៣. កុដិទូសកវគ្គោ

៣២១. កុដិទូសកជាតកំ (៤-៣-១)

៨១. មនុស្សស្សេវ តេ សីសំ, ហត្ថបាទា ច វានរ;

អថ កេន នុ វណ្ណេន, អគារំ តេ ន វិជ្ជតិ.

៨២. មនុស្សស្សេវ មេ សីសំ, ហត្ថបាទា ច សិង្គិល [សិង្គាល (ក.), បិង្គល (ដីកា)];

យាហុ សេដ្ឋា មនុស្សេសុ, សា មេ បញ្ញា ន វិជ្ជតិ.

៨៣. អនវដ្ឋិតចិត្តស្ស, លហុចិត្តស្ស ទុព្ភិនោ [ទូភិនោ (បី.)];

និច្ចំ អទ្ធុវសីលស្ស, សុខភាវោ [សុចិភាវោ (សី.), សុខភាគោ (?)] ន វិជ្ជតិ.

៨៤. សោ ករស្សុ អានុភាវំ, វីតិវត្តស្សុ សីលិយំ;

សីតវាតបរិត្តាណំ, ករស្សុ កុដវំ [កុដិកំ (សី. ស្យា.)] កបីតិ.

កុដិទូសក [សិង្គាលសកុណ (ក.)] ជាតកំ បឋមំ.

៣២២. ទុទ្ទុភជាតកំ (៤-៣-២)

៨៥. ទុទ្ទុភាយតិ [ទទ្ទភាយតិ (សី. បី.)] ភទ្ទន្តេ, យស្មិំ ទេសេ វសាមហំ;

អហម្បេតំ ន ជានាមិ, កិមេតំ ទុទ្ទុភាយតិ.

៨៦. ពេលុវំ បតិតំ សុត្វា, ទុទ្ទុភន្តិ [ទទ្ទភន្តិ (សី.)] សសោ ជវិ;

សសស្ស វចនំ សុត្វា, សន្តត្តា មិគវាហិនី.

៨៧. អប្បត្វា បទវិញ្ញាណំ, បរឃោសានុសារិនោ;

បនាទបរមា ពាលា, តេ ហោន្តិ បរបត្តិយា.

៨៨. យេ ច សីលេន សម្បន្នា, បញ្ញាយូបសមេ រតា;

អារកា វិរតា ធីរា, ន ហោន្តិ បរបត្តិយាតិ.

ទុទ្ទុភជាតកំ [ទទ្ទភជាតកំ (សី. បី.)] ទុតិយំ.

៣២៣. ព្រហ្មទត្តជាតកំ (៤-៣-៣)

៨៩. ទ្វយំ យាចនកោ រាជ, ព្រហ្មទត្ត និគច្ឆតិ;

អលាភំ ធនលាភំ វា, ឯវំ ធម្មា ហិ យាចនា.

៩០. យាចនំ រោទនំ អាហុ, បញ្ចាលានំ រថេសភ;

យោ យាចនំ បច្ចក្ខាតិ, តមាហុ បដិរោទនំ.

៩១. មា មទ្ទសំសុ រោទន្តំ, បញ្ចាលា សុសមាគតា;

តុវំ វា បដិរោទន្តំ, តស្មា ឥច្ឆាមហំ រហោ.

៩២. ទទាមិ តេ ព្រាហ្មណ រោហិណីនំ, គវំ សហស្សំ សហ បុង្គវេន;

អរិយោ ហិ អរិយស្ស កថំ ន ទជ្ជា [ទជ្ជេ (សី.), ទជ្ជំ (?)], សុត្វាន គាថា តវ ធម្មយុត្តាតិ.

ព្រហ្មទត្តជាតកំ តតិយំ.

៣២៤. ចម្មសាដកជាតកំ (៤-៣-៤)

៩៣. កល្យាណរូបោ វតយំ ចតុប្បទោ, សុភទ្ទកោ ចេវ សុបេសលោ ច;

យោ ព្រាហ្មណំ ជាតិមន្តូបបន្នំ, អបចាយតិ មេណ្ឌវរោ យសស្សី.

៩៤. មា ព្រាហ្មណ ឥត្តរទស្សនេន, វិស្សាសមាបជ្ជិ ចតុប្បទស្ស;

ទឡ្ហប្បហារំ អភិកង្ខមានោ [អភិកត្តុកាមោ (ស្យា.)], អវសក្កតី ទស្សតិ សុប្បហារំ.

៩៥. ឩរុដ្ឋិ [ឩរដ្ឋិ (សី.)] ភគ្គំ បវដ្ដិតោ [បតិតោ (សី. ស្យា.)] ខារិភារោ, សព្ពញ្ច ភណ្ឌំ ព្រាហ្មណស្ស [ព្រាហ្មណស្សីធ (ក. សី. បី.), ព្រាហ្មណស្សេវ (ក. សី. ស្យា. ក.)] ភិន្នំ;

ឧភោបិ ពាហា បគ្គយ្ហ [បគ្គយ្យេវ (ស្យា.), បគ្គហីយ (?)] កន្ទតិ [ពាហា បគ្គយ្យ កន្ទតិ (បី. ក.)], អភិធាវថ ហញ្ញតេ ព្រហ្មចារី.

៩៦. ឯវំ សោ និហតោ សេតិ, យោ អបូជំ បសំសតិ [នមស្សតិ (បី.)];

យថាហមជ្ជ បហតោ, ហតោ មេណ្ឌេន ទុម្មតីតិ.

ចម្មសាដកជាតកំ ចតុត្ថំ.

៣២៥. គោធរាជជាតកំ (៤-៣-៥)

៩៧. សមណំ តំ មញ្ញមានោ, ឧបគច្ឆិមសញ្ញតំ;

សោ មំ ទណ្ឌេន បាហាសិ, យថា អស្សមណោ តថា.

៩៨. កិំ តេ ជដាហិ ទុម្មេធ, កិំ តេ អជិនសាដិយា;

អព្ភន្តរំ តេ គហនំ, ពាហិរំ បរិមជ្ជសិ.

៩៩. ឯហិ គោធ និវត្តស្សុ, ភុញ្ជ សាលីនមោទនំ;

តេលំ លោណញ្ច មេ អត្ថិ, បហូតំ មយ្ហ បិប្ផលិ.

១០០. ឯស ភិយ្យោ បវេក្ខាមិ, វម្មិកំ សតបោរិសំ;

តេលំ លោណញ្ច កិត្តេសិ [កិន្តេសិ (ស្យា. បី.)], អហិតំ មយ្ហ បិប្ផលីតិ.

គោធរាជជាតកំ បញ្ចមំ.

៣២៦. កក្ការុជាតកំ (៤-៣-៦)

១០១. កាយេន យោ នាវហរេ, វាចាយ ន មុសា ភណេ;

យសោ លទ្ធា ន មជ្ជេយ្យ, ស វេ កក្ការុមរហតិ.

១០២. ធម្មេន វិត្តមេសេយ្យ, ន និកត្យា ធនំ ហរេ;

ភោគេ លទ្ធា ន មជ្ជេយ្យ, ស វេ កក្ការុមរហតិ.

១០៣. យស្ស ចិត្តំ អហាលិទ្ទំ, សទ្ធា ច អវិរាគិនី;

ឯកោ សាទុំ ន ភុញ្ជេយ្យ, ស វេ កក្ការុមរហតិ.

១០៤. សម្មុខា វា តិរោក្ខា វា [បរោក្ខា វា (បី.), បរម្មុខា (ក.)], យោ សន្តេ ន បរិភាសតិ;

យថាវាទី តថាការី, ស វេ កក្ការុមរហតីតិ.

កក្ការុជាតកំ ឆដ្ឋំ.

៣២៧. កាកវតីជាតកំ (៤-៣-៧)

១០៥. វាតិ ចាយំ [វាយំ (ក.)] តតោ គន្ធោ, យត្ថ មេ វសតី បិយា;

ទូរេ ឥតោ ហិ កាកវតី [កាកាតី (សី.), កាកាតិ (ស្យា. បី.)], យត្ថ មេ និរតោ មនោ.

១០៦. កថំ សមុទ្ទមតរី, កថំ អតរិ កេបុកំ [កេពុកំ (សី. បី.)];

កថំ សត្ត សមុទ្ទានិ, កថំ សិម្ពលិមារុហិ.

១០៧. តយា សមុទ្ទមតរិំ, តយា អតរិ កេបុកំ [កេពុកំ (សី. បី.)];

តយា សត្ត សមុទ្ទានិ, តយា សិម្ពលិមារុហិំ.

១០៨. ធិរត្ថុមំ មហាកាយំ, ធិរត្ថុមំ អចេតនំ;

យត្ថ ជាយាយហំ ជារំ, អាវហាមិ វហាមិ ចាតិ.

កាកវតីជាតកំ សត្តមំ.

៣២៨. អននុសោចិយជាតកំ (៤-៣-៨)

១០៩. ពហូនំ វិជ្ជតី ភោតី, តេហិ មេ កិំ ភវិស្សតិ;

តស្មា ឯតំ ន សោចាមិ, បិយំ សម្មិល្លហាសិនិំ.

១១០. តំ តំ ចេ អនុសោចេយ្យ, យំ យំ តស្ស ន វិជ្ជតិ;

អត្តានមនុសោចេយ្យ, សទា មច្ចុវសំ បតំ.

១១១. ន ហេវ ឋិតំ នាសីនំ, ន សយានំ ន បទ្ធគុំ [បត្ថគុំ (ស្យា.)];

យាវ ព្យាតិ និមិសតិ, តត្រាបិ រសតី [សរតី (សី. ស្យា. បី.)] វយោ.

១១២. តត្ថត្តនិ វតប្បទ្ធេ [វត បន្ថេ (ស្យា.), វត ពន្ធេ (ក.) វត + ប-អទ្ធេ = វតប្បទ្ធេ], វិនាភាវេ អសំសយេ;

ភូតំ សេសំ ទយិតព្ពំ, វីតំ អននុសោចិយន្តិ [ចវិតំ នានុសោចិយន្តិ (ស្យា.), មតន្តំ នានុសោចិយំ (ក.)].

អននុសោចិយជាតកំ អដ្ឋមំ.

៣២៩. កាឡពាហុជាតកំ (៤-៣-៩)

១១៣. យំ អន្នបានស្ស បុរេ លភាម, តំ ទានិ សាខមិគមេវ គច្ឆតិ;

គច្ឆាម ទានិ វនមេវ រាធ, អសក្កតា ចស្ម ធនញ្ជយាយ [ធនញ្ចយាយ (ក.)].

១១៤. លាភោ អលាភោ យសោ អយសោ ច, និន្ទា បសំសា ច សុខញ្ច ទុក្ខំ;

ឯតេ អនិច្ចា មនុជេសុ ធម្មា, មា សោចិ កិំ សោចសិ បោដ្ឋបាទ.

១១៥. អទ្ធា តុវំ បណ្ឌិតកោសិ រាធ, ជានាសិ អត្ថានិ អនាគតានិ;

កថំ នុ សាខាមិគំ ទក្ខិសាម [ទក្ខិយាម (ក.), ទក្ខាម (ស្យា.)], និទ្ធាវិតំ [និទ្ធាបិតំ (សី. ស្យា.), និព្ពាបិតំ (បី.), និច្ឆទំ (ក.)] រាជកុលតោវ ជម្មំ.

១១៦. ចាលេតិ កណ្ណំ ភកុដិំ ករោតិ, មុហុំ មុហុំ ភាយយតេ [ភាយតេ (ស្យា.), ភាយាបតេ (ក.)] កុមារេ;

សយមេវ តំ កាហតិ កាឡពាហុ, យេនារកា ឋស្សតិ អន្នបានាតិ.

កាឡពាហុជាតកំ នវមំ.

៣៣០. សីលវីមំសជាតកំ (៤-៣-១០)

១១៧. សីលំ កិរេវ កល្យាណំ, សីលំ លោកេ អនុត្តរំ;

បស្ស ឃោរវិសោ នាគោ, សីលវាតិ ន ហញ្ញតិ.

១១៨. យាវទេវស្សហូ កិញ្ចិ, តាវទេវ អខាទិសុំ;

សង្គម្ម កុលលា លោកេ, ន ហិំសន្តិ អកិញ្ចនំ.

១១៩. សុខំ និរាសា សុបតិ, អាសា ផលវតី សុខា;

អាសំ និរាសំ កត្វាន, សុខំ សុបតិ បិង្គលា.

១២០. ន សមាធិបរោ អត្ថិ, អស្មិំ លោកេ បរម្ហិ ច;

ន បរំ នាបិ អត្តានំ, វិហិំសតិ សមាហិតោតិ.

សីលវីមំសជាតកំ ទសមំ.

កុដិទូសកវគ្គោ តតិយោ.

តស្សុទ្ទានំ –

សមនុស្ស -សទុទ្ទុភ-យាចនកោ, អថ មេណ្ឌវរុត្តម-គោធវរោ;

អថ កាយសកេបុក ភោតីវរោ, អថ រាធសុសីលវរេន ទសាតិ.