៣២៩. កាឡពាហុជាតកំ (៤-៣-៩)

១១៣. យំ អន្នបានស្ស បុរេ លភាម, តំ ទានិ សាខមិគមេវ គច្ឆតិ;

គច្ឆាម ទានិ វនមេវ រាធ, អសក្កតា ចស្ម ធនញ្ជយាយ [ធនញ្ចយាយ (ក.)].

១១៤. លាភោ អលាភោ យសោ អយសោ ច, និន្ទា បសំសា ច សុខញ្ច ទុក្ខំ;

ឯតេ អនិច្ចា មនុជេសុ ធម្មា, មា សោចិ កិំ សោចសិ បោដ្ឋបាទ.

១១៥. អទ្ធា តុវំ បណ្ឌិតកោសិ រាធ, ជានាសិ អត្ថានិ អនាគតានិ;

កថំ នុ សាខាមិគំ ទក្ខិសាម [ទក្ខិយាម (ក.), ទក្ខាម (ស្យា.)], និទ្ធាវិតំ [និទ្ធាបិតំ (សី. ស្យា.), និព្ពាបិតំ (បី.), និច្ឆទំ (ក.)] រាជកុលតោវ ជម្មំ.

១១៦. ចាលេតិ កណ្ណំ ភកុដិំ ករោតិ, មុហុំ មុហុំ ភាយយតេ [ភាយតេ (ស្យា.), ភាយាបតេ (ក.)] កុមារេ;

សយមេវ តំ កាហតិ កាឡពាហុ, យេនារកា ឋស្សតិ អន្នបានាតិ.

កាឡពាហុជាតកំ នវមំ.