជាតកំ (ក. សី. ក.), កុណ្ឌលិកជាតកំ (ស្យា.)] បឋមំ.

៣៤២. វានរជាតកំ (៤-៥-២)

១៦៥. អសក្ខិំ វត អត្តានំ, ឧទ្ធាតុំ ឧទកា ថលំ;

ន ទានាហំ បុន តុយ្ហំ, វសំ គច្ឆាមិ វារិជ.

១៦៦. អលមេតេហិ អម្ពេហិ, ជម្ពូហិ បនសេហិ ច;

យានិ បារំ សមុទ្ទស្ស, វរំ មយ្ហំ ឧទុម្ពរោ.

១៦៧. យោ ច ឧប្បតិតំ អត្ថំ, ន ខិប្បមនុពុជ្ឈតិ;

អមិត្តវសមន្វេតិ, បច្ឆា ច អនុតប្បតិ.

១៦៨. យោ ច ឧប្បតិតំ អត្ថំ, ខិប្បមេវ និពោធតិ;

មុច្ចតេ សត្តុសម្ពាធា, ន ច បច្ឆានុតប្បតីតិ.

វានរជាតកំ ទុតិយំ.

៣៤៣. កុន្តិនីជាតកំ (៤-៥-៣)

១៦៩. អវសិម្ហ តវាគារេ, និច្ចំ សក្កតបូជិតា;

ត្វមេវ ទានិមករិ, ហន្ទ រាជ វជាមហំ.

១៧០. យោ វេ កតេ បដិកតេ, កិព្ពិសេ បដិកិព្ពិសេ;

ឯវំ តំ សម្មតី វេរំ, វស កុន្តិនិ មាគមា.

១៧១. ន កតស្ស ច កត្តា ច, មេត្តិ [មេត្តី (បី.), មិត្តី (ក.)] សន្ធីយតេ បុន;

ហទយំ នានុជានាតិ, គច្ឆញ្ញេវ រថេសភ.

១៧២. កតស្ស ចេវ កត្តា ច, មេត្តិ សន្ធីយតេ បុន;

ធីរានំ នោ ច ពាលានំ, វស កុន្តិនិ មាគមាតិ.

កុន្តិនីជាតកំ តតិយំ.

៣៤៤. អម្ពជាតកំ (៤-៥-៤)

១៧៣. យោ នីលិយំ មណ្ឌយតិ, សណ្ឌាសេន វិហញ្ញតិ;

តស្ស សា វសមន្វេតុ, យា តេ អម្ពេ អវាហរិ.

១៧៤. វីសំ វា បញ្ចវីសំ [បណ្ណុវីសំ (ក. សី. បី.)] វា, ឩនតិំសំ វ ជាតិយា;

តាទិសា បតិ មា លទ្ធា [បតិំ មា លទ្ធា (បី.), បតិ មា’លត្ថ (?)], យា តេ អម្ពេ អវាហរិ.

១៧៥. ទីឃំ គច្ឆតុ អទ្ធានំ, ឯកិកា អភិសារិកា;

សង្កេតេ បតិ មា អទ្ទ [មា អទ្ទស (សី. បី.)], យា តេ អម្ពេ អវាហរិ.

១៧៦. អលង្កតា សុវសនា, មាលិនី ចន្ទនុស្សទា;

ឯកិកា សយនេ សេតុ, យា តេ អម្ពេ អវាហរីតិ.

អម្ពជាតកំ [អម្ពចោរជាតកំ (ក. សី. បី.)] ចតុត្ថំ.

៣៤៥. គជកុម្ភជាតកំ (៤-៥-៥)

១៧៧. វនំ យទគ្គិ ទហតិ, បាវកោ កណ្ហវត្តនី;

កថំ ករោសិ បចលក, ឯវំ ទន្ធបរក្កមោ.

១៧៨. ពហូនិ រុក្ខឆិទ្ទានិ, បថព្យា វិវរានិ ច;

តានិ ចេ នាភិសម្ភោម, ហោតិ នោ កាលបរិយាយោ.

១៧៩. យោ ទន្ធកាលេ តរតិ, តរណីយេ ច ទន្ធតិ;

សុក្ខបណ្ណំវ អក្កម្ម, អត្ថំ ភញ្ជតិ អត្តនោ.

១៨០. យោ ទន្ធកាលេ ទន្ធេតិ, តរណីយេ ច តារយិ;

សសីវ រត្តិំ វិភជំ, តស្សត្ថោ បរិបូរតីតិ.

គជកុម្ភជាតកំ បញ្ចមំ.

៣៤៦. កេសវជាតកំ (៤-៥-៦)

១៨១. មនុស្សិន្ទំ ជហិត្វាន, សព្ពកាមសមិទ្ធិនំ;

កថំ នុ ភគវា កេសី, កប្បស្ស រមតិ អស្សមេ [រមតស្សមេ (ក.)].

១៨២. សាទូនី [សាធូនិ (ក. សី. ស្យា. ក.)] រមណីយានិ, សន្តិ វក្ខា មនោរមា;

សុភាសិតានិ កប្បស្ស, នារទ រមយន្តិ មំ.

១៨៣. សាលីនំ ឱទនំ ភុញ្ជេ, សុចិំ មំសូបសេចនំ;

កថំ សាមាកនីវារំ, អលោណំ ឆាទយន្តិ តំ.

១៨៤. សាទុំ វា [អសាទុំ (បី.)] យទិ វាសាទុំ, អប្បំ វា យទិ វា ពហុំ;

វិស្សត្ថោ យត្ថ ភុញ្ជេយ្យ, វិស្សាសបរមា រសាតិ.

កេសវជាតកំ [កេសីជាតកំ (ក.)] ឆដ្ឋំ.

៣៤៧. អយកូដជាតកំ (៤-៥-៧)

១៨៥. សព្ពាយសំ កូដមតិប្បមាណំ, បគ្គយ្ហ យោ [សោ (បី.)] តិដ្ឋសិ អន្តលិក្ខេ;

រក្ខាយ មេ [មំ (សី.)] ត្វំ វិហិតោ នុសជ្ជ, ឧទាហុ មេ ចេតយសេ [វាយមសេ (សី. ស្យា.)] វធាយ.

១៨៦. ទូតោ អហំ រាជិធ រក្ខសានំ, វធាយ តុយ្ហំ បហិតោហមស្មិ;

ឥន្ទោ ច តំ រក្ខតិ ទេវរាជា, តេនុត្តមង្គំ ន តេ [ន ហិ (ក. សី. បី.), តេ ន (ក.)] ផាលយាមិ.

១៨៧. សចេ ច មំ រក្ខតិ ទេវរាជា, ទេវានមិន្ទោ មឃវា សុជម្បតិ;

កាមំ បិសាចា វិនទន្តុ សព្ពេ, ន សន្តសេ រក្ខសិយា បជាយ.

១៨៨. កាមំ កន្ទន្តុ [កន្តន្តុ (ក.), កណ្ឌន្តុ (ស្យា.)] កុម្ភណ្ឌា, សព្ពេ បំសុបិសាចកា;

នាលំ បិសាចា យុទ្ធាយ, មហតី សា វិភិំសិកាតិ [វិភេសិកាតិ (ស្យា.), វិហេសិកាតិ (បី.)].

អយកូដជាតកំ សត្តមំ.

៣៤៨. អរញ្ញជាតកំ (៤-៥-៨)

១៨៩. អរញ្ញា គាមមាគម្ម, កិំសីលំ កិំវតំ អហំ;

បុរិសំ តាត សេវេយ្យំ, តំ មេ អក្ខាហិ បុច្ឆិតោ.

១៩០. យោ តំ វិស្សាសយេ តាត, វិស្សាសញ្ច ខមេយ្យ តេ;

សុស្សូសី ច តិតិក្ខី ច, តំ ភជេហិ ឥតោ [តំ ភជេយ្យាសិតោ (ក.)] គតោ.

១៩១. យស្ស កាយេន វាចាយ, មនសា នត្ថិ ទុក្កដំ;

ឧរសីវ បតិដ្ឋាយ, តំ ភជេហិ ឥតោ គតោ.

១៩២. ហលិទ្ទិរាគំ កបិចិត្តំ, បុរិសំ រាគវិរាគិនំ;

តាទិសំ តាត មា សេវិ, និម្មនុស្សម្បិ ចេ សិយាតិ.

អរញ្ញជាតកំ អដ្ឋមំ.

៣៤៩. សន្ធិភេទជាតកំ (៤-៥-៩)

១៩៣. នេវ ឥត្ថីសុ សាមញ្ញំ, នាបិ ភក្ខេសុ សារថិ;

អថស្ស សន្ធិភេទស្ស, បស្ស យាវ សុចិន្តិតំ.

១៩៤. អសិ តិក្ខោវ មំសម្ហិ, បេសុញ្ញំ បរិវត្តតិ;

យត្ថូសភញ្ច សីហញ្ច, ភក្ខយន្តិ មិគាធមា.

១៩៥. ឥមំ សោ សយនំ សេតិ, យមិមំ [យយិមំ (សី. បី.), យិមំ (ក.)] បស្សសិ សារថិ;

យោ វាចំ សន្ធិភេទស្ស, បិសុណស្ស និពោធតិ.

១៩៦. តេ ជនា សុខមេធន្តិ, នរា សគ្គគតារិវ;

យេ វាចំ សន្ធិភេទស្ស, នាវពោធន្តិ សារថីតិ.

សន្ធិភេទជាតកំ នវមំ.

៣៥០. ទេវតាបញ្ហជាតកំ (៤-៥-១០)

១៩៧. ហន្តិ ហត្ថេហិ បាទេហិ, មុខញ្ច បរិសុម្ភតិ;

ស វេ រាជ បិយោ ហោតិ, កំ តេន ត្វាភិបស្សសិ [មភិបស្សសិ (សី.)].

១៩៨. អក្កោសតិ យថាកាមំ, អាគមញ្ចស្ស ឥច្ឆតិ;

ស វេ រាជ បិយោ ហោតិ, កំ តេន ត្វាភិបស្សសិ.

១៩៩. អព្ភក្ខាតិ អភូតេន, អលិកេនាភិសារយេ;

ស វេ រាជ បិយោ ហោតិ, កំ តេន ត្វាភិបស្សសិ.

២០០. ហរំ អន្នញ្ច បានញ្ច, វត្ថសេនាសនានិ ច;

អញ្ញទត្ថុហរា សន្តា, តេ វេ រាជ បិយា ហោន្តិ;

កំ តេន ត្វាភិបស្សសីតិ.

ទេវតាបញ្ហជាតកំ ទសមំ.

ចូឡកុណាលវគ្គោ បញ្ចមោ.

តស្សុទ្ទានំ –

នរានំ អសក្ខិវសិម្ហវរោ, នីលិយមគ្គិវរញ្ច បុន;

បុន រសាយសកូដវរោ, តថារញ្ញ សារថិ ហន្តិ ទសាតិ.

អថ វគ្គុទ្ទានំ –

កាលិង្គំ [វិវរំ (ពហូសុ)] បុចិមន្ទញ្ច, កុដិទូសក កោកិលា [កុដិទូសំ ពហុភាណកំ (ពហូសុ)];

ចូឡកុណាលវគ្គោ សោ, បញ្ចមោ សុប្បកាសិតោតិ.

ចតុក្កនិបាតំ និដ្ឋិតំ.