៣៣២. រថលដ្ឋិជាតកំ (៤-៤-២)

១២៥. អបិ ហន្ត្វា ហតោ ព្រូតិ, ជេត្វា ជិតោតិ ភាសតិ;

បុព្ពវក្ខាយិនោ [បុព្ពមក្ខាយិនោ (សី. ស្យា.)] រាជ, អញ្ញទត្ថុ [ឯកទត្ថុ (សី. បី.)] ន សទ្ទហេ.

១២៦. តស្មា បណ្ឌិតជាតិយោ, សុណេយ្យ ឥតរស្សបិ;

ឧភិន្នំ វចនំ សុត្វា, យថា ធម្មោ តថា ករេ.

១២៧. អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;

រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ.

១២៨. និសម្ម ខត្តិយោ កយិរា, នានិសម្ម ទិសម្បតិ;

និសម្មការិនោ រាជ [រញ្ញោ (សី. ស្យា.)], យសោ កិត្តិ ច វឌ្ឍតីតិ.

រថលដ្ឋិជាតកំ ទុតិយំ.