៣១៥. សព្ពមំសលាភជាតកំ (៤-២-៥)

៥៧. ផរុសា វត តេ វាចា, មំសំ [សម្ម (បី. ក.)] យាចនកោ អសិ [ចសិ (បី.)];

កិលោមសទិសី [កិលោមស្ស សទិសា (បី.)] វាចា, កិលោមំ សម្ម ទម្មិ តេ.

៥៨. អង្គមេតំ មនុស្សានំ, ភាតា លោកេ បវុច្ចតិ;

អង្គស្ស សទិសី វាចា [អង្គស្សទិសី តេ វាចា (ក.)], អង្គំ សម្ម ទទាមិ តេ.

៥៩. តាតាតិ បុត្តោ វទមានោ, កម្បេតិ [សម្មេតិ (ក.)] ហទយំ បិតុ;

ហទយស្ស សទិសី [ហទយស្សទិសី (ក.)] វាចា, ហទយំ សម្ម ទម្មិ តេ.

៦០. យស្ស គាមេ សខា នត្ថិ, យថារញ្ញំ តថេវ តំ;

សព្ពស្ស សទិសី វាចា, សព្ពំ សម្ម ទទាមិ តេតិ.

សព្ពមំសលាភជាតកំ [មំសជាតកំ (សី. ស្យា. បី.)] បញ្ចមំ.